Kocea 5 - Acoli Baibul

Can i kom Icrael pi a woko ki bot Lubaŋagi

¹ Wuwiny lok man, wun ajwagi pa Lubaŋa, wuket cwinywu, wun ot pa Icrael. Wucik itwu, wun ot pa kabaka. Pien kop ma giŋolo otiko komwu; pien wun wubedo owic i Mijpa, ki obwo ma giciko i wi Tabor.

² Gikwinyo bur matut i Citim, ento abiketo can i komgi ducu.

³ Aŋeyo Epraim, Icrael pe okanne ki bota. In Epraim kombeddi idoko latim kwele, Icrael bene doŋ oballe gire woko.

⁴ Tim megi genogi dwogo bot Lubaŋa; pien cwinygi me timo kwele doŋ tye i igi, genogi ŋeyo Rwot.

⁵ Wakke pa Icrael odoko caden ma tye i nyime; Epraim bitwomme pi balle; Juda bene binywako twomme kwedgi.

⁶ Gibiwoto ki romi ki dyaŋigi me gitum pi yenyo Rwot, ento pe gibinoŋo kome; pien Rwot doŋ otyeko a woko ki botgi.

⁷ Gin pe gubedo lugen bot Rwot, pien ginywalo litinogi ki lurok ata. Koni por dwe binekogi woko, kacel ki pottigi ducu.

⁸ Wukut bi la i Gibea, wukut gwara i Rama. Wugo oduru i Bet-awen; komi omyel, in Benjamin!

⁹ Epraim bidoko obur i nino ma giketo can i kome. Anyuto lok me ada ma bitimme i kin kaka ma i Icrael ducu.

¹⁰ Luker me Juda gubedo macalo jo ma gikobo got ma poko wan lobo; abicoro kinigana i komgi macalo pii.

¹¹ Epraim doŋ gidiyo matek, pe giŋolle kop kakare, pien otyeko mine ka lubo kor gin ma konnye pe.

¹² Pienno adoko calo nyenye ma naŋo kom Epraim, dok abedo calo tut ma camo ot pa Juda.

¹³ Kare ma Epraim oneno twone, kit ma Juda bene oneno wan burre-ni, omiyo Epraim owoto wa i Aciria, ci ocwalo kwena bot kabaka madit. Ento en pe twero caŋowu, kadi ki bur mewu bene pe twero caŋo.

¹⁴ Pienno abibedo macalo labwor bot Epraim, dok abibedo macalo latin labwor i kom ot pa Juda. An, an kikoma aye abikilo komwu woko, ka doŋ abiwot gira; abitinowu woko, ŋat ma bilarowu pe.

¹⁵ Abidok gira i kabedona, nio waŋ ma guniaŋ balgi ka doŋ gicako yenyo koma, gibiyenyo i kare ma gitye i can, kun giwacci,