Kocea 2 - Acoli Baibul

Mar pa Rwot i kom jone ma pe genne

¹ Wuwac bot ominwu ni, “Ammi,” ki bot laminwu ni, “Rukama.”

² “Wupyem ki minwu, wupyem kwede, pien en pe dakona, an bene pe a cware, wek okwany tim kwele woko ki i waŋe, dok okwany abor woko ki i kin tunone.

³ Ka pe kumeno, abimiyo kome doŋ munero abimiyo en bedo noŋo macalo i nino ma yam ginywale iye; abiloke doko calo tim, abimiye bedo calo lobo mutwo, abineke woko ki orwo pii.

⁴ Pe abitimo litinone kica, pien gin litino me kwele.

⁵ Pien mingi obedo lakwele, pien oyac pi timo tim me lewic. Pien owacci, ‘Abilubo kor meya, ma gimiya kwonna ki piina, yer romona, pambana, moona ki ginamatana.’

⁶ Pi meno abicelo yone woko ki okuto, abigero cel arume kwede woko wek pe onoŋ yo wotte.

⁷ En biryemo kor meye, pe bimakogi i waŋayo; en biyenyogi, ento pe binoŋo komgi. Lacen en biwacci, ‘Abilokke, adok bot cwara mukwoŋo ca, pien onoŋo abedo maber makato ma kombeddi.’

⁸ En yam pe oneyo ni an aye amiye kai, ki koŋo vino ki moo, pe oniaŋ ni an aye amiyo ryal onya bo te, ki jabu ma gitiyo kwede bot jok Baal.

⁹ Pi meno ka kare biromo abitwonne ki kaila, ki koŋo vinona ka kare oromo; abikwanyo yer romona ki pambana, ma onoŋo oumo nyime ma tye munero-ni.

¹⁰ Koni abimiyo en moyo timme me lewic i nyim meye, ŋat mo pe bilare ki i ciŋa.

¹¹ Abimiyo yomcwinye gik woko, ninone madito, por dwe, ki cabitte, ki nino madito ducu ma yam aciko pigi,

¹² Abibalo olok ki odurone, ma en loko i komgi ni, ‘Magi aye motta ma meya gumiya.’ Abilokogi gidoko buŋa, lee tim bicamogi woko.

¹³ Abiketo can i kome pi nino madito pa Baal, ma en waŋo iye odok eceta botgi, kun rukke maber ki agit ki tiko ŋut me wel-gu, ka lubo kwede kor meye, kun wiye wil woko i koma, man lok pa Rwot kikome.

¹⁴ “Pi meno, nen, abibite mot, ci abitere woko wa i tim, kun adweko ki lok mamit.

¹⁵ Abimiye poto olokke ki kunnu, abiloko nota Akor doko doggola me gen. Ci en bidokka iye ki kunnu kit ma yam en loko kwede ka tinone, ma rom ki lok ma oloko ma onoŋo a ki i lobo Ejipt.

¹⁶ “I nino meno, man lok pa Rwot kikome, ibilwona iye ni, ‘Cwara,’ pe dok ibilwoŋa ni, ‘Baal mera.’

¹⁷ Pien abikwanyo nyiŋ Baal woko ki i doge, dano pe gibilwoŋo nyiŋgi matwal.

¹⁸ Dok i nino meno abiketo gicikke piwu kun acikke ki lee tim, kacel ki winyo me polo, ki gin ma lak alaka i ŋom; dok abijuko atum, ki pala lucwan, kacel ki mony i wi lobo, wek ami wubut piny ki kuc.

¹⁹ Abinyomi ibedo mera matwal; abinyomi atir, ki lencwiny, ki mar ma pe lokke, kacel ki kica.

²⁰ Abinyomi ki gen ma pe lokke, dok ibiŋeyo Rwot.

²¹ “I nino meno, man lok pa Rwot kikome, abidok iye bot polo ki polo bidok iye bot lobo;

²² ki lobo bidok iye bot kai, ki bot koŋo vino, ki bot moo, ci gin gibidok iye bot Jejreel;

²³ ci an ki koma aye abicoyo kodine piny i lobo. Abitimo kica ki Lo-rukama abiwaco bot Lo-ammi ni, ‘Wun jona;’ en biwacci, ‘In Lubaŋana.’ ”