Latitlok 7 - Acoli Baibul

Ber me ryeko

¹ Bedo ki nyiŋ maber ber kato moo me wel ma ŋwece kur; ki nino me to pa dano, ber kato nino ma ginywale iye.

² Bedo ber me cito i ot ka ma dano tye iye ka kumo pi to, kato ma icito i ot ma giyubo iye karama; pien to aye agikki pa dano ducu, jo makwo gibipo i lok man dok gibiketo cwinygi iye.

³ Cwercwiny ber kato nyero, cwercwiny miyo waŋi nen ki can ento miyo niaŋ matut bot dano.

⁴ Tam pa dano ma ryek rwatte ki tam pa jo ma gitye ka kumo i ot; ento lumiŋ tamgi rwatte ki tam pa jo ma gitye i ot ka ma ginoŋo iye yomcwiny.

⁵ Ka dano owinyo juk pa ŋat maryek ber, kato ma en obedo ka winyo wer pa lumiŋ,

⁶ Nyero pa lumiŋ obedo gin ma konynye pe; cal ki yen okuto ma girwako i mac i te agulu dek, ma waŋ mwoc lirwatrwat.

⁷ Dano maryek ka uno dano, lokke doko ŋat ma lamiŋ, dok gamo lim me wilo dano i muŋ balo tam pa dano woko.

⁸ Agikki me jami ber kato acakkine; dok dano ma diyo cwinye ber kato ŋat ma lawakke.

⁹ Pe myero iwek kiniga omaki oyotoyot; jo ma lumiŋ aye kano kiniga i cwinygi.

¹⁰ Pe myero iwac ni, “Piŋo jami me kare macon mukato ‘aŋec ber makato me kare man !” Peny macalo man nyuto ni ipe ki ryeko.

¹¹ Dano acel acel ma bedo i lobo mito obed ryek, pien ryeko ber macalo ŋom ma dano oleyo ki bot kwarone.

¹² Ryeko twero gwoko dano kit macalo lim gwoko ki ŋat ma tye kwede; ryeko gwoko kwo pa ŋat maryek, man aye ber me bedo ki ŋec.

¹³ Koŋ itam pi tic pa Lubaŋa; aŋa ma twero twenyo gin ma en oketo mugom wek obed atir?

¹⁴ Bed ki yomcwiny i kare ma itye maber, dok i kare ma piny rac ber ipo ni, Lubaŋa aye ma omiyo dano gibedo maber nyo marac, wek dano pe oŋe gin ma bitimme lacen ma noŋo doŋ guto woko.

¹⁵ Anoŋo ni kwona kara konnye pe, ento kono omiyo aneno jami ducu. Dok aneno ni dano ma kite atir to pi leŋcwinye, kun dano marac ma en latim marac bedo ri nakanaka i kom timme marac-ci.

¹⁶ Pe myero ibed dano ma kite atir twatwal, pe bene ikette keni me bedo ryek makato. Piŋo imito nekke woko kekeni?

¹⁷ Dok pe myero ibed dano marac mukato kare, pe ‘ibed lamiŋ bene. Imito ni ito woko piŋo, ma pud peya kareni oromo?

¹⁸ Bedo ber ka imako man, ento mukene-ni, bene pe ikwany ciŋi woko ki iye; pien ŋat ma lworo Lubaŋa kwone bibedo maber i yo aryo-ni ducu.

¹⁹ Ryeko miyo teko bot dano maryek, kato gin ma luloc apar kulu twero tiyo i gaŋ ma gitye iye.

²⁰ Adada pe tye dano mo ma kite atir i lobo man, ma timo gin maber keken ma pe balo.

²¹ Pe icik iti me winyo lok ducu ma dano giwaco, miyo iwinyo lok mogo maraco ma laticci loko me yeto in:

²² in bene iŋeyo ki i cwinyi kekeni ni yam ibedo ka loko lok maraco kun iyeto ki jo mukene pi tyen mapol.

Yenyo ryeko

²³ Atiyo ki ryekona me temo man ducu, kun awacci, “Abibedo ryek”; ento pe atwero, pien ryeko noŋo tye ka mabor kweda.

²⁴ Gin ma doŋ tye, tye ka mabor, dok tye ka matut, ka matut adada; pe tye ŋat mo ma twero niaŋ iye.

²⁵ Aloko tamroa me ŋeyo ki me yenyo ryeko, kun amito aniaŋ ka ma ryeko twero noŋŋe iye, dok me niaŋ tyen lok me jami ducu, ci aniaŋ atir ni tim maraco aye miŋo, ki tim miŋo aye apoya kikome.

²⁶ Dok anoŋo ni tye kit dako mo ma cwinye tye calo owic nyo obwo ma kelo can makato to ma cine obedo calo nyor me tweyo dano. Ŋat ma tiyo gin ma Lubaŋa mito twero bwot woko ki bote, ento ŋat ma labalo aye dako-nu twero makone.

²⁷ Nen, Latit-lok owaco ni, abedo ka noŋo man motmot i kare ma atye ka yenyo tyen lok ducu,

²⁸ ma obedo ka bino i tamma teretere, ento pe amedo ki noŋo gin mo. I kin jo alip acel anoŋo iye laco acel keken aye kite yomo cwinya, ento pe anoŋo dako mo kadi ki acel i kin jo magi ducu.

²⁹ Nen man gin acel keken ma anoŋo ni, Lubaŋa gire onoŋo oketo dano ma cwinygi tye atir, ento dano guyenyo tam mapol mapatpat.