Kocea 8 - Acoli Baibul

Jo Icrael wuwek woro cal jogi

¹ Wukut gwara! Pien acut tye malo i wi ot pa Rwot; pien guturo gicikkena, gukalo wi cikka.

² Gikok bota ni, “Lubaŋawa, wan jo Icrael waŋeyi.”

³ Icrael doŋ obolo gin maber woko, lumerok doŋ biryemo kore.

⁴ Guketo lukergi laboŋo twerra, guketo rwodigi laboŋo ŋecca. Gutiyo cal jogigi ki ryal ki jabugi; gutiyo gin ma neko gin kikomgi.

⁵ Abwono latin twonni, in Camaria. Kinigana otedde i komgi calo mac. Jo Icrael bitero kare ma rom mene kaa ka doŋ gibibedo laboŋo bal?

⁶ Gibiŋido latin twon me Camaria woko matitino, pien ladiro tic otiyo gin ma pe Lubaŋa kikome.

⁷ Pien gucoyo yamo, miyo gikayo lapiru. Kal ma i poto pe oŋok, moko pe bia iye; ka nene mogo ocek, kono lurok guyako woko ducu.

⁸ Icrael doŋ gimwonyo woko; gin doŋ gitye i dye lurok, macalo gin ma konnye pe.

⁹ Pien Icrael ocito wa i Aciria macalo kana me tim ma woto kene; Epraim owilo meye ki lim.

¹⁰ Kadi bed guwilo mecgi i kin lurok, abidwokogi woko oyotoyot. Bimiyo koŋ giweko wiro kabakagi ki rwodigi ki moo pi kare mo manok.

¹¹ Pien jo Epraim gunyayo lwak keno tyer mapol pi tiyo bal, omiyo keno tyergi odoko gin me tiyo bal.

¹² Kadi kono aco cikka alip apar botgi, gibineno macalo gin ma welo.

¹³ Gimaro gitum; gin gitumo lee pi camo riŋone; ento cwiny Rwot pe yom komgi: I kare man Rwot bipo pi timgi maraco-ni, biketo can i komgi pi bal megi; gibidok cen wa i Ejipt,

¹⁴ Pien Icrael wiye doŋ owil woko i kom ŋat mucweyo en, ocako gero gaŋ kal madoŋo; Juda ogero gaŋi mony mapol ma girumogi ki cel gogo; ento abicwalo mac i kom gaŋi mere, ci biwaŋo gaŋi mony maditone woko ducu.