Lulevi 11 - Acoli Baibul

Lee ma gicamo ki lee ma gikwero

¹ Rwot owaco bot Moses ki Aron ni,

² “Wuwac bot io Icrael ni, Man aye gin makwo ma wutwero camo ki i kin lee ducu ma tye i wi lobo.

³ Lee ducu ma oboŋ tyengi akara, ma kin tyengi opokke, ma nyamo omen, ma i k in lee ducu wutwero camone.

⁴ Ento lee ma nyamo omen nyo ma oboŋ tyengi akara ma pe wubicamo gin ene: Kinaga kadi en nyamo omen, ento obon tyene pe akara; pienno bedo keni botwu, wubikwerone.

⁵ Ki oduka nyamo omen, ento oboŋ tyene pe akara; pienno bedo keni botwu, wubikwerone.

⁶ Ki apwoyo bene kadi en nyamo omen, ento oboŋ tyene pe akara; pienno bedo keni botwu, wubikwero.

⁷ Ki opego, kadi oboŋ tyene akara, kin tyene opokke, ento pe nyamo omen; pienno bedo keni botwu, wubikwero.

⁸ Pe wucam rinogi, pe wugud wa komgi ma oto bene; gin bedo keni botwu, wubikwerogi.

⁹ “Magi aye wutwero camogi ki i kin gin ducu ma bedo i pii. Gin ducu ma bedo i pii ma tye ki kiŋa ŋegi ki pok komgi, ma i nam ki ma i kulu ducu, wutwero camogi.

¹⁰ Ento gin ducu ma tye i nam ki i kulu ducu ma pe ki kiŋa ŋegi ki pok komgi i kin gin ma corre limuk i pii ki i kin gin makwo ma bedo i pii, bedo gin me kwer botwu.

¹¹ Gibibedo me kwer botwu; pe wubicamo riŋogi, dok komgi mutone bene bedo me kwer botwu.

¹² Gin ducu ma i pii ma pe ki kiŋa ŋegi ki pok komgi bedo me kwer botwu,

¹³ “Magi aye gin ma bibedo me kwer botwu ki i kin winyo; pe gibicamogi, gin gibedo me kwer: ocur, acut, koga,

¹⁴ okwata, ocecu ki kit kwagi ducu;

¹⁵ agak ki kit kwagi ducu;

¹⁶ udu, tebu, wetwet, olwilwit ki kit kwagi ducu;

¹⁷ tula, alwinya, adyeladyel,

¹⁸ lagweno kulu, kikuŋ, ki ocur madito,

¹⁹ acebe, ogoro ki kit kwagi ducu; ki putput, ki olik.

²⁰ “Kwidi ducu ma tye ki bwomgi, ma giwoto ki tyengi aŋwen, bedo me kwer botwu.

²¹ Ento i kin kwidi ma tye ki bwomgi, ma giwoto ki tyengi aŋwen, wutwero camo gin ma tye ki tyengi mabocone ma gipye kwede i wi lobo.

²² Wutwero ca mo magi i kingi: bonyo ki kit kwagi ducu; ocenne ki kit kwagi ducu, labari ki kit kwagi ducu; ki otwoŋo ki i kit kwagi ducu,

²³ Ento kwidi mukene ducu ma gitye ki bwomgi, ma gitye ki tyengi aŋwen, gibedo-me kwer botwu.

²⁴ “Magi gin ma bimiyo wudoko keni; ŋat ma ogudo kom mutone bibedo keni nie wa otyeno.

²⁵ Ŋat ma ot iŋo dul komgi mo muto-ni bilwoko boŋŋine ci bibedo keni nio wa otyeno.

²⁶ Lee ducu ma oboŋ tyene akara, ento kin tyene pe opokke, nyo ma pe nyamo omen, bedo keni botwu; ŋat ma ogudo komgi bibedo keni.

²⁷ Ki lee ducu ma woto ki opany tyengi, i kin lee ducu ma giwoto ki tyengi aŋwen, bedo keni botwu. Ŋat ma ogudo kom mutone bibedo keni nio wa otyeno.

