Koko 3 - Acoli Baibul

Gen pi kony ma Lubaŋa bimiyo pi kicane

¹ An aye dano ma oneno can twatwal pien awinyo arem ma ogoya kwede ki akemo;

² Oryema woko otera i colpiny ka ma leŋo pe iye.

³ Adada en bedo ka pwoda, pwoda dok pwoda dyeceŋ jwi.

⁴ En omiyo riŋo koma ki del koma oballe woko, oturo cogona woko bene.

⁵ Omonya ci ogura woko dyere, ma cwinye kec ki can ma mito keto i koma.

⁶ Oketa abedo i colpiny, calo dano muto yam wa con.

⁷ Ocweyo cel oruma kwede woko dyere wek pe alwi akat woko abwot pi laro kwona; otweyo okol i tyena ki nyor mapek adada.

⁸ Kadi bed alwoŋ lwoŋo ma kun akok ni gikonya, en juko legana woko pe winnye.

⁹ Otyeko cego yona woko ki godi ma gipayo, omiyo yona obedo mugomogom.

¹⁰ Obedo calo ŋuu ma obuto tye ka kiyo piny, calo labwor ma okanne woko.

¹¹ Opeya woko ki i yona ci okila woko matitino, omiyo doŋ adoko gin ma konnye pe.

¹² Otelo atumme, okema kwede omiyo adoko ginacela ki aterone.

¹³ Ocelo adunona woko ki atero ma okwanyo ki i jurone.

¹⁴ Doŋ adoko ginanyera pa lwak me rok ducu, nyiŋa odoko lok aboka dok giwera ki wer dyeceŋ jwi.

¹⁵ Omiya apon ki keccwiny madit mada, omiyo ayeŋ ki odir yat.

¹⁶ Omiyo amwodo kweyo ki laka, kun anyonne woko ki buru.

¹⁷ Gikwanyo kuc woko ki i cwinya, wiya doŋ owil woko i kit ma yomcwiny tye kwede.

¹⁸ Omiyo awacci, “Deyona doŋ otum woko, ki gin ma ageno ki bot Rwot bene pe doŋ otimme.”

¹⁹ Po i kom canna ki keccwinya, ki camo odir yat ki keda makec!

²⁰ Cwinya nino ducu tamo pire, ci ŋur woko piny ki iiya.

²¹ Ento abekaoo lokke iiya, pi meno miyo dok pud abedo ki gen.

²² Mar pa Rwot ma pe lokke bedo matwal pe gik, ki kicane bene pe gik.

²³ Giroc gidoko nyen rupiny ki rupiny; in igenne mada.

²⁴ Awaco ki i cwinya ni, “Rwot aye dul ma gipokka, pi meno abigeno en.”

²⁵ Rwot ber bot jo ma kure, ki bot dano ma yenye ki i cwinye.

²⁶ Bedo ber ka dano kuro lar pa Rwot mot.

²⁷ Bedo ber ka dano oye juk pa Rwot ma noŋo pud en tidi.

²⁸ Wek obed kene laliŋ ka giwacce lok me juk;

²⁹ wek omok apwa ki doge, gwoknyo gen pud bibedo tye:

³⁰ wek olok leme bot ŋat ma odoŋe, wek oyeŋ ki lewic madwoŋ.

³¹ Pien Rwot gire pe bolo dano woko matwal,

³² ento kadi bed kel cwercwiny me can, pud kica mako aye macalo mar mere ma pe lokke dwon-ni;

³³ pien pe keto can nyo cwercwiny i kom dano akaka,

³⁴ Ka ginyono lumabuc ma i wi lobo woko ducu piny i te tyen,

³⁵ ka gikwanyo twer ma dano tye kwede woko i nyim ŋat Mamalo Twal,

³⁶ ka gibalo te pido pa dano woko akaka, Rwot pe cwinye yom iye,

³⁷ Aŋa muciko lok ci otimme bene, ka pe Rwot aye ma ociko?

³⁸ Gin maber ki gin marac ducu pe gia ki i dog ŋat Mamalo Twal?

³⁹ Dano makwo kok piŋo? Dano myero okok ka can opoto i kome pi balle?

⁴⁰ Koŋ watemu neno kitwa dok waŋiyu kwowa, ci walokke wadwog bot Rwot.

⁴¹ Myero watiŋu cwinywa ki ciŋwa, bot Lubaŋa malo i polo kun wawacci,

⁴² “Waŋ doŋ wabalo dok wajemo, in bene pe iweko bal wa.

⁴³ “Imiyo kiniga oboyo komi woko omiyo iryemo korwa, inekowa woko laboŋo paro piwa,

⁴⁴ Imiyo pol oboyi woko wek lega mo pe otuc oo boti,

⁴⁵ Imiyo wadoko ginanyera ma gitaro, i kin lurok ducu.

⁴⁶ “Lukworwa ducu doŋ gitye ka ŋalowa aŋala;

⁴⁷ gin ma bano dano ki lworo opoto i komwa kacel ki to-piny ma obino ka tyekowa.

⁴⁸ Pig waŋa mol calo pii ma i kulu pien jona doŋ ginekogi woko matwal.

⁴⁹ “Pig waŋa bibedo ka mol ma pe cok, bimedde mere ameda,

⁵⁰ nio waŋ ma Rwot oneno piny ki i polo;

⁵¹ waŋa miyo aneno piny ki can, ki keckom pa anyira ducu ma i gaŋŋa,

⁵² “Lukworra gibedo ka dwara macalo gidwaro winyo, kun tyen lok mo mumiyo gidwara pe;

⁵³ gibola woko makwo i bur, dok gubolo got woko i wiya;

⁵⁴ pii omwonyo wiya woko, omiyo awacci, ‘Ato do!’

⁵⁵ “Ai Rwot, alwoŋo nyiŋi, ki i bor piny ka matut;

⁵⁶ ci iwinyo koko na ma akok boti ni, ‘Pe idiŋ iti ka winyo kokona, kenya do!’

⁵⁷ Yamibino cok i kare maakok boti; in iwacca ni, ‘Pe ilwor!’

⁵⁸ “In doŋ icuŋ ka pido pira, ai Rwot ci ikoko kwona ki i to.

⁵⁹ Ai Rwot, in bene doŋ ineno gin marac ma gitimo i koma; in aye iŋol koppa.

⁶⁰ Ityeko neno culo kworgi ducu; lok ducu maraco ma gubedo ka porone i koma.

⁶¹ “Ai Rwot, iwinyo bene lok aŋec ma giloko, ki lok ducu maraco ma gubedo ka porone i koma,

⁶² Lok ki tam ma lulweny i koma gubedo kwede, gilwenyo i Koma dyeceŋ jwi.

⁶³ Nen kit bedogi ki kit a malogi; adoko gin ma gicako wer i kome.

⁶⁴ “Ai Rwot, in aye ma ibiculo kwor i komgi, kun lubo kit ma ticgi tye kwede.

⁶⁵ Ibimiyo cwinygi bedo tek; ibicenogi woko.

⁶⁶ Ibiryemo korgi ki kiniga ci ityekogi woko, ki i te poloni, ai Rwot.”