Lulevi 14 - Acoli Baibul

Cik me lonnye pa ludobo

¹ Rwot owaco bot Moses ni,

² “Man aye bibedo cik ma mako ladobo i nino me lonnyene. Gibikele bot ajwaka,

³ ci ajwaka bikato woko i ŋe gony ka niyo kome. Ka two dobo doŋ ocaŋ woko ki i kome,

⁴ ci ajwaka biciko ni gikel winyo makwo aryo ma olony, te lokke ni, winyo ma gitwero camogi, ki yat cedar, uci makwar, ki anyero, pi dano ma gimito lonyo-ni.

⁵ Ajwaka biciko ni gitwom pii ma mol, giony i otako, ci ginek winyo acel ki malo i wi pii meno.

⁶ En bimako winyo makwo kacel ki yat cedar ki uci makwar-ri ki anyero, ci lutogi kacel ki winyo makwo i remo winyo ma onoŋo gineko ki malo i wi pii mamol-li.

⁷ Bikiro remo i kom dano ma gimito lonyo i kom dobo-ni tyen abiro; lacen bituco ni en doŋ olonnye, ci biweko winyo makwo-ni tuk dok woko i tim.

⁸ Ci dano ma obino pi lonnye bilwoko boŋŋine, bilyelo yer kome ducu, ka lwoko kome ki pii, ci bibedo ma olonnye. I ŋe meno en doŋ cako bino i gony, ento bibuto woko i ne kemanepi nino abiro.

⁹ I nino me abirone bilyelo yer wiye ducu, dok bilyelo yer tike ki yer pyen waŋe ki yer kome ducu. Ka dok bilwoko boŋŋine, bilwoko kome ki pii, ci doŋ bedo ma olonnye.

¹⁰ “Dok i nino me aborone en bitero litino nyogi romi aryo ma komgi pe ki mwonyo, ki bwoŋ romo ma ditte romo mwaka acel, ki gityer me moko kwon ma romo agwata adek, moko mapwotte ma girubo ki moo, ki moo ma romo cupa acel.

¹¹ Ajwaka ma lonyo en-ni bitero dano ma gilonyo-ni, cibo kacel ki jamine i nyim Rwot i doggola kema me rwatte.

¹² Ajwaka bikwanyo nyok romo acel, bityero me gitum pi alii, kacel ki cupa moo acel-lu, ci kwatogi me bedo gityer akwata i nyim Rwot.

¹³ Bineko latin romo-nu i kabedo ma gineko iye gitum pi bal ki gitum awaŋa, i kabedo maleŋ, pien gitum me alii rom ki gitum me bal, ducu bedo pa ajwaka; en gin maleŋ makato.

¹⁴ Ajwaka bigwelo remo me gitum me alii, bireyo i ogwilo it dano ma gilonyo-ni, malacuc, ki i kom twon nyig ciŋe malacuc, ki i twon nyig tyene malacuc.

¹⁵ Ka ajwaka bikwanyo moo ma romo cupa acel-li, bitono manok i dye ciŋe malacam,

¹⁶ ka luto lwet ciŋe malacuc i moo ma i dye ciŋe malacam-mi, ci kiro moo ki nyig ciŋe tyen abiro i nyim Rwot.

¹⁷ Moo ma odon i ciŋe ajwaka bireyo i ogwilo it daŋo ma gilonyo-ni malacuc, ki i twon nyig cine malacuc, ki i twon nyig tyene malacuc, i kom remo me gitum me alii.

¹⁸ Moo ma odoŋ i ciŋ ajwaka en bidunyo i wi dano ma gilonyo-ni, ka ajwaka bitimo gin lakwany bal ki i kome i nyim Rwot.

¹⁹ Ajwaka bityero gitum me bal me kwanyo bal ki; kom dano ma gimito lonyo keni ma i keme-ni. Lacen en bineko gitum awaŋa,

²⁰ ci ajwaka bityero gitum awaŋa kacel ki gitum me moko kwon i wi keno tyer, Kit meno ajwaka bitimo gin lakwany bal ki i kome, ci doŋ bilonnye.

²¹ “Ento ka en lacan ma noŋo meno ducu oloye, en bikwanyo latin nyok romo acel obed gitum me alii me akwata, pi kwanyo bal ki i kome, ki agwata moko kwon acel me moko mapwotte ma girubo ki moo pi gityer me moko kwon, ki moo ma romo cupa acel;

²² dok amam aryo nyo litino akuri aryo, macalo en romo noŋone; acel bibedo gitum me bal, acel bibedo gitum awaŋa,

²³ I nino me aborone en bikelo bot ajwaka pi lonnyene i doggola kema me rwatte i nyim Rwot.

²⁴ Ajwaka bikwanyo latin romo me gitum me alii, kacel ki moo ma romo cupa acel-li, bikwatogi me bedo gityer akwata i nyim Rwot.

²⁵ Ka dok bineko latin romo me gitum me alii; ci ajwaka bigwelo remo me gitum me alii, bireyo i ogwilo it dano ma gilonyo-ni malacuc, ki i twon nyig ciŋe malacuc, ki i twon nyig tyene malacuc.

