Koko 5 - Acoli Baibul

Lega ni Lubaŋa otim kica

¹ Ai Rwot, koŋ ipo i kom gin ma opoto i komwa-ni; cik waŋi inen lewic ma watye kwede!

² Giloko gipinywa doŋ odoko pa jo mukene; ki gaŋiwa gudoko pa lurok.

³ Waŋ doŋ walokke wadoko calo litino kic, ma wegigi pe; megiwa doŋ gudoko calo mon ma coggi oto,

⁴ Myero wawil pii ma wamato-ni awila ki lim, yen bene ma wanoŋo myero wawil awila.

⁵ Giryemowa woko ki tek kun watye ki okol i ŋutwa: komwa oloc woko, pe gimiyowa kare me yweyo.

⁶ Wacikke ki jo Ejipt ki ciŋwa, ki bot jo Aciria, wek gumiwa cam maromowa.

⁷ Kwarowa yam gubalo, ci guto woko matwal; balgi aye ma doŋ okelo can i komwa.

⁸ Opii aye doŋ giloyowa; ŋat mo pe ma myero olarwa ki i ciŋgi.

⁹ Wadyero komwa pi noŋo cam, ma noŋo wawok ki i Lak pala lucwan i dye tim.

¹⁰ Del komwa doŋ odoko lyet calo keno ki lyeto me kec ma tye ka waŋowa.

¹¹ Gimako mon i Cion ci gibuto kwedgi tektek, ki anyira ma peya co obedo kwedgi ma gitye i gaŋ me Juda.

¹² Giguro luker woko i kom yat ki ciŋgi; woro mo ma gimiyo bot ludoŋo pe,

¹³ Gidiyo litino awobe tektek me rego kai awobe gicato ki yen mapek ma guyeyo i wi gwokgi.

¹⁴ Co muteggi pe doŋ gigurre i dog gaŋ, awobe bene pe doŋ gigoyo wer.

¹⁵ Gin ma yam yomo cwinywa doŋ ogik; myel ma yam wamyelo-ni doŋ olokke odoko kumo.

¹⁶ Lalukana opoto woko piny ki i wiwa’ waŋeno can, pien wabalo!

¹⁷ Pi lok man omiyo cwinywa doŋ odoko goro, pi jami magi omiyo waŋwa bene doŋ ocido wako.

¹⁸ Got Cion ma doŋ odoŋ obur-ri; too aye ma doŋ gitye ka wot i wiye.

¹⁹ Ento in, ai Rwot, ibedo i loc nakanaka; komkerri bedo nakanaka i kare pa yalwak ducu.

²⁰ Piŋo wii wil woko i komwa, ibwotowa woko liyak pi kare ma rom man piŋo?

²¹ In aye giri idwokwa boti, ai Rwot, wek wadwogi! Roc kare me bedowa odok manyen kit macalo yam tye con ca!

²² Gwok nyo doŋ ikwerowa woko matwal ba! Kiniga doŋ omaki i komwa mukato kare?