Lulevi 23 - Acoli Baibul

Nino madito ma giciko

¹ Rwot owaco bot Moses ni,

² “Wac bot jo Icrael ni, Nino madito ma Rwot ocikogi, ma wubituco pigi ni gubed gurre maleŋ, nino madito ma an aciko, gin ene.

³ Wubitiyo tic nino abicel, ento i nino me abirone en ceŋ cabit me yweyo mot, en aye gurre maleŋ, Pe wuti iye tic mo; en aye ceŋ cabit pa Rwot ka ma wubibedo iye ducu.

Kato (Paska) ki nino madito me Mugati ma Tobi Pe Iye

⁴ “Magi aye nino madito ma Rwot ociko, gin gurre maleŋ ma wubituco pigi i kare ma Rwot ociko pigi.

⁵ I dwe mukwono i nino dwe apar wiye aŋwen otyeno, en aye Kato (Paska) pa Rwot.

⁶ I kom nino dwe apar wiye abic me dwe acel-lu en nino madit pa Rwot me Mugati ma Tobi Pe tye; wubicamo mugati ma tobi pe iye pi nino abiro.’

⁷ I kom nino mukwoŋone wubibedo iye ki gurre maleŋ; pe wuti iye tic mo matek.

⁸ Ento wubityero gityer ma giwa-ŋo ki mac bot Rwot pi nino abiro; i Dino me abirone wubibedo ki gurre maleŋ, pe wuti iye tic mo matek.’”

Larita bel me akwata

⁹ Rwot dok owaco bot Moses ni,

¹⁰ “Wac bot jo Icrael ni, Ka doŋ wuo i lobo ma abimiyowu, ka wukayo iye kac, ci wubikelo wic larita cam me wi mwaka bot ajwaka.

¹¹ En bikwato wic larita cam i nyim Rwot, wek oye gamowu; ajwaka bikwato i nino ma lubo cabit.

¹² I nino ma wubikwato iye wic larita-ni, en aye wubityero iye latin nyok romo ma ditte romo mwaka acel, ma kome pe ki mwonyo, obed gitum awaŋa bot Rwot.

¹³ Gityer me moko kwon ma wutyero kacel kwede bibedo moko kwon mapwotte ma romo agwata aryo, ma girubo ki moo, ma gibityero kun giwaŋo ki mac bot Rwot obed gin ma nweee kur me yomo cwiny. Gityer amatane bibedo vino ma romo cupa aryo kt nucu.

¹⁴ Pe wucam mugati, pe wumwod nyig bel ma gicelo nyo manumo, nio wa i nino meno kikome, waŋ ma wukelo gityer pa Lubaŋawu; meno bibedo cik matwal wa i kare pa likwayowu ducu, ikabedo ducu ma wubibedo iye.

Pwoyo kac

¹⁵ “Ka doki wubikwano cabit abiro kulu kun wucako ki nino ma lubo cabit, en aye nino ma wutyero iye wic larita cam me gityer akwata.

¹⁶ Wukwan nino pyerabic nio i nino ma lubo cabit me abirone, ka doŋ wucak kelo gityer me moko kwon kai manyen bot Rwot.

¹⁷ Wubikelo ki i kabedowu mugati aryo me akwata ma gitedo ki moko ma romo agwata aryo; gibitedogi ki moko mapwotte ma onoŋo girubo iye tobi, gubed wi mwaka ma gityero bot Rwot.

¹⁸ Dok wubikelo litino romi abiro kacel ki mugati meno ma ditogi mwaka acel acel, ma komgi pe ki mwonyo, ki wod twon acel ki nyogi romi aryo. Gibibedo gitum awaŋa bot Rwot, kacel ki gityer me moko kwon ki gityer amata mutikogi; gin gityer ma giwaŋo ki mac, gin ma ŋwece kur me yomo cwiny Rwot.

¹⁹ Dok wubityero nyok dyel acel obed gitum me bal, ki litino nyogi romi aryo ma ditogi mwaka acel acel gubed gityer Lakwecwiny.

²⁰ Ajwaka bikwatogi kacel ki mugati me wi mwaka gubed gityer akwata i nyim Rwot, kacel ki litino nyogi romi aryo-nu; gibibedo maleŋ bot Rwot, pi ajwaka.

²¹ I nino meno kikome wubibedo ki gurre maleŋ ma wutito pire ka maleŋ; pe wuti iye tic mo matek. Meno bibedo cik matwal wa i kare pa likwayowu ducu, i kabedo ducu ma wubibedo iye.