²⁶ Ka ajwaka bitono moo manok i dye ciŋe malacam,

²⁷ ci bikiro moo ma i dye ciŋe malacam-mi tyen abiro i nyim Rwot ki nyig ciŋe malacuc.

²⁸ Ka ajwaka bireyo moo ma i ciŋe malacuc i ogwilo it dano ma gilonyo-ni, ki i twon nyig ciŋe malacuc, ki i twon nyig tyene malacuc, ka ma gireyo iye remo me gitum me alii.

²⁹ Moo ma odoŋ i ciŋe ajwaka bidunyo i wi dano ma gilonyo-ni, me lakwany bal ki i kome i nyim Rwot.

³⁰ I kom amam nyo litino akuri ma en romo noŋone,

³¹ en bityero acel pi gitum me bal, acel pi gitum awaŋa, kacel ki gityer me moko kwon; ci ajwaka bitimo gin lakwany bal ki i kom dano ma gilonyoni, i nyim Rwot.

³² Man aye cik ma mako dano ma tye ki two dobo, ma pe romo noŋo gityer ducu ma giciko pi lonnyene.”

³³ Rwot owaco bot Moses ki Aron ni,

³⁴ “Ka doŋ wuo i lobo Kanaan ma abimiyowu me bedo mewu, ka ce aketo two dobo i ot mo i lobo ma abimiyowuni,

³⁵ ci won ot bicito tito bot ajwaka kun waco ni, ‘I oda nen calo tye iye kit two mo.’

³⁶ Ajwaka biciko ni gicok jami, gikel woko wek ot odoŋ ma iye nono ma noŋo peya en ajwaka odonyo iye ka ŋiyo two, wek pe gituc ni jami ducu ma tye i ot bedo keni; lacen ajwaka bidonyo ka ŋiyo ot.

³⁷ En biŋiyo two; ka ce twone tye i kor ot kun omido ma obedo atworo atworo, nyo omido makwarkwar, ka nen ni odonyo wa matut i kor ot,

³⁸ ci ajwaka bikato woko ki i ot meno, cito i doggolane, cego dog otte woko pi nino abiro.

³⁹ I nino me abirone ajwaka dok dwogo ci neno. Ka two onya omedde i kor ot,

⁴⁰ ci ajwaka biciko ni gimuk matafali got ma two omido iye-ni, gibolgi woko i ne gaŋ i kabedo ma pe olony.

⁴¹ Dok bimiyo gicwero i ot rumo woko ducu, lobo ma gicwero i kor ot-ti gibionyo woko i ne gaŋ i kabedo ma pe olony.

⁴² Ka dok gibikelo matafali got mukene, giketogi i kabedo ma gikwanyo iye godi-ni, ka dok gikelo lobo mukene, ci gipuyo ki ot meno.

⁴³ “Ka two dok otuc i ot meno, ma onoŋo doŋ gityeko muko godi woko, dok gicwero kor ot, gipuyo odoco,

⁴⁴ ci ajwaka dok bidok ka nenone. Ka two onya omedde i ot aye, meno two dobo ma ŋuno kor ot; ot-ti keni.

⁴⁵ Gibimuko ot meno gireto woko piny, godine ki baone ki lobo ma gipuyo kwede ducu, gibiterogi woko i ŋe gaŋ i kabedo ma pe olony.

⁴⁶ Dano ma odonyo i ot meno ma onoŋo gicego woko-ni bibedo keni nio wa otyeno

⁴⁷ Dano ma obuto piny i ot meno bilwoko boŋŋine; dok ŋat ma ocamo i at-tu bilwoko boŋŋine,

⁴⁸ “Ento ka ajwaka obino, oŋiyo ot ce onoŋo two pe onya omedde nia ma gipuyo-ni, ci ajwaka bituco ni otte pe keni, pien twone doŋ ocaŋ.

⁴⁹ Pi lonyo ot, en bikwanyo litino winyo aryo, kacel ki yat cedar ki uci makwar ki anyero.

⁵⁰ Gibitwomo pii ma mol i otako, ci en bineko winyo acel ki malo i wi pii meno.

⁵¹ Bimako yat cedar ki anyero ki uci makwar, kacel ki winyo makwo, ci lutogi i remo winyo ma onoŋo gineko malo ki i wi pii mamol-li, ci kiro kom ot tyen abiro.

⁵² Kit meno en bilonyo ot ki remo winyo, kacel ki pii mamol-li, ki winyo makwo, ki yat cedar, ki anyero ki uci makwar-ri,

⁵³ ci biweko winyo makwo tuk dok woko i tim i ne gaŋ. Kit meno en bitimo gin lakwany bal ki i kom ot, ci bibedo ma olony.”

⁵⁴ Man aye cik ma mako two dobo ducu: pi two akukuc,

⁵⁵ pi two dobo ma i kom ginaruka nyo i kom ot,

⁵⁶ nyo pi gin ma okwot, nyo orugo, nyo orobo del kom dano,

⁵⁷ pi nyuto ka obedo keni nyo ma olony. Man aye cik ma mako dobo,