²⁸ Dok ŋat ma ot iŋo kom mutone bilwoko boŋŋine ci bibedo keni nio wa otyeno; gin bedo keni botwu, wubikwerogi.

²⁹ “Man aye gin ma bedo keni botwu ki i kin gin ma nya ma corre limuk i wi lobo: oculi, oyoo adeŋ, lagwe lakaka ki kit kwagi ducu,

³⁰ laromo ot, ŋec, lagwe kweyo, ki laŋogo.

³¹ Man aye gin makeni botwu ki i kin gin ducu ma gicorre limuk; ŋat ma ogudo komgi ka guto bibedo keni nio wa otyeno,

³² Ka mo i kingi ma doŋ oto opoto i kom jami mo-ni, jami-nu bibedo keni, kadi weer, nyo boŋo aruka, nyo laa, nyo kicaa, jami mo keken ma gitiyo kwede pi kit tic mo-ni; myero giket i pii, ci bibedo keni nio wa otyeno, ka doŋ bibedo ma olony.

³³ Dok ka mo i kingi opoto i agulu, nyo atabo nyo kit gin mo macalo meno ma gicweyo ki lobo, gin ducu ma tye iye bibedo keni, agulu nyo atabo-gu wubineko woko.

³⁴ Ginacama mo ma gicamo ma tye iye, ma gionyo iye pii, bibedo keni; ki ginamata ma gimato ki i agulu-ni nyo atabo-gu bibedo keni,

³⁵ Jami ducu ma dul komgi mo muto-ni opoto i kome bibedo keni, kadi keno nyo tuk keno gibimuko woko; gin gudoko keni, ci gibibedo keni botwu.

³⁶ Kadi bed kumeno, waŋ it nyo bur taŋi me jolo pii bibedo ma olony; ento gin ducu ma ogudo kom mutone bibedo keni.

³⁷ Ka dul komgi muto-ni opoto i kom kodi mo me acoya, ma gibicoyo, kodi-nu bibedo ma olony;

³⁸ ento ka onoŋo gionyo pii i kom kodinu, ce dul komgi mo muto-ni opoto i kome, ci bedo keni botwu.

³⁹ “Ka lee mo ma gicamo oto woko, ŋat ma ogudo geŋŋe bibedo keni nio wa otyeno.

⁴⁰ Ŋat ma ocamo geŋ meno bilwoko boŋŋine ci bibedo keni nio wa otyeno. Dok ŋat ma otiŋo geŋ-ŋu bilwoko boŋŋine, ci bibedo keni nio wa otyeno.

⁴¹ “Gin ducu ma nya ma corre limuk i wi lobo gin aye gin me kwer; pe gibicamone.

⁴² Gin ducu ma woto kun ywane ki iye, ki gin ducu ma woto ki tyengi aŋwen, nyo ma tye ki lwak tyengi mapol, gin ducu ma nya ma corre limuk i wi lobo pe wubicamogi, pien gin aye gin me kwer.

⁴³ Pe wulokke wudok gin me kwer pi gin mo-ni ma nya ma corre limuk; dok pe wuballe wudok keni pigi.

⁴⁴ Pien an a Rwot Lubaŋawu; pi meno wulonnye kekenwu wubed maleŋ, pien an aleŋ. Pe wuballe wudok keni pi gin mo ma corre limuk ma lak i wi lobo.

⁴⁵ Pien an aye a Rwot ma akwanyowu woko ki i lobo Ejipt, wek abed Lubaŋawu; mumiyo wubed jo maleŋ, pien an aleŋ.”

⁴⁶ Man aye cik ma otiko lee ki winyo ki gin makwo ducu ma kwan i pii, ki gin ducu ma corre limuk i wi lobo,

⁴⁷ wek dano gupok kin gin ma keni ki gin ma olony, ki kin gin makwo ma gitwero camo ki gin makwo ma pe gitwero camo.