²² “Ka wukayo cam ma ocek i lobowu, pe wuka woko ducu nio wa i ŋet potowu, pe dok wubed ka beko obote ma odoŋ i kare me kac. Wubiwekogi pi konyo lucan ki lubedo; an a Rwot Lubaŋawu.”

Acakki mwaka manyen

²³ Rwot owaco bot Moses ni

²⁴ “Wac bot jo Icrael ni, I dwe me abiro, i nino dwe acel, wubikwero iye nino me yweyo mot, nino me po ma gituco pire ki koko gwara, nino me gurre maleŋ.

²⁵ Pe wuti iye tic mo matek, dok wubityero iye gityer ma giwaŋo ki mac bot Rwot.”

Nino madit me Kwanyo Bal

²⁶ Rwot dok owaco bot Moses ni,

²⁷ “I nino dwe apar me dwe man me abiro-ui en aye bedo nino me Kwanyo Bal. Bibedo botwu nino me gurre maleŋ; wubikumo ki toncwiny, dok wubityero gityer ma giwaŋo ki mac bot Rwot.

²⁸ Pe wuti tic mo i nino meno, pien en aye nino me kwanyo bal, pi timo gin lakwany bal ki i komwu i nyim Rwot Lubaŋawu.

²⁹ Ŋat ma pe okumo ki toncwiny i nino meno wane birwenyo woko ki i kin lutugi.

³⁰ Ŋat ma otiyo tic mo i nino meno abineko woko wek pe obed i kin lutugi.

³¹ Pe wuti iye tic mo; meno bibedo cik matwal wa i kare pa likwayowu ducu, i kabedo ducu ma wubibedo iye.

³² En aye bibedo botwu cabit me yweyo mot, ci wubikumo iye ki toncwiny, i nino dwe aboŋwen cakke otyeno nio wa orwone otyeno en aye wubiywe mot.”

Nino madito me ŋolo

³³ Rwot dok owaco bot Moses ni,

³⁴ “Wac bot jo Icrael ni, I nino dwe apar wiye abic me dwe man me abiro-ni en aye bibedo acakki me nino madito pa Rwot, kare me Bolo, ci tyeko nino abiro.

³⁵ I kom nino mukwoŋo wubibedo iye ki gurre maleŋ; pe wuti iye tic mo matek.

³⁶ Wubityero gityer ma giwaŋo ki mac bot Rwot pi nino abiro. I nino me aborone wubibedo iye ki gurre maleŋ, ma wubityero iye gityer ma giwaŋo ki mac bot Rwot; meno cokke madit me woro Lubaŋa, pe wuti iye tic mo matek.

³⁷ “Magi aye nino madito ma Rwot ociko, ma wubitito ki lwak ni gin aye kare me gurre maleŋ, pi tyero bot Rwot gityer ma giwaŋo ki mac, gitum awaŋa, gityer me moko kwon, gitum mukene, ki gityer amata, kun acel acel bedo ki ninone ma otike,

³⁸ kun wumedogi i kom ceŋ cabit pa Rwot me kare ducu, ki i kom mot mewu, i kom gityer mewu ducu me cobo kwoŋ, ki i kom gityerwu ducu ma iwu opwoyo ma wumiyo bot Rwot.

³⁹ “I kom nino dwe apar wiye abic me dwe me abiro, ka doŋ wucoko cam ma ocek i lobo, wubikwero nino madito pa Rwot pi nino abiro; nino mukwoŋo bibedo nino me yweyo mot, ki nino me aborone bene bibedo nino me yweyo mot.

⁴⁰ I nino mukwoŋo wubicoko iye nyig yat mabecone, ki jaŋ otit, ki jaŋ yat muluk, ki yat oget ma i ŋet kulu; ci wubibedo ki yomcwiny i nyim Rwot Lubaŋawu pi nino abiro.

⁴¹ Wubikwero nino madito man pa Rwot pi nino abiro mwaka ki mwaka; meno bibedo cik matwal wa i kare pa likwayowu ducu; wubikwerone i dwe me abiro.

⁴² Wubibedo i bolo pi nino abiro; litino anywalli ducu ma i Icrael bibedo i bolc,

⁴³ wek likwayowu guŋe ni, yam amiyo jo Icrael gubedo i bolo i kare ma akwanyogi woko ki i lobo Ejipt; an a Rwot Lubaŋawu.”

⁴⁴ Kit meno Moses otito bot jo Icrael pi nino madito ducu ma Rwot ociko pigi.