Lulevi 12 - Acoli Baibul

Lonyo dako ma doŋ onywal

¹ Rwot owaco bot Moses ni,

² “Wac bot jo Icrael ni, Ka dako ogamo ic ce onywalo latin laco, en bibedo keni pi nino abiro; bibedo keni macalo i kare me two kwer.

³ I nino me aborone en aye gibiliro iye del kom nyim latin me co.

⁴ Dako dok bimedde pi nino pyeradek wiye adek wek olonnye pi remo me kwerre; pe bigudo gin mo maleŋ, pe bicito i ot pa Lubaŋa, nio ka kare me lonnyene otum.

⁵ Ento ka onywalo latin nyako, en bibedo keni macalo i kare me two kwer pi cabit aryo; dok bimedde pi nino pyerabicel wiye abicel wek olonnye pi remo me kwer mere.

⁶ “Ka kare me lonnyene otum, ka nyo pi awobi nyo pi nyako, dako bikelo latin romo ma ditte romo mwaka acel bot ajwaka i doggola kema me rwatte pi gitum awaŋa, ki latin akuri, nyo amam, pi gitum me bal.

⁷ Ajwaka bityero i nyim Rwot, bitimo gin lakwany bal ki i kom dako, ci doŋ bilonnye ki i remone ma ocwer. Man aye cik ma mako dako ma onywalo latin laco nyo ma nyako.

⁸ Ka noŋo latin romo oloye, en bitero amam aryo, nyo litino akuri aryo, acel pi gitum awaŋa, acel pi gitum me bal: ajwaka bitimo gin lakwany bal ki i kome, ci doŋ bedo ma olonnye.”