Latitlok 9 - Acoli Baibul

¹ Ento lok man ducu aketo i cwinya, kun aŋiyo ducu maber, kit macalo jo ma kitgi atir ki jo ma luryeko kacel ki gin ma gutiyo ducu gitye i ciŋ Lubaŋa; kono obedo mar nyo adagadaga, pe tye dano mo ma ŋeyo. Dok gin ducu ma pud tye obedo gin ma konnye pe,

² pien kit can acel bipoto i komgi ducu, bipoto i kom jo ma kitgi atir kacel ki i kom jo ma gin lutim maraco, i kom jo mabeco ki i kom jo maraco, i kom jo maleŋ ki i kom jo ma komgi ki keni, i kom ŋat ma tyero gitum ki i kom ŋat ma pe tyero gitum. Can man poto i kom dano maber ma rom aroma ma opoto i kom ŋat ma labalo; ki ŋat ma kwoŋo kwoŋ rom ki ŋat ma lworo kwoŋo kwoŋ,

³ Man aye gin marac ma nen i gin ducu ma tye ka timme i lobo-ni; kit can acel bino pi jo ducu. Dok cwiny dano ducu opoŋ ki gin marac, dok apoya bene tye i cwinygi i kare me kwogi ducu, ka lacen gin bene gito woko.

⁴ Ento ŋat ma oribbe ki jo makwo ducu bedo ki gen, pien gwok makwo ber kato labwor muto.

⁵ Jo makwo giŋeyo ni gibito, ento jo ma doŋ guto woko pe giŋeyo gin mo, dok bene pe doŋ gitye ki bakacic ma gibilimo, dok wi dano wil i komgi woko matwal.

⁶ Pe doŋ gitye ki dul mo ma gibinywako ki jo mukene matwal i tic ducu ma gitye ka tiyone i lobo-ni, pien mar megi ki adagadagagi kacel ki miti ma onoŋo gitye kwede ducu otyeko gik woko licwic.

⁷ Doŋ icit icam kwonni ki yomcwiny, dok imat koŋo vinoni ma noŋo cwinyi yom ata; pien Lubaŋa otyeko pwoyo gin ma itiyo.

⁸ Ruk ginaruka matar kare ducu, ma pe iken wiro wii ki moo bene.

⁹ Bed ki yomcwiny kacel ki dako ma imaro, i mwaka me kwoni ducu ka pud ikwo, ki i ticci ma gimiyi ma iri kwede i lobo-ni, pien meno aye dul ma gipoko boti i kwoni ma konnye pe-ni i ticci ma it ye ka tiyone i lobo.

¹⁰ Kit gin mo keken ma inoŋo oye ciŋi me atiya, ti ki tekki: pien tic nyo tam nyo ŋec nyo ryeko mo doŋ pe i lyel, ka ma ibecito iye-ni,

¹¹ Dok aneno ni ŋat madwir pe loyo ŋwec, ŋat matek bene pe en aye ma loyo lweny, pe ŋat maryek aye ma noŋo kwon ma myero ecam, kadi jo ma tye ki ŋec matut pe gin aye ma ginoŋo lonyo madwoŋ, nyo jo makwiri i tic pe gin aye jo ma gipwoyogi; ento kare kacel ki gumkom poto i komgi ducu.

¹² Dano acel acel pe ŋeyo bino pa nino ma mere. Dano obedo macalo rec ma gimakogi ki obwo pi gum marac, dok calo winyo ma gimoko i owic; dano bene gimakogi ki owic i kare marac, ma tuggi poto i komgi woko oyotoyot.

Ryeko loyo tekkom

¹³ Dok bene aneno kit labol man kit macalo ryeko tye kwede i lobo, ci onen madit mada ki tuŋ bota.

¹⁴ Yam tye gaŋ mo matidi ki jo manok keken ma gibedo iye; ci kabaka mo madit obino omonyo gaŋ meno kun mito mayone woko, ci ocako toro cel lobo matek orumo gaŋ meno woko dyere.

¹⁵ Ento dano ma lacan maryek i gaŋ meno aye ma olaro gaŋ meno ki ryekone. Ento pe tye ŋat mo kadi ki acel ma wiye opo i kom dano meno ma lacan.

¹⁶ Ento awaco ni ryeko loyo tekkom, kadi bed gicayo ryeko pa dano ma lacan ca, dok bene ŋat ma owinyo lokke peke.

¹⁷ Ka iwinyo lok pa ŋat maryek mot laliŋ, ber kato ma ibedo ka winyo lok pa laloc ma daŋŋe kwede adaŋa i kin lumiŋ.

¹⁸ Ryeko ber loyo jami lweny, ento labalo acel keken twero balo lwak jami mabeco mapol at