Lulevi 16 - Acoli Baibul

Nino me kwanyo bal

¹ Rwot oloko bot Moses i kare ma doŋ awobe pa Aron aryo gutyeko to, pien onoŋo gunyiko cok i nyim Rwot ci guto woko.

² Ci Rwot owaco bot Moses ni, “Tit ki omeru Aron ni pe obed ka donyo nino ducu i kabedo maleŋ ma boŋo kicika oumo i nyim kom me kica ma tye i wi canduk: wek pe oto; pien abinen i wi kom me kica i po!.

³ Ento Aron bidonyo i kabedo maleŋ ki gin magi: bidonyo iye ki wod twon pi gitum me bal, ki nyok romo pi gitum awaŋa,

⁴ En biruko kanyi maleŋ me boŋo camanini, biruko pali boŋo camanini i kome, bitweyo pyere ki kitambara boŋo camanini, ka tweyo kitambara adwala i wiye; man aye gin boŋŋi aruka maleŋ. En bilwoko kome ki pii, ka doŋ birukogi.

⁵ Dok en bigamo ki bot lwak jo Icrael nyogi dyegi aryo pi gitum me bal, ki nyok romo acel me gitum awaŋa.

⁶ “Aron bityero twon obed gitum me bal ma otiko en, kun timo gin lakwany bal ki i kome ki i kom jo ma i ode.

⁷ Dok en bikelo dyegi aryo-nu, biketogi i nyim Rwot i doggola kema me rwatte.

⁸ Ci Aron bibolo kwir i kom nyogi dyegi aryo-nu, kwir acel pi Rwot ki kwir mukene pi Ajajel,

⁹ Aron bikelo dyel ma kwir pa Rwot opoto i kome-ni bityero me bedo gitum me bal.

¹⁰ Ento dyel ma kwir pa Ajajel opoto i kome-ni gibikelo makwo i nyim Rwot pi timo gin lakwany bal i kome, wek gicwale woko ceŋ i tim bot Ajajel.

¹¹ “Aron bityero twon me bedo gitum me bal ma otiko en kun timo gin lakwany bal ki i kome ki i kom jo ma i ode; bineko twon obed gitum me bal ma otiko eno

¹² En bikwanyo atabo weer me waŋo odok eceta ma opoŋ ki lodi mac ma okwanyo ki i wi keno tyer ma i nyim Rwot, ki odok eceta ma ŋwece kur ma giluro matitino poŋ ciŋ aryo, ci bikelone i tyelo ka ma boŋo kicika oumo-ni.

¹³ Bionyo odok eceta ma ŋwece kur-ri i mac ma i nyim Rwot, wek yito me odok eceta ma ŋwece kur-ri oduny macalo pol oum kom me kica ma bedo i wi canduk lok me caden, wek pe oto.

¹⁴ Ka dok bikwanyo remo twon manok, ci kiro ki lwet ciŋe i kom kom me kica tuŋ nyime, dok bikiro remo ki lwet ciŋe tyen abiro piny i nyim kom me kica.

¹⁵ “Ka man otum, bineko dyel me gitum me bal ma onoŋo tye pi lwak, ci kelo remone i tyelo ma boŋo kicika oumo-ni, ci timo remone kit ma otimo ki remo twon-ni; bikiro i wi kom me kica ki i nyim kom me kica.

¹⁶ En bitimo gin lakwany bal ki i kom kabedo maleŋ kit meno, pi keni pa jo Icrael, ki pi tim aranyigi ki balgi ducu. Dok bitimo kit meno bene ki kema me rwatte ma bedo kwedgi i dye keni megi ducu.

¹⁷ I kare ma en donyo i kabedo maleŋ ka timo gin lakwany bal, dano mo pe obed i kema me rwatte, nio ka doŋ okato woko ma otyeko timo gin lakwany bal ki i kome ki i kom jo ma i ode, ki i kom jo Icrael mucokke ducu.

¹⁸ Lacen en bikato woko i nyim keno me tyer ma tye i nyim Rwot, ci timo gin lakwany bal ki i kome. Bikwanyo remo twon, ki remo dyel, ci reyo i kom ten keno aŋwen me keno tyer, rumo kome ducu.

¹⁹ Ka dok bikiro remo iye ki lwet ciŋe tyen abiro kun lonyo, kwero doko maleŋ pi kwanyo keni pa jo Icrael ducu ki i kome,

²⁰ “Ka doŋ otyeko timo gin lakwany bal ki i kom kabedo maleŋ, ki kema me rwatte, ki keno tyer, en bikelo dyel makwo.

²¹ Aron biketo cine aryo ducu i wi dyel, kun tuco i kome bal ducu ma jo Icrael gutimo, ki tim aranyigi ki kwa balgi ducu, Biketogi i wi dyel-lu, ci cwale woko kwede i tim, kun dano mo ma doŋ giyero aye tero.

²² Dyel bitiŋo balgi ducu i kome, cito kwede wa i t im ata; ci dano-nu bigonyo dyel cito woko i tim.

²³ “Aron dok bidonyo i kema me rwatte, bilunyo boŋŋi camanini woko ma onoŋo oruko i kare ma en cito i kabedo maleŋ-ŋi, ci wekogi kunnu.

²⁴ Ka bilwoko kome ki pii i kabedo mo maleŋ, ka ruko boŋŋine i kome, ci katti woko, tyero gitum awaŋane, ki gitum awaŋa pi lwak, ci timo gin lakwany bal ki i kome ki i kom lwak.

²⁵ Dwolo me gitum awaŋa en biwaŋo woko i wi keno tyer.

²⁶ Ŋat ma otero dyel, ocwalo bot Ajajel, bilwoko boŋŋine, lwoko kome ki pii, ka lacen bibino i gony,

²⁷ Twon me gitum me bal ki dyel me gitum me bal, ma onoŋo gitero remogi i kabedo maleŋ ka timo gin lakwany bal, gibiterogi woko wa i ŋe gony; pyengi ki riŋogi ki wee igi gibiwaŋo woko ki mac.

²⁸ Ŋat ma owaŋo bilwoko boŋŋine, lwoko kome ki pii, ka lacen en bibino i gony.

²⁹ “Man bibedo cik matwal botwu, ni, i dwe me abiro, i nino dwe me aparre, wubikumo ki toncwiny. Pe wubitiyo tic mo, kadi anywalli me lobo, kadi labedo ma bedo i kinwu.

³⁰ Pien i nino meno aye gibitimo iye gin lakwany bal ki i komwu me lonyowu; myero wubed ma wulonnye i nyim Rwot ki i kom balwu ducu.

³¹ En aye bedo botwu cabit me yweyo mot, ci wubikumo ki toncwiny; man aye cik ma bedo matwal.

³² Ajwaka ma giwiro ki moo ka giketo en i dog ticce me bedo ajwaka, kun leyo kaka wonne, bitimo gin lakwany bal, kun ruko boŋŋi aruka maleŋ me boŋo camanini.

³³ En bitimo gin lakwany bal ki i kom kabedo maleŋ, dok bitimo gin lakwany bal ki i kom kema me wratte ki i kom keno tyer, Ka dok bitimo gin lakwany bal ki i kom ajwagi, ki i kom jo ducu mucokke.

³⁴ Man bibedo cik botwu matwal, ni, myero gitim gin lakwany bal ki i kom jo Icrael i mwaka acel kicel, pi balgi ducu.” Ci Moses otimo kit ma Rwot ocike kwede.