Koko 4 - Acoli Baibul

Keto can i kom Cion doŋ ocobbe kakare

¹ Jabu kono dok ocido woko licuc niŋniŋ, jabu ma giliyo maber-ri doŋ kite olokke woko niŋniŋ! Godi me ot maleŋ guket woko piny atata; guromo yo woko ducu.

² A wobe Cion, gubedo me wei calo jabu mapek mabeco; kombeddi doŋ ginenogi macalo agulu, tic ma lacwe agulu ocweyo ki lobo!

³ Kadi too bene miyo tuno weko litino doto cak i tunone; ento jona doŋ gudoko ger woko, calo udu ma gibedo i tim.

⁴ Leb latin lakere ma romo dot omoko woko i dane pien doge otwo woko ki orwo pii; litino tye ka lego cam, ento ŋat mo ma miyo botgi pe.

⁵ Jo ma yam camo cam mabeco, gibito woko liweŋ i dye gudo; jo ma ginyebogi ki ruko boŋo ma lamar lamar, gibuto i wi odur.

⁶ Can ma giketo i kom jo tuwa, dit makato can ma giketo i kom Codom woko, ma yam gireto woko piny oyotoyot i waŋ ca wa mo manok keken-ni, kun dano mo pe ogudo kome ki ciŋe,

⁷ Rwodine yam komgi leŋ makato pee woko, komgi tar makato cak; komgi yam kwar makato gweŋ makwar me wel, yam ginen beco calo kidi capir mulil mapwot-ti,

⁸ Ento kombeddi waŋgi ocido woko licuc makato cuk bilo, dano pe gineyogi ka giwok ki i gudo; komgi ojony woko linok i kom cogogi, komgi otwo woko matek calo yen mutwo.

⁹ Jo ma ginekogi ki pala lucwan komgi gum makato jo ma kec aye tye ka nekogi, jo ma gujony linok ma komgi odoŋ geŋ noŋo, pien cam mo pe mucek i poto.

¹⁰ Mon ma lukica ma gimaro litinogi aye gutedo kom litinogi kikomgi; ci gudoko camgi me amwodagi i kare ma gituro iye jo tuwa-ni.

¹¹ Rwot doŋ omiyo akemone olyetti woko marac, ocoro kinigane malyet i komgi; omoko mac i Cion, ma owaŋo te gutine otyeko woko liweŋ,

¹² Luker me lobo yam pe guye, nyo kadi ŋat mo i kin jo ma bedo i wi lobo, ni lumerok nyolukwor twero donyo i dog gaŋ me Jerucalem.

¹³ Man obedo pi bal pa lunebine ki pi bal pa ajwagine, ma guneko jo ma kitgi atir woko i dye gaŋ,

¹⁴ Gubedo ka wot ata i dye gudo, ma waŋgi oto woko, gunyobo komgi woko ki remo, omiyo i dano doŋ dag gudo boŋŋigi ma odoko gin me kwer.

¹⁵ Dano gidaŋŋe i komgi kun giwacci, “Wulenwa yo! Wun jo ma komwu ki keni!” “Wulen yo! Wulen yo! Pe wugud komwa bene!” Guriŋo woko gubwot, gubedo ka mal ata i kin lurok, ci jo ma i rok guwacci, “Pe dok gibibedo kacel kwedwa kany wacel.”

¹⁶ Rwot kikome aye ma doŋ okeyogi woko, pe doŋ biparo pigi matwal; deyo mo ma gimiyo bot ajwagi bene obedo pe, gin mo maber ma gutimo bot ludoŋo pe.

¹⁷ Waŋwa ocikke ka neno yo neno kun jo ma konyowa pe; wabedo ka kuro rok ma pe gitwero larowa.

¹⁸ Lumerok doŋ gudiŋo korwa woko omiyo pe doŋ watwero woto i dye gudowa; agikkiwa onoŋo doŋ onyikocok: wel ninowa bene doŋ gikwano woko; pien agikkiwa doŋ oo.

¹⁹ Jo ma guryemo korwa gubedo dwir ma gikato acut ma tuk cito malo, gulubo korwa wa i wi godi, gukanne gubedo ka kiyowa i dye tim.

²⁰ Ŋat ma Rwot doŋ owiro woko ki moo, ma pire tek botwa macalo kwowa, gimako gitere woko i opii, en ma yam waloko pire ni, wabibedo i te bwome i kin lurok.

²¹ Wun jo Edom, wubed ki wakke, cwinywu bene obed yom, wun ma wubedo i lobo Uj; ento kikopo me can bene bimakowu; wubimer woko ci wulunyo bonniwu woko wudoŋ munero.

²² Wun jo Cion, can ma giketo i komwu pi balwu doŋ gicobo kakare, Rwot doŋ pe bibworowu i opii matwal; ento wun jo Edom, en biketo can i komwu bene pi balwu, en binyuto kom balwu woko ducu ka maleŋ.