Lulevi 1 - Acoli Baibul

Gitum awaŋa

¹ Rwot olwoŋo Moses ci oloko kwede ki i kema me rwatte kun waco ni,

² “Lok bot jo Icrael kun iwaco botgi ni, Ka dano mo i kinwu kelo tyer mo bot Rwot, wubikelo gityerwu me lim makwo ma wukwanyo ki i kin dyaŋi nyo ki i kin romi ki dyegi.

³ “Ka ce dano mo okwanyo gityerre me gitum awaŋa ki i kin dyaŋi, en bityero twon ma kome pe ki mwonyo; en bityero i doggola kema me rwatte, wek Rwot ogame,

⁴ En biketo ciŋe i wi gitum awaŋa, ci Lubaŋa bigamone pire me lakwany bal ki i kome,

⁵ En bineko twon meno i nyim Rwot ci awobe pa Aron ma gin aye ajwagi gibityero remo; gibicoro remo i kom keno tyer ma tye i doggola kema me rwatte kun rumo kome ducu,

⁶ En biyaŋo gitum awaŋa, biŋido woko matitino,

⁷ ka awobe pa ajwaka Aron gibimoko mac i wi keno tyer, kun gicano yen i mac kikore.

⁸ Ci awobe pa Aron ma gin aye ajwagi gibicano riŋo ma giŋido-ni kikore, kacel ki wic ki dwolo, i wi yen ma tye i mac ma i wi keno tyer;

⁹ ento jam iye ki tyene ducu gibilwokogi ki pii. Ajwaka biwaŋo woko ducu ki berre i keno tyer obed gitum awaŋa, gityer ma giwaŋo ki mac, en gin ma ŋwece kur me yomo cwiny Rwot.

¹⁰ “Ka ce okwanyo gityerre me gitum awaŋa ki i kin romi nyo dyegi, en bityero nyok ma kome pe ki mwonyo.

¹¹ En bineko i nyim Rwot, yo tuŋ acam me keno tyer; awobe pa Aron ma gin aye ajwagi gibicoro remo i kom keno tyer rumo kome ducu,

¹² En biŋido woko matitino, kacel ki wic ki dwolone, ci ajwaka bicanogi kikore i wi keno tyer;

¹³ ento jam iye ki tyene ducu gibilwokogi ki pii. Ajwaka bityero ducu ki berre kun waŋo i keno tyer; en aye gitum awaŋa, gityer ma giwaŋo ki mac, en gin ma ŋwece kur me yomo cwiny Rwot.

¹⁴ “Ka ce gityerre bot Rwot obedo winyo me gitum awaŋa, ci en bikelo amam nyo litino akuri me gityerre.

¹⁵ Ajwaka bikelone i keno tyer ci dwoyo ŋute, ka waŋo woko i wi keno tyer,

¹⁶ En bikwanyo lacukone ki yece ci onyogi i ŋet keno tyer tuŋ wokceŋ ka ma gionyo iye buru;

¹⁷ biyecone ki bwome, ento pe bipoko iye. Ajwaka biwaŋo i keno tyer, i wi yen ma tye i mac; en aye gitum awaŋa, gityer ma giwaŋo ki mac, gin ma ŋwece kur me yomo cwiny Rwot.