Latitlok 3 - Acoli Baibul

Kit tim acel acel tye ki karene

¹ Kit tim acel acel tye ki karene, dok kit lok mo keken tye ki karene i lobo man:

² Kare ma ginywalo iye dano, ki kare ma en bito iye; kare me pito ginapita, ki kare me puto gin ma gipito-ni woko;

³ kare me neko dano, ki kare me caŋo dano acaŋa: kare me muko ot ki reto woko piny, ki kare me gerone odoco;

⁴ kare me koko, ki kare me nyero; kare me kumo, ki kare me myel;

⁵ kare me bolo got atata, ki kare me gurone kacel; kare me kwako lawoti, ki kare ma pe ikwako iye lawoti;

⁶ kare me yenyo gin mo-ni, ki kare ma jami rwenyo iye arwenya; kare me gwoko gin mo-ni, ki kare me bolone woko;

⁷ kare me yeco boŋo ki kare me kwoyone woko doki; kare me liŋ aliŋa, ki kare me lok;

⁸ kare me maro dano, ki kare me kwero dano akwera; kare me lweny, ki kare me bedo ki kuc.

⁹ Dano ma latic-ci mono noŋo kit magoba aŋo i kom tic ducu ma en otiyo?

¹⁰ Doŋ atyeko neno kit tic ma Lubaŋa omiyo bot dano ma myero gubed ka tiyone.

¹¹ En oketo jami ducu maber i karegi kikome; dok oketo dano me ŋeyo kare mukato anec ki kare ma pud tye anyim, ento kadi kumeno dano pe twero ŋeyo gin ma Lubaŋa otiyo nia i acakki nio i agikki.

¹² Aniaŋ atir ni pe tye gin mo maber pi dano makato kono bedo ki yomcwiny pi kare me kwone ducu i lobo man.

¹³ Dok aniaŋ bene ni man obedo mot ma Lubaŋa omiyo bot dano, kun mito ni dano acel acel myero ocam cam, dok omat mat-gu, dok onoŋ yomcwiny ma a i kom ticce ducu ma en tiyo,

¹⁴ Aŋeyo ni gin mo keken ma Lubaŋa tiyo bedo matwal; pe gitwero medo gin mo iye, dok pe gitwero kwanyo gin mo woko ki i kome. Lubaŋa oketo obedo kit meno, wek omi dano gubed ki lworo i nyime,

¹⁵ Gin ma tye ka timme-ni doŋ yam otyeko timme con; ki gin ma bitimme i anyim bene doŋ otyeko timme woko; Lubaŋa yenyo kit gin acel-lu ma yam otimme, miyo dok timme aye.

Tim ma atir pe tye i lobo

¹⁶ Pe meno keken, anoŋo ni i lobo man ka ma myero tim ma atir obed tye iye inoŋo tim maraco, dok bene ka ma myero dano gubed ki kit ma atir inoŋo tim maraco iye.

¹⁷ Abedo ka lok kekena ki i cwinya ni, Lubaŋa biŋolo kop i kom jo ma kitgi atir kacel ki lutim maraco, pien doŋ otyeko yero kare pi kit lok acel acel, ki pi kit tic ducu.

¹⁸ Abedo ka tamo ki i cwinya ni, Lubaŋa tye ka temo dano atema wek enyut botgi ni kadi bed gin dano ento gin rom aroma ki lee tim,

¹⁹ Can ma poto i kom dano ki gin ma timme i kom lee tim ducu rom aroma; gin ducu gito woko. Gin ducu gimiyogi yweyo me kwo maromrom, dano pe bedo maber makato lee; pien gin ducu konygi pe.

²⁰ Gin aryo ducu gicito i kabedo acel; pien gin ducu gua ki i apwa, dok gibidok iye aye.

²¹ Aŋa ma ŋeyo ka ce tipo pa dano cito malo i polo, nyo ka tipo pa lee donyo piny i nom?

²² Kit meno aniaŋ ni gin maber makato ducu ma dano twero timo en aye me yomo cwinye ki gin ma en olimo ki i ticce ma en otiyo, pien meno aye dul ma gipoko bote. Aŋa ma twero nyutte gin ma bitimme lacen i anyim ma noŋo en doŋ eto woko?