Lulevi 19 - Acoli Baibul

Cik i kom bedo jo mateg ki timo dano-marom

¹ Rwot owaco bot Moses ni,

² “Wac bot lwak jo Icrael ducu ni, Myero wubedjo maleŋ, pien an Rwot Lubaŋawu aleŋ,

³ ŋat acel acel ma i kinwu owor minne ki wonne, doki wugwok cabitta ducu; an a Rwot Lubaŋawu,

⁴ Pe wulokke wudok bot cal lubaŋa-gu, pe wutim lubaŋawu me nyonyo aliya piwu kenwu; an a Rwot Lubaŋawu.

⁵ “Ka wutyero gitum mewu me gityer Lakwecwiny bot Rwot, wubityero i kit ma miyo Lubaŋa ye gamowu.

⁶ Myero wucam i nino ma wutumo iye, nyo orwone; ma odoŋ nio wa i nino me adekke gibiwaŋo awaŋa ki mac.

⁷ Ka ce dok pud gicamo i nino me adekke, ci bedo gin me kwer; pe doŋ gibiye gamone,

⁸ ŋat ma ocamo-ni bal bidok i wiye, pien opyedo gin maleŋ pa Rwot; dano meno waŋe birwenyo woko ki i kin lutugi.

⁹ “Ka wukayo cam ma ocek i lobowu, pe wuka woko ducu nio wa i ŋet potowu, pe dok wubed ka beko obote ma odoŋ i kare me kac,

¹⁰ Pe wupwon nyig olokwu wugwer ducu, pe bene wucok nyige ma opoto piny i poto olokwu; wubiwekogi pi konyo lucan ki lubedo; an a Rwot Lubaŋawu.

¹¹ “Pe wukwal kwo, pe wunyebbe ka bwolo dano, pe wulok lok goba i kinwu kekenwu.

¹² Pe wukwoŋ kwoŋ i nyina ki goba, ma miyo wupyedo nyiŋ Lubaŋawu; an a Rwot.

¹³ “Pe ibur lawoti, pe ima jamine. Pe igalle ki mucara pa lapakaca mo dyewor kulu nio wa odiko.

¹⁴ Pe iyet ladiŋit, pe iket gin mo i yo ma twomo tyen latowaŋ, ento lwor Lubaŋani; an a Rwot.

¹⁵ “Pe wuŋol kop aleŋa; pe idwor kor lacan, pe idwor dano madit, ento ŋol kop atir i kom lawoti.

¹⁶ Pe ibed ka wirre i kin lutuwu ka kwoto’ nyiŋgi, pe ikel lok mo ma kelo to i kom lawoti; an a Rwot.

¹⁷ “Pe ikwer omeru ki i cwinyi, ento juk lawoti ajuka, wek balle pe odok i wii.

¹⁸ Pe icul kwor, pe ibed ki akeca i kom lutuwu; ento mar lawoti macalo imarre keni; an a Rwot.

¹⁹ “Wumak cikka. Pe iye limmi onywal ki kit lee mukene; pe ico kit kodi aryo mapatpat i poto acel; pe iruk boŋo ma gicweyo ki kit uci aryo mapatpat.

²⁰ “Ka laco mo obuto ki dako ma aŋeca ma ŋat mukene mito nyomo, ma peya gikoko gigonyo woko ki i opii, gibilaro koppe. Pe gibinekogi, pien dako onoŋo pe lone kene.

²¹ Laco bikelo gitum me aliine bot Rwot i doggola kema me rwatte, nyok romo me gitum me tiŋo alii.

²² Ajwaka bitimo gin lakwany bal ki i kome i nyim Rwot ki nyok romo me gitum me tiŋo alii, pi bal ma en otimo-ni, ci Lubaŋa biweko balle,

²³ “Ka doŋ wuo i lobo-nu, ce wupito iye kwa yadi ducu me acama, myero wuŋe ni gijuko ni nyige peya gicamo; gibijukowu camone pi mwaka adek.

²⁴ I mwaka me aŋwenne nyige ducu bibedo maleŋ, gibityero me lapak Rwot.

²⁵ Ento i mwaka me abicce wutwero camo nyige, wek yadiwu gunyak ki wun nyiggi madwoŋ; an a Rwot Lubaŋawu.

²⁶ “Pe wucam riŋo mo ma tye ki remo i kome. Pe wutyet tyet, pe wubed luyer war.

²⁷ Pe wuko yer te wiwu, pe wulyel teŋ yer tikwu.

²⁸ Pe wutoŋ komwu pi kwero cola, pe wuked kedo mo i komwu; an a Rwot.

²⁹ “Pe imi nyari odok lapyeda pi timo kwele, weko lobo balle woko ki tim kwele, bimiyo lobo poŋ ki tim kipyeda.

³⁰ Wugwok cabitta, wuwor kabedona maleŋ; an a Rwot.

³¹ “Pe wulokke wudok bot lukor tipo ki megi jogi, pe wucit ka yenyogi, miyo wupyedde kekenwu pi gin; an a Rwot Lubaŋawu.

³² “A malo i nyim dano ma wiye obuk lwar, wor dano ma doŋ guti, dok ilwor Lubaŋani: an a Rwot.

³³ “Ka labedo mo obedo: kwedi i lobowu, pe wutime marac.

³⁴ Labedo ma obedo kwedwu bibedo macalo latin anywalli i kinwu, ibimare macalo imarre keni; pien wun bene yam wubedo lubedo i lobo Ejipt; an a Rwot Lubaŋawu.

³⁵ “Pe wutim rac ‘i ŋolo kop, nyo i pimo bor me gin mo, nye pekke, nyo ditte,

³⁶ Wubed ki mijan ma pi mo kakare, kidi lapim pek muromo kakare, aduku lapim bel muromo kakare ki agulu lapim moo muromo kakare; an a Rwot Lubaŋawu ma con akwanyowu woko ki i lobo Ejipt.

³⁷ Wugwok cikka ki gin ma aciko ducu, wucobi; an a Rwot.”