Lulevi 2 - Acoli Baibul

Gityer me moko kwon

¹ “Ka ŋatti mo okelo gityer me moko kwon me atyera bot Rwot, gityer mere bibedo moko kwon mapwotte. En bionyo iye moo, ci keto iye odok luban,

² ka en bikelo bot awobe pa Aron ma gin aye ajwagi. Ajwaka bijobo moko kwon mapwot-ti poŋ ciŋ acel, kacel ki moo ki odok luban mere ducu; ci ajwaka biwaŋo man i wi keno tyer obed gin me po i kome; en gityer ma giwaŋo ki mac, gin ma ŋwece kur me yomo cwiny Rwot.

³ Gin ma odoŋ ki i kom gityer me moko kwon bibedo pa Aron ki awobene; en aye gin maleŋ makato me gityer ma giwaŋo ki mac bot Rwot.

⁴ “Ka ityero gityer me moko kwon ma gitedo i keno, bibedo capat ma tobi pe iye me moko kwon mapwotte ma girubo ki moo, nyo capat marep ma tobi pe iye ma gireyo moo i komgi.

⁵ Ka ce gityer meri obedo gityer me moko kwon ma gitedo i otako nyonyo, bibedo moko kwon mapwotte ma tobi pe iye, ma girubo ki moo;

⁶ ka ocek ibinido iye matitino ci ionyo iye moo; en aye gityer me moko kwon.

⁷ Ka ce gityer meri obedo gityer me moko kwon ma gitedo i cupuriya, ibitedo ki moo ki moko kwon mapwotte.

⁸ Gityer me moko kwon ma gitimo ki jami magi ibikelo bot Rwot; ka doŋ gityero bot ajwaka, ci en bikelo i wi keno tyer.

⁹ Ki i kom gityer me moko kwon ajwaka bikwanyo iye gin me po, biwaŋo i wi keno tyer obed gityer ma giwaŋo ki mac, gin ma ŋwece kur me yomo cwiny Rwot.

¹⁰ Gin ma odoŋ ki i kom gityer me moko kwon bibedo pa Aron ki awobene; en aye gin maleŋ makato me gityer ma giwaŋo ki mac bot Rwot.

¹¹ “Gityer me moko kwon ma gikelo bot Rwot pe wuted ki tobi; pien pe wubiwaŋo tobi nyo moo kic me bedo gityer ma giwaŋo ki mac bot Rwot.

¹² Wutwero kelogi bot Rwot pi gityer me wi mwaka, ento pe wubityerogi i wi keno tyer me bedo gin ma ŋwece kur me yomo cwiny Rwot.

¹³ Ibiketo kado i gityer me moko kwon meri ducu; pe ibiweko kado me gicikke pa Lubaŋani bedo pe i gityer me moko kwon meri; myero ityer kado kacel ki gityer meri ducu.

¹⁴ “Ka ityero gityer me moko kwon me wi mwaka bot Rwot, ibityero wit bel manyen ma gicoto, gicelo ki mac.

¹⁵ Ibiketo moo ki odok luban i kome; en aye gityer me moko kwon.

¹⁶ Ajwaka biwaŋo bel mogo ma gieoto, kacel ki moo ki odok luban mere ducu, obed gin me po i kome; en aye gityer ma giwaŋo ki mac bot Rwot.