Lulevi 15 - Acoli Baibul

Cwer tut ki cwer remo ma miyo dano bedo keni

¹ Rwot owaco bot Moses ki Aron ni,

² “Wuwac bot jo Icrael ni, Ka laco mo kome cwer tut, cwer tutte miyo kome bedo ki keni.

³ Dok man aye cik ma mako dano ma kome ki keni pi cwer tut, ka nyo kome mol tut, nyo ka tut ma cwer i kome ocony, noŋo kome ki keni.

⁴ Kitanda ducu ma dano ma kome cwer tut obuto iye bibedo keni, ki gin ducu ma en obedo iye bibedo keni.

⁵ Ŋat ma ogudo kom kitandane myero olwok boŋŋine, olwok kome ki pii, ci bedo keni nio wa otyeno.

⁶ Ŋat ma obedo i kom gin ma dano ma kome cwer tut obedo iye bilwoko boŋŋine, lwoko kome ki pii, ci bedo keni nio wa otyeno.

⁷ Ŋat ma ogudo kom dano ma kome cwer tut-ti bilwoko bomji ne, lwoko kome ki pii, ci bedo kem nio wa otyeno.

⁸ Ka ŋat ma kome cwer tut oŋulo laa i kom dano mo ma olony, dano-nu bilwoko boŋŋine, lwoko kome ki pii, ci bedo keni nio wa otyeno.

⁹ Kom mo me bedo i wi kinaga ma dano ma kome cwer tut obedo i wiye bibedo keni.

¹⁰ Ka ŋat ma ogudo gin mo ma en obedo nyo obuto iye, bibedo keni nio wa otyeno; ki ŋat ma otiŋo jami meno bilwoko boŋŋine, bilwoko kome ki pii, ci bedo keni nio wa otyeno,

¹¹ Ka dano ma kome cwer tut ogudo kom dano mo ma onoŋo pe olako ciŋe ki pii, dano-nu bilwoko boŋŋine, lwoko kome ki pii, ci bedo keni nio wa otyeno.

¹² Ka dano ma kome cwer tut ogudo kom agulu mo, ci agulune gibineko woko, ki jami macalo weer bao ducu gibilako komgi ki pii.

¹³ “Ka dano mo ma kome cwer tut kome doŋ olony, ci bikwano nino abiro pi lonnyene, ka bilwoko boŋŋine, lwoko kome i pii mamol, ci bedo ma ko me pe ki keni.

¹⁴ I nino me aborone en bitero amam aryo nyo litino akuri aryo, bibino i nyim Rwot i doggola kema me rwatte, bimiyogi bot ajwaka.

¹⁵ Ajwaka bityerogi, acel me gitum me bal, acel me gitum awaŋa; kit meno ajwaka bitimo gin lakwany bal ki i kome i nyim Rwot pi kome ma obedo ka cwer tut-ti.

¹⁶ “Ka laco mo kodi me co ne omol i kome, en bilwoko kome ducu ki pii, ci bedo keni nio wa otyeno.

¹⁷ Ginaruka nyo pyen ducu ma kodine me co omol i kome myero gilwok ki pii, ci bedo keni nio wa otyeno.

¹⁸ Ka laco obuto ki dako ci kodi me co odonyo i kome, gin aryo ducu gibilwoko komgi ki pii, ci gibibedo keni nio wa otyeno,

¹⁹ “Dako ma remo mol ki i kome i kit me nino ducu bibedo ki kwerre pi nino abiro; dano ducu ma ogudo kome bibedo keni nio wa otyeno,

²⁰ Gin ducu ma en obuto iye i kare ma tye ki kwer bibedo keni, ki gin ducu ma en obedo iye bibedo keni.

²¹ Ŋat ma ogudo kitandane myero olwok boŋŋine, olwok kome ki pii, ci bedo keni nio wa otyeno,

²² Ŋat ma ogudo kom gin ma en obedo iye bilwoko boŋŋine, lwoko kome ki pii, ci bedo keni nio wa otyeno.

²³ Kadi bed kitanda nyo gin mo ma en obedo iye, dano ma ogudo bibedo keni nio wa otyeno.

²⁴ Ka laco mo obuto kwede, ce kwerre ogudo kome, en bibedo keni pi nino abiro, dok kitanda ducu ma danonu obutoiye bibedo keni.

²⁵ “Ka dako mo remo mol ki i kome pi nino mapol, ma pe i i kare me two kwerre keken, nyo ka remone mol ma okato kare me two kwerre, en bimedde bedo keni pi kare ducu ma remone mol; en bibedo keni macalo i kare me two kwer.

²⁶ Kitanda ducu ma en obuto iye, i kare ducu ma remone mol-li, bibedo bote macalo kitanda me two kwerre; dok gin ducu ma en obedo iye bibedo keni, macalo bedo keni i kare me two kwer.

²⁷ Ŋat ma ogudo jami magi bibedo keni; myero olwok boŋŋine olwok kome ki pii, ci bedo keni nio wa otyeno.

²⁸ Ento ka dako kome doŋ olony i kom kwerre, en bikwano nino abiro, lacen en bibedo ma kome pe ki keni.

²⁹ I nino me aborone en bitero am am aryo nyo litino akuri aryo, bikelogi bot ajwaka i doggola kema me rwatte.

³⁰ Ajwaka bityero acel me gitum me bal, acel me gitum awaŋa; kit meno ajwaka bitimo gin lakwany bal ki i kome i nyim Rwot pi remone ma omol ma omiyo en bedo keni.

³¹ “Myero wumi jo Icrael gugwokke i kom gin ma miyogi bedo keni kit meno, wek pe guto ma gitye keni pi balo kemana ma tye i kingi,”

³² Man aye cik ma mako laco ma kome cwer tut ki ma kodi me co omol i kome ma omiyo en odoko keni,

³³ ki dako bene ma two two kwer; man aye cik ma mako dano ducu, laco nyo dako, ma kome cwer tut nyo remo, ki laco bene ma obuto ki dako ma kome ki keni.