Kocea 11 - Acoli Baibul

Lubaŋa oparo jone

¹ I kare ma Icrael pud latin, onoŋo amare, yam alwoŋo woda nia ki i Ejipt.

² Ka yam amedde ki lwoŋogi gin bene gimedde ki a woko ki bota; gubedo gigi ka tumo gitum bot jok Baal, kun bene giwaŋo odok eceta bot cal jogi.

³ Kun kono an aye cen apwonyo jo Epraim ki wot, yam atiŋogi i kora; ento pe guŋeyo ni an aye acaŋogi.

⁴ Yam abedo ka telogi ki tol, ki twon mar madwoŋ ma atweyogi kwede, Dok abedo ka tiŋogi macalo latin, ma abolo i wi gwoka, kun akulle piny botgi ka pitogi,

⁵ Gibidok woko wa i lobo Ejipt, Aciria aye bibedo kabakagi, pien gukwero dwogo bota.

⁶ Pala lucwan bilweny i kom gaŋigi ducu, bitoŋo rii doggola me dog celgi woko, dok bene binekogi woko ki i cel gogogi.

⁷ Jo mera doŋ gumoko tamgi me a woko ki bota; pi meno gibiketogi woko i kol, pe tye dano mo ma bigonyogi.

⁸ Atwero weki woko, in Epraim? Atwero miyi bot ŋat mukene niŋniŋ, in Icrael? Atwero miyo idoko calo Adma niŋniŋ? Abitimo in macalo Ceboim niŋniŋ? Cwinya doŋ odwogo woko i komi, iya doŋ okwe woko pi mari.

⁹ Pe doŋ abitic ki kiniga malyet, pe dok abineko Epraim atyeko woko; pien an Lubaŋa, pe a dano, an a ŋat Maleŋ i kinwu, pe abibino pi tyekowu woko.

¹⁰ Gibilubo kor Rwot, ci en bimor macalo labwor; eyo, en bimor, litinone gibibino gia ki tuŋ potoceŋ ma komgi myel;

¹¹ gibia ki i Ejipt gibino ma komgi myel calo winyo, dok gibia ki i Aciria macalo amam, ci abidwokogi wa i pacogi, man lok pa Rwot kikome.

Gijuko Epraim pi goba ki pi timo jo marac

¹² Epraim doŋ ogura dyere ki gobane, dok ot pa Icrael obedo ka bwola abwola. Ento Lubaŋa pud ŋeyo Juda, ni en pud tye ka geno Ŋat Maleŋ.