Lulevi 10 - Acoli Baibul

Bal pa Nadab ki Abiu

¹ Nadab ki Abiu, awobe pa Aron, ŋat acel acel okwanyo atabo weerre me waŋo odok eceta, oketo iye mac, ka oketo iye odok eceta, ci gutyero mac mapat i nyim Rwot, kit mac ma yam pe ocikogi kwede.

² Ka mac oa ki i nyim Rwot, owaŋogi woko, ci guto woko ki i nyim Rwot.

³ Ka Moses owaco bot Aron ni, “Man aye gin ma Rwot owaco, ni, ‘Abinyutte kekena i kin jo ma gitye cok kweda ni aleŋ, dok gibiketo deyo i koma i nyim lwak ducu.’ ” Ci Aron oliŋ gire mot.

⁴ Ka Moses olwoŋo Micael ki Elijapan, awobe pa Ujiel omin won Aron, owaco botgi ni, “Wunyik cok, wutiŋ omegiwu ki i nyim kabedo maleŋ, wutergi woko i ne gony.”

⁵ Ci gunyiko cok, gutiŋogi ki kanyigi, guterogi woko i ne gony, kit macalo Moses owaco.

Cik ma obwoyo tic pa ajwagi ki wag watgi

⁶ Moses owaco bot Aron ki bot Eleajar ki Itamar ma gin awobene ni, “Pe wugony yer wiwu oket ata lijayi, dok pe wuyec ginarukawu, wek pe wuto, dok wek kiniga pe opol i kom lwak ducu, Ento utmegiwu, jo ducu me ot pa Icrael, gitwero kok pi to ma mac pa Rwot okelo,

⁷ Pe wukat woko ki i doggola ke ma me rwatte, wek pe wuto, pien moo wir pa Rwot tye i komwu.” Ci gutiyo kit ma Moses owaco botgi.

⁸ Rwot oloko ki Aron kun waco ni,

⁹ “Pe imat koŋo yiŋo nyo gin ma mero dano, in kacel ki awobeni, ka onoŋo wucito i kema me rwatte, wek pe wuto; meno bibedo cik matwal nio wa i kare pa likwayowu ducu.

¹⁰ Myero wupok kin jami maleŋ ki jami ma pe leŋ, ki kin gin ma keni ki gin ma olony,

¹¹ Dok wubipwonyo jo Icrael ki cik ducu ma Rwot ocikogi kwede ki i dog Moses,”

¹² Ci Moses owaco bot Aron, ki bot Eleajar ki Itamar, awobene ma yam gudoŋ, ni, “Wukwany gityer me moko kwon ma odoŋ ki i kom gityer ma giwaŋo ki mac bot Rwot, ci wucam ma to bi pe iye, i ŋet keno tyer, pien en gin maleŋ makato.

¹³ Myero wucam ki i kabedo mo maleŋ, pien en aye waŋ watti ki waŋ wat pa awobeni ma a ki i kom gityer ma giwaŋo ki mac bot Rwot; pien yam gicika kit meno.

¹⁴ Ento gok ma gikwato ki em ma gityero wubicamo i kabedo mo ma olony, in ki awobeni ki anyirani kacel, pien gimiyogi gubed waŋ watti ki waŋ wat pa awobeni, ma a ki i kom gityer lakwecwiny pa jo Icrael.

¹⁵ Em ma gityero ki gok ma gikwato-ni gibikek kacel ki gityer ma giwaŋo ki mac ma en aye dwolo, wek gikwat i nyim Rwot me gityer akwata. Bibedo meri ki pa awobeni kacel kwedi; en cik ma bibedo matwal, macalo yam Rwot ociko.”

¹⁶ Ka Moses openyo mot pi dyel me gitum me bal, ci onoŋo ni doŋ giwaŋo woko. Akemo omake i kom Eleajar ki Itamar, awobe pa Aron ma con gudoŋŋi, owaco ni,

¹⁷ “Piŋo pe wucamo gitum me bal ki i kabedo maleŋ? Pien en gin maleŋ makato ma gimiyowu wek wutin bal pa lwak, pi timo gin lakwany bal ki i komgi i nyim Rwot.

¹⁸ Nenu, wa remone pe gukelo i tyelo i kabedo maleŋ. Yam myero wucam ki i kabedo maleŋ, macalo yam aciko.”

¹⁹ Aron ogamo dog Moses ni, “Nen, tin gutyero gitum me bal ki gitum awanagi i nyim Rwot, ci gin macalo man doŋ opoto i koma, Ka kono abedo ka camo gitum me bal tin, kono obedo myero i waŋ Rwot?”

²⁰ Ka Moses owinyo lok meno, ci iye okwe.