Kocea 4 - Acoli Baibul

Da pa Rwot i kom Icrael

¹ Wuwiny lok pa Rwot, wun jo Icrael; pien Rwot tye ki da i kom jo ma bedo i lobo man; pien ada pe, mar pe, ki ŋec mo i kom Lubaŋa bene pe i lobo.

² Gin ma tye en aye kwon, goba, nek, kwalo kwo ki timo abor;

³ Pi meno lobo tye ka kumo, jo ducu ma bedo iye komgi oloc woko, ki lee tim bene, kacel ki winyo me polo; wa rec me nam bene guto woko.

⁴ Ento dano mo pe okel lok me da, dano mo pe odot lawote pien in aye ŋat ma ada kwede, in ajwaka.

⁵ Ibitwomme dyeceŋ, lanebi bene bitwomme kwedi, dyewor, dok abineko meni woko,

⁶ Jona gitye ka to pi ŋecgi manok, pien in ikwero bedo ki ŋec, omiyo akwero ni pe ibed ajwakana. In wii owil woko i kom cik pa Lubaŋani, an bene wiya biwil woko i kom litinoni.

⁷ Ka wei ajwagi omedde mapol, ci gimedde ki bali koma; abiloko deyogi doko me lewic,

⁸ Giloko bal pa jona doko camgi, kun cwinygi yom kom roc pa jona.

⁹ Abimiyo ajwagi bedo calo dano ata; abiketo can ikomgi pi kitgi, abiculogi pi timgi.

¹⁰ Gibicam, ento pe gibiyeŋ; gibitimo kwele, ento pe gibinya; pien guweko Rwot woko, pi miyo kwogi i tim kwele.

¹¹ Koŋo vino ki koŋo vino maliŋonc, rwenyo tam pa dano.

¹² Jona gicito ka penyo dog kac, odoogi aye nyuto botgi lok. Pien cwiny me kwele omiyo guŋak woko, omiyo guweko Lubaŋagi pi timo tim kwele.

¹³ Gitumo gitum malo i wi godi, giwaŋo gitumgi i wi cere malo, i te kworo, atega ki olwedo, pien tipogi ber, Pi meno mumiyo anyirawu gitimo kwele, ki anyira gerwu gitimo abor.

¹⁴ Pe abiketo can i kom anyirawu ka gitimo kwele, kadi i kom anyira gerwu ka: gitimo abor; pien co kikomgi gitye ka nywako yo ki lukwele, dok gitumo gitum-gu kacel ki malaya me ot jogi. Rok ma pe giniaŋ, pinygi bito woko.

¹⁵ Kadi bed in, Icrael, itimo kwele, pe Juda odok labal. Pe wudony i Gilgal, pe wuwot i Bet-awen, pe bene wukwon ni, “Macalo Rwot tye ma kwo-ni.”

¹⁶ Icrael bene lapele; calo roya ma lapele, Rwot tika kombeddi twero pitogi, macalo latin romo ma gikwayo i olet malac-ci?

¹⁷ Epraim oribbe ki cal jogi, wek doŋ obed gire.

¹⁸ Gin lwak ma lumero, komgi mit ka timo kwele; gimaro lewic makato deyogi.

¹⁹ Yamo oboyogi woko i bwome, lewic bimakogi pi keno tyergi.