Lulevi 18 - Acoli Baibul

Juko timo kir

¹ Rwot owaco bot Moses ni,

² “Wac bot jo Icrael ni, An a Rwot Lubaŋawu.

³ Pe wubitimo macalo gitimo i lobo Ejipt ma yam wubedo iye-ni; pe bene wubitimo kit macalo gitimo i lobo Kanaan ka ma atye ka terowu iye-ni. Pe wulub cikgi.

⁴ Myero wuti gin ma aciko, wumak cikka, wulubi. An a Rwot Lubaŋawu.

⁵ Pi meno, wubimako cikka ki gin ma aŋolo ducu, Pi timo k it meno dano bikwo; an a Rwot.

⁶ “Dano mo pe onyik cok ki dako ma watgi me bedo kwede, An a Rwot.

⁷ Pe ibibedo ki meni, pien miyo iketo lewic i kom woru; en aye meni, pe ibiketo lewic i kome,

⁸ Pe ibibedo ki ci-woru; pe, iket lewic i kom woru kumeno,

⁹ Pe ibibedo ki lameru ma nya pa woru nyo nya pa meni, kadi ma ginywalo paco nyo ma ginywalo ka mukene.

¹⁰ Pe ibibedo ki nya pa wodi nyo nya pa nyari, pien miyo ikelo lewic i komi keni.

¹¹ Pe ibibedo ki nya pa ci-woru ma woru aye onywalo, pien en lameru kikome.

¹² Pe ibibedo ki wayu, pien en wat ma i ot pa woru kikome.

¹³ Pe ibibedo ki lamiŋ meni, pien en wat ma i ot pa meni kikome.

¹⁴ Pe ibibedo ki ci-omin woru, pe ibinyiko cok ki dakone, pien en ci-omin woru,

¹⁵ Pe ibibedo ki ci-wodi, pien en dako pa wodi, pe ibibedo kwede.

¹⁶ Pe ibibedo ki ci-omeru, ma omeru aye bedo kwede.

¹⁷ Pe ibibedo ki dako mo, ka idodo ki bedo ki nyare; pe ibitero nya pa wode, nyo nya pa nyare, me bedo kwede.

¹⁸ Pe ibinyomo yweri obed nyek laminne, kun ibedo kwede ma lammne pud KWO.

¹⁹ “Pe ibinyiko cok ki dako me bedo kwede i kare ma en tye ki kwer, ma peya olonnye.

²⁰ Pe ibibuto ki dako pa lawoti me bedo kwede, miyo ijerre kekeni,

²¹ Pe ibityero latinni mo me awaŋa ki mac bot jok Molek, pe ibipyedo nyiŋ Lubaŋani kulu; an a Rwot.

²² Pe ibibuto ki laco macalo ibuto ki dako; meno tim gwok.

²³ Pe ibibuto ki lee mo ma ipyedde kwede kekeni, kadi dako mo pe opyedde i kom lee mo me buta kwede; meno tim kipyeda,

²⁴ “Pe wupyedde kekenwu i kom gin ducu, pien rok ducu ma atye ka ryemogi woko ki i nyimwu-ni gubedo ka pyedde kekengi i komgi;

²⁵ mumiyo lobo opyedde woko, omiyo aketo can i kome pi balle, ci lobo oŋoko jo ma gibedo iye woko.

²⁶ Ento wun myero wumak cikka ki lok ducu ma aŋolo, kun pe wutimo gin mo i kom kipyeda magi ducu, kadi anywalli me lobo, kadi larok mo ma bedo i kinwu.

²⁷ Pien tim kipyeda meno ducu wegi lobo-ni gubedo ka timone, jo ma yam gukwoŋo nyimwu, mumiyo lobo gipyedo woko,

²⁸ Pe wutim tim kipyeda, wek lobo pe oŋokwu woko ka wutimo tim kipyeda i kome, macalo con oŋoko kwede rok ma okwoŋo nyimwu-ni.

²⁹ Pien jo ducu ma gutimo gin mo i kom kipyeda magi, jo ma gitimo-ni waŋgi birwenyo woko ki i kin lutugi.

³⁰ Wumak gin ma aciko, ni, pe wunyebbe i kit me timo kipyeda macalo yam ginyebbe ka timone i nyimwu, pe wubed ka pyedde kekenwu ki kit tim macalo meno; an a Rwot Lubaŋawu.”