Kocea 14 - Acoli Baibul

Giciko Icrael me dok bot Rwot

¹ In Icrael, doŋ idwog bot Rwot Lubaŋani, pien doŋ itwomo tyeni pi balli,

² Wuwot ki lok me dogwu, wudok bot Rwot; wuwac bote ni, “Kwany balwa woko ducu; gam motwa maber-ri, wek wacul waŋ balwa ki lok ma i dogwa,

³ Aciria pe bilarowa, pe wabirino ki aguragura; pe doŋ wabiwaco ki tic me ciŋwa ni, ‘Wun Lubaŋawa.’ Latin kic noŋo kica ki boti.”

⁴ Abimiyo niyegi magoro-ni doko tek, abimarogi pi bercwinya, pien kinigana doŋ oa woko i komgi.

⁵ Abibedo macalo toyo bot jo Icrael; en bituru macalo leŋa bicwalo lwite piny macalo atega.

⁶ Bilot, ci jany, bibedo ber macalo jeituni, dok ŋwece bibedo kur macalo ŋwec Lebanon.

⁷ Gibidwogo ci gibibedo i te tipona, gibinywal macalo kal ma i poto; gibituru calo olok, ŋwecgi bibedo makur macalo ŋwec koŋo vino me Lebanon.

⁸ In Epraim, cal jogi konyi ki gin aŋo kaa? An keken aye ma agamo dogi, dok an aye agwoko in. An abedo calo yat ciprec ma pote pe ner; an aye amiyo nyak.

⁹ Ŋat ma ryek biniaŋ lok magi; dano ma cwinye lwodo lok aye bineyogi; pien yo pa Rwot ducu tye atir, jo ma cwinygi atir aye gilubo yone, ento jo ma gikalo wi cik pa Lubaŋa gitwomo iye tyengi.