Kabakuk 3 - Acoli Baibul

Lega pa Kabakuk bot Rwot

¹ Lega pa lanebi Kabakuk.

² Rwot, atyeko winyo pi gin ma itiyo, tic ma itiyo omiya lworo ki myel kom. Dok iti aye i karewa tic madito ma yam ibedo ka tiyogi i kare mukato, wek ticci onene i dye mwaka ducu; bed lakica kadi bed kiniga maki.

³ Lubaŋa obino ki i Teman, Ŋat Maleŋ oa ki i wi got Paran. Deyone oumo pol woko, derone oryeny oromo lobo ducu.

⁴ En bino ma ryeny calo ceŋ, derone wil a ki i ciŋe; en kano twerone kunnu.

⁵ En cwalo two gemo i nyime, ka ociko to me lubo kore.

⁶ I kare ma ocuŋ, lobo oyeŋŋe; ka oneno piny, rok ducu guket woko ata; lacen godi ma ri nakanaka gumuk woko liweŋ, ki cere ma bedo matwal gidik gidonyo piny, ki i yo ma en yam woto iye i kare macon.

⁷ Aneno kema pa jo Kucan tye ki can’ boŋo kicika pa jo Midian gubaŋŋe woko ducu.

⁸ Rwot, akemo mono onoŋo omaki i kom kulu, kinigani onoŋo tye i kom kulu? Gwok nyo ibedo ki akemo i kom nam ba, i kare ma irino ki aguragurani, ki i wi gadigadini me kelo loc bot joni?

⁹ Doŋ ityeko telo atummi me celo piny, dok juruni opoŋ ki atero madwoŋ. Imiyo kulu obaro i lobo opoko woko.

¹⁰ I kare ma godi guneni, guyeŋŋe matek, pii ocako mol ki lalele marac twatwal; pii matut ma i te lobo omor matek, wa biamwonyme ducu oille malo adada.

¹¹ Ceŋ ki dwe gucuŋ mot i kabedogi pi dero me ateroni ma doŋ ibayogi, ki wil pa tonni ma ryeny twatwal-li.

¹² Iwoto i dye lobo ki akemo magwa, dok inyono rok woko piny ki kiniga.

¹³ Icito ka lweny pi laro lwakki, ki pi laro kabakani ma iwiro. Ininyo latel wi jo maraco woko, kun iweke odoŋ munero cakke ki i eme o wa i ŋute.

¹⁴ Icobo wi lulwennye woko ki jami lwennyi, ma onoŋo gubino macalo yamo lapiru ma gimito keta woko, gupoŋ ki yomcwiny madwoŋ ma gimito neko lucan woko i muŋ.

¹⁵ Inyono nam ki aguragurani, kun iŋolo ki i dye pii matek ma gunnye agunya.

¹⁶ Ka awinyo man, ci koma omyel marac, del doga bene omyel pi morre. Cogona ducu oŋo odoko pii keken, noŋo tyena myel amyela ka awoto. At ye ka kuro nino me can mot en nino ma bibino i kom jo ma gulwenyo i komwa-ni.

¹⁷ Kadi bed yat oduro pe gituru, ki olok bene pe ginyak, dok yat jeituni bene pe twero ceko ginmo potti ducu pe doŋ ceko cam, kadi bed romi ma i dwol gityekogi woko ma dyaŋi bene doŋ pe i dwol,

¹⁸ pud abibedo ki wakke pi Rwot, abinyatte ki yomcwiny madwoŋ pi Lubaŋa lalarra.

¹⁹ Lubaŋa, ma en Rwot, aye tek mera; en miyo tyena bedo yot calo tyen til, en bigwoka ka awoto i wi cere-gu.