Latitlok 11 - Acoli Baibul

Kit pa dano maryek

¹ Cwal cammi bot jo ma tye loka nam tuŋcel, ibinoŋo iye magoba i ŋe mwaka mapol ma pud tye anyim.

² Pok jamini woko i dul abiro, nyo aboro, pien pe iŋeyo gin marac ma bitimme i lobo,

³ Ka ce kot doŋ opoŋ i pol, ci cwer bino piny i lobo; dok ka ce yat opoto odok tuŋ acuc, nyo tuŋ acam, doŋ kabedo ma yat opoto iye-ni, en aye yat bibuto iye.

⁴ Ŋat ma kuro ni koŋ enen yamo, pe twero coyo kodi i ŋom; dok ŋat ma bedo ka neno mere pol, pe bikayo gin mo.

⁵ Kit macalo pe iŋeyo kit ma latin ma i ot nyodo pa dako dokokwede gin makwo, kumeno bene pe iŋeyo tic pa Lubaŋa ma tiyo jami ducu-ni.

⁶ Co kodini i odiko, dok i otyeno bene kit meno pe ijuk ciŋi ka tic; pien pe iŋeyo mene ma bicek mabup, man nyo maca, nyo ka gwok gin aryo ducu gibibedo marom ci gicek maber.

⁷ Leŋpiny gin maber, neno ceŋ yomo cwiny dano.

⁸ Ka ce dano mo obedo i lobo ori pi mwaka mapol, myero en obed ki yomcwiny pi lwak kare magi ducu; ento wiye myero opo ni nino me colpiny bibedo dwoŋ. Gin ma bino ducu gin ma konnye pe.

⁹ Bed ki yomcwiny i kare me tinoni ma pud in awobi, lub kit gin ducu ma cwinyi mito ki gin ma waŋi oneno. Ento ber iŋe ni pi jami magi ducu Lubaŋa biŋolo iye kop i komi.

¹⁰ Kwany tam me par mapol woko ki i tammi, wek pe ibed ki arem i komi; pien kare me tinoni ki acakki me kwoni gir Ducu konygi pe.