Latitlok 8 - Acoli Baibul

¹ Aŋa ma calo dano maryek? Dok aŋa ma ŋeyo gonyo tyen lok mo? Ryeko miyo waŋ dano ryeny aryenya, dok miyo colwaŋ me adagadaga ma: en tye kwede lokke.

Lub cik pa kabaka

² Myero ilub gin ma kabaka ociko, dok pi kwoŋŋi maleŋ ma ikwoŋo pe iwek cwinyi oballe woko;

³ pe igalle a woko ki i nyime oyotoyot ka lok doŋ odoko rac, pien kabaka twero timo gin mo keken ma en mito.

⁴ Lok ma kabaka lok loko ki twero, dok aŋa ma twero waco bote ni, “In itimo aŋo?”

⁵ ŋat ma lubo cik pe birwatte ki kit peko mo, dok dano maryek ŋeyo kare, kacel wa ki yo ma myero elubi.

⁶ Kit lok acel acel tye ki karene dok ki yone, kadi bed ayela tye mapek ma obwoyo kom dano woko.

⁷ Dano pe ŋeyo gin ma bitimme i anyim, pi meno aŋa ma twero tito bote kit ma bitimme kwede.

⁸ Pe tye dano mo ma tye ki twero me gwoko tipone, kadi ki twero me geŋo ni en pe eto ka nino me tone oromo; pe watwero nuny ki newa pi lweny man, dok tim maraco bene pe bilaro jo ma gin lutim maraco.

Jo maraco ki jo ma kitgi atir

⁹ Man ducu an aneno kun aporo ki jami ducu ma tye ka timme i lobo, kun dano ma tye ki twero loyo jo mukene ki tek.

¹⁰ Lacen aneno ka giyiko lutim maraco; yam gicito gidonyo i kabedo maleŋ ka gidok woko-gu, ma noŋo dano gipakogi mada i gaŋ ka ma yam gutimo iye tim maraco ma kit meno. Man bene gin ma konnye pe.

¹¹ Lubaŋa pe keto can oyotoyot i kom dano ka otimo gin marac, omiyo dano ducu guketo cwinygi atika pi timo gin marac.

¹² Kadi bed labalo otim gin marac ma romo tyen miya acel kun medo mwaka ma myero eri kwede i lobo, ento an aŋeyo atir ni jo ma gilworo Lubaŋa aye gibibedo maber, pien gibedo ki lworo i nyime;

¹³ ŋat ma latim marac pe bibedo maber wacel, dok bene en calo tipo, pe biri i lobo pi kare malac, pien en pe tye ki lworo i nyim Lubaŋa.

¹⁴ Tye gin ma konnye pe ma tye ka timme i lobo; tye jo mogo ma kitgi atir ma can poto i komgi ma myero opot i kom lutim maraco, dok tye lutim maraco mogo ma ginoŋo gum maber ma oporre pi jo ma kitgi atir. Doŋ awaco ni man bene gin ma konnye pe.

¹⁵ Doŋ aniaŋ maber ni gin ma mitte ma myero dano otim en aye me bedo ki yomcwiny, pien pe tye gin mo maber i lobo kany pi dano, kono camo ki mato mat-gu, ki yomo cwinye macalo etwero, pien man aye gin ma ebiwot kwede i ticce ducu ma etiyo, i kare me kwone ducu ma Lubaŋa omiye i lobo-ni,

¹⁶ Ka aketo cwinya me niaŋ matut i kit yo ma ryeko tiyo kwede, ki dok me neno tic ma dano gitiyo i lobo, kun aneno dano pe miyo wane pi nino i dyeceŋ kadi i dyewor,

¹⁷ ci aneno tic ducu ma Lubaŋa otiyo, aniaŋ ni dano kara pe twero ŋeyo gin ma tye ka timme i lobo. Kadi bed dano mo oyelle ma rom mene me yenyone, pud pe binono; dok kadi bed dano ma laryeko tamo ni eneyo, pe twero noŋone bene.