Jo Ibru 3 - Acoli Baibul

Yecu dit kato Moses

¹ Pi meno, wun utmegina maleŋ ma Lubaŋa olwoŋowu kacel kweda, koŋ wutam lok i kom Yecu ma en lakwana dok ajwaka madit me niye ma wan watuco.

² En obedo lagen bot Lubaŋa muyero okete i tic, ma rom aroma ki Moses ma yam obedo lagen i ot pa Lubaŋa.

³ Lager ot gimiye deyo madit makato ot; kit meno Yecu bene nene gikwano ni deyone dit kato pa Moses woko.

⁴ Pien ot mo keken dano aye ma gero, ento ŋat ma gero jami ducu en aye Lubaŋa.

⁵ Moses yam obedo lagen i ot pa Lubaŋa ducu macalo latic, pi miyo caden i lok ma gibiloko i kare ma lacen.

⁶ Ento Kricito obedo lagen i kom ot pa Lubaŋa macalo Wode. Wan aye wa ode ka ce wamoko matek i tekcwinywa, ki i wakkewa pi gen ma watye kwede.

Yweyo tye pi jo pa Lubaŋa

⁷ Doŋ macalo Cwiny Maleŋ oloko ni, “Ka wuwinyo dwan Lubaŋa tin,

⁸ pe wumi cwinywu obed nwaŋ calo jo ma yam gujemo, i kare ma guomo kwede cwinya i tim,

⁹ ka ma kwarowu guomo iye cwinya, gutema bene iye, kun gibedo ka neno ticca pi mwaka pyeraŋwen kulu.

¹⁰ Pi meno cwinya owaŋ i kom jo me kare meno, omiyo awaco ni, ‘Gin kare ducu giŋak woko i tamgi; gin pe giŋeyo yona wacel.’

¹¹ macalo yam akwoŋo ki kiniga, ‘Gin pe bidonyo i yweyo bota.’ ”

¹² Wugwokke, utmegina, wek ŋat mo i kinwu pe obed ki cwiny marac, cwiny ma pe ye Lubaŋa, ma twero miyo en a woko ki bot Lubaŋa makwo.

¹³ Ento myero wujiŋ cwinywu kekenwu kare ducu ka pud wutwero lwoŋo ni, “Tin”, wek ŋat mo i kinwu pe cwinye odok nwaŋ pi bwola me bal.

¹⁴ Pien wan wabedo jo ma ribbe ki Kricito, ka ce wamoko matek i genwa mukwoŋo nio wa i agikki,

¹⁵ macalo yam giwaco ni, “Ka wuwinyo dwane tin, pe wumi cwinywu obed nwaŋ calo jo ma yam gujemo.”

¹⁶ Aŋagi ma yam guwinyo dwan Lubaŋa ci gujemo woko-ni? Pe gin lwak dano ducu ma yam gua ki i lobo Ejipt ma kun Moses aye obedo ka telogi?

¹⁷ Dok aŋagi ce ma yam cwinye owaŋ i komgi pi mwaka pyeraŋwen kulu-ni? Pe gin aye jo ma yam gutimo bal, ma komgi odoŋ i tim kunnu?

¹⁸ Dok en yam okwoŋo kwoŋ bot jo mene ce ni, gin pe gibidonyo i yweyo bote? Pe okwoŋo kwoŋ meno bot jo ma yam pe gubedo luwiny?

¹⁹ Pi meno wan waneno ni, jo meno yam pe gutwero donyo pien onoŋo gukwero ye Lubaŋa.