Kocea 13 - Acoli Baibul

Gitito pi tyeko jo Epraim

¹ Epraim ka yam oloko, kom dano myel; Epraim yam dit matek i Icrael; ento en okelo bal i kome pi jok Baal, ci oto woko.

² Kombeddi balgi doŋ tye ka medde ameda, gitye ka tiyo gigi cal ryal ma giliyo pigi kengi, kun gitiyo lwak cal jogi ki diro; magi ducu obedo tic pa ludiro, Gin guwaco ni, “Wutum gitum bot jogi magi.” Dano gunot lem latin twon dyaŋ!

³ Pi meno gibibedo calo lupu ma poto odiko, calo toyo ma o woko oyotoyot, calo cuŋ kal ma yamo kolo woko ki i laro, onyo yito ma duny ki i wan dirica.

⁴ An a Rwot Lubaŋani, nia wa ki i lobo Ejipt; pe tye Lubaŋa mukene ma iŋeyo, kono an keken, lalar mo mukene pe tye, kono an keken.

⁵ An aye yam aneyowu wa ki i tim, i lobo ma can pii dwoŋ iye.

⁶ Ento i kare ma gicamo giyeŋ, ka guyeŋ, ci cwinygi ocako wakke matek; omiyo wigi ocako wil woko i koma.

⁷ Abilokke botgi adoko macalo labwor, dok abibedo ka kiyogi i ŋet yo macalo kwac.

⁸ Abipoto i komgi macalo ŋuu mager ma litinone gineko woko, abiyeco korgi adado woko, abimwodogi ki kunnu macalo labwor; kit ma lee tim twero kilo ki komgi.

⁹ In Icrael, abityeki woko; aŋa ma bikonyi?

¹⁰ Kabakani doŋ tye kwene, ma romo lari; rwodini ducu gitye kwene ma lucundwarri, jo ma nene iwaco pigi ni, “Miya ka baka ki rwodi”?

¹¹ Cen amiyi luker ki kiniga, ka dok akwanyogi woko ki akemona.

¹² Bal pa Epraim maraco ducu gicoyo woko piny, balle doŋ gikano woko.

¹³ Arem macalo me nywalo latin doŋ opoto i kome, ento en latin ma pe ryek; pien i kare-ni obuto ari, wiye pe otikke ki yo nyodo.

¹⁴ Myero alargi ki i twer me Lyel? Abikokogi woko ki i dog to? In lo, two gemoni tye kwene? In Lyel, to-pinnyi kono tye kwene? Kica doŋ pe maka i komgi.

¹⁵ Kadi bed en nya matek macalo lagada, yamo oro ma Rwot ocwalo bibino ki i tim, ci waŋ piine ma gunnye-ni bitwo woko ki itte bene bidwono woko; yamo bimayo jamine mabeco ducu ma yam yomo cwinye, ma onoŋo okano-ni,

¹⁶ Camaria bineno can pi bane, pien en ojemo woko i kom Lubaŋane’ pala lucwan aye binekogi woko, litinogi gibijwatogi woko piny, ginyotogi woko, ki mongi ma giyac gibiryeko igi woko.