Kocea 12 - Acoli Baibul

¹ Epraim kwayo yamo ma ka dyegi, leko kor yamo ma tuŋ wok ceŋ dyeceŋ benebene; ticgi me nyayo goba ki tim bwami; gicikke ki jo Aciria, dok gitero moo wa i Ejipt.

² Rwot tye ki lok i kom Juda, en biketo can i kom Yakobo ma poro kite, dok bicule ma rom ki tim mere,

³ Kare ma en tye i ic, omako opuny tyen ominne, ka doŋ oteggi, olwenyo ki Lubaŋa.

⁴ Olwenyo ki lamalaika, ci oloyo, obako doge bot lamalaika ki pig waŋe. Dok orwatte ki Lubaŋa i Betel, Lubaŋa ocako lok kwede ki kunnu.

⁵ En Rwot Lubaŋa me mony, ma nyiŋe Rwot, owacci,

⁶ “Pi meno in doŋ idwogi, Lubaŋani tye ka konyi, mok i kom mar ki ŋolo kop atir, kun ikuro Lubaŋani kare ducu.”

⁷ En lacat-wil ma tye ki mijan ma pe pimo kakare, en maro bumo dano.

⁸ Epraim owacci, “Nen an lalonyo, anoŋo limma gira ki wiya”; ento lonyone pe romoculo balle ma obalo-ni.

⁹ An a Rwot Lubaŋawu, nia wa ki i lobo Ejipt; abimiyo doki wubuto i kema, macalo i kare me kwero nino madito ma aciko.

¹⁰ Yam aloko bot lunebi, an aye ma amiyo ginanyuta onya madwoŋ, dok amiyo carolok katti ki bot lunebi.

¹¹ Ka ce bal mo tye i Gilead ci gibitum woko ducu ada; ka ce gityero twoni me gitum i Gilgal, keno tyergi bene bidoko calo gweni ma giguro i poto ma gipuro.

¹² Yakobo yam oriŋo ocito wa i lobo Aram, Icrael con otiyo tic kunnu pi nyomo dako, en yam okwayo romi wek enon dako.

¹³ Rwot yam omiyo lanebi okwanyo Yakobo woko ki i Ejipt, dok omiyo lanebi ogwoke.

¹⁴ Epraim doŋ oŋeto cwiny Rwot matek; omiyo Rwotte biweko remo balle bedo i wiye, dok bidwoko cacce ducu i wiye.