Kabakuk 2 - Acoli Baibul

Rwot ogamo lok pa Kabakuk

¹ Abicuŋ i kabedona kun akiyo, abiito malo i wi lubele, abikuro wek anen gin ma Rwot bitito bota, ki gin ma abidok iye bote ma kemo ŋurona.

² Rwot omiya lagam man ni, “Co gin ma ineno; co maber i kom got ma apada ma twero kwanne bene, wek ŋat ma okwano oniaŋ oyotoyot.

³ Ginanyuta man tye kuro kare ma Rwot ociko; en ginanyuta me ada, kare me cobone doŋ cok, tye ka wot oyotoyot mada. Kadi bed nen ni bino motmot, bed ikur; kare man bibino ada, pe dok bigalle.

⁴ Nen, ŋat ma pe cwinye atir pe bikwo, ento ŋat ma kite atir bibedo kwo pi niyene i kom Lubaŋa, Can ma bipoto i kom jo ma pe kitgi atir

⁵ “Kadi bed kumeno, lonyo en gin ma bwolo dano; dano ma lawakke pe biri. En laworo calo lyel; rom ki to dok pe yen. En coko rok ducu pire kene, en guro rok ducu bedo lwakke kikome.”

⁶ Gin ducu gibiloko lok agec i kome, ma giŋale ki lok makec kun giwacci, “Ibineno can, in ŋat ma icoko gin ma pe meri ci iduro kacel lipim. Ibibedo ki jami man pi kare ma rom mene? Ibineno can in dano ma icoko jami madwoŋ ma gijeŋo boti pi lim!”

⁷ Jo ma gitye ki banyani pe gibia gijemo woko i komi? Jo ma wangi twolo pe gibiburi ki myelkom matek? Ci in ibidoko ginayaka botgi.

⁸ Pien doŋ iyako rok mapol, rok mudoŋŋe ducu gibiyako in, kit macalo ibedo lanek dano ki latim bwami i lobo, ki i kom gaŋi ki jo ducu ma gibedo iye.

⁹ Ibineno can, in dano ma inoŋo magoba ki bwami pi konyo ki jo meri, wek iger ki odi malo i wi cere, ka ma gin marac pe twero o iye boti!

¹⁰ In aye ikelo lewic i kom jo ma i odi, pien ineko rok mapol; omiyo ilanyo kwoni nono.

¹¹ Godi ma gigero ki kom ot gibikok matek, ci bao me ri ot ducu gibigamo kokogi.

¹² Ibineno can, in ŋat ma igero gaŋ madit kun ibedo ka oyo remo pa dano, ma iketo te guti me gaŋ i kom bal!

¹³ Tic ma lurok gitiyo mac biwaŋo woko. Rok ducu gitye ka olo komgi nono pi gin ma konnye pe. Rwot me mony aye omiyo obedo kumeno.

¹⁴ Ento lobo bipoŋ ki ŋec me deyo pa Rwot macalo pii ma poŋ i nam

¹⁵ Ibineno can in ŋat ma itoyo kinigani i kom luwoti, ma miyo gidoko macalo lumero, wek icik waŋi inen kit ma lewic omakogi kwede!

¹⁶ Ibibedo ki lewic madwoŋ ma ka bedo ki deyo. In kikomi aye myero imati, wek ipaŋŋe ki wot! Ki kopo pa Rwot ma tye i ciŋe tuŋ lacuc bibino boti, ma biloko deyo me locci doko lewic.

¹⁷ Bwami ma ityeko timone i kom Lebanon biumi woko lipuk; nek ma ineko ki lee tim bimiyi lworo madwoŋ, man bitimme i komi pi bedo lanek dano ki latim bwami i kom lobo, ki i kom gaŋi ki jo ducu ma gibedo iye.

¹⁸ Cal jok apaya tye ki kony aŋo? En gin ma dano opayo, cal nyonyo mamwa, ki lapwony ma lagoba. Kony aŋo ka lapa cal jok keto genne i kom gin ma en otiyo? En cal lubaŋa ma doge oto ma pe loko-ni.

¹⁹ Ibineno can, in ŋat ma iwaco ki cal yat ma ipayo ni, “Co woko.” Ki dok bot got ma pe loko ni, “A malo!” Cal meno twero pwonyo dano mo? Nen, gideyo kome ki jabu ki ryal, ento yamo me yweyo pe tye i iye wacel.

²⁰ Ento Rwot tye i ot mere maleŋ; wek jo ducu ma i lobo guliŋ mot i nyime.