Joel 3 - Acoli Baibul

¹ “Pien nen, i nino meno, ki i kare maca, i kare ma abidwoko gum me Juda ki me Jerucalem,

² abicoko rok ducu, abikelogi i nota pa Yekocapat. Ci abinologi kop ki kunnu, pi jona Icrael ma ginaleyana, pien gukeyogi woko i kin lurok, dok gupoko lobona woko,

³ gubedo ka bolo kwir pi jo mera, kun gicato awobi pi malaya, dok gicato nyako wek ginoŋ koŋo vino, ci gumato.

⁴ “Wun jo Turo ki jo Cidon, ki wun jo ducu ma i lobo Piliciti, wun kono wudoko gin aŋo ki bota? Wun wumito cula pi gin mo ma atiyo? Ka ce wucula, ci abidwoko cul me tim mewu i wiwu kenwu oyotoyot dok aruya bene.

⁵ Pien wukwanyo ryal mera ki jabuna, dok wutero jamina mabeco ma pigi tego bota, ci wuketogi i ot jogiwu.

⁶ Wucato Lujuda ki jo me Jerucalem bot jo Grik, kun wuterogi ka mabor ki wan lobo megi.

⁷ Ento koni abitwarogi malo wek gua woko ki i kabedo ka ma yam wucatogi iye; ci abidwoko cul me tim mewu i wiwu kenwu.

⁸ Abicato litino awobewu ki anyirawu bot jo Juda. Ci gin gicatogi bot jo Ceba, en rok ma tye ka mabor; pien Rwot doŋ owaco.”

⁹ Wutit lok man i kin rok ducu! Wuywa mony, wulyet cwiny oteka lweny, Wek lulweny ducu gurwa cok, gubin wa malo kany,

¹⁰ Wutet kweri dyaŋ gudok pala I ucwan, wutet pala lanol olok odok toni; wek lagoro owacci, “An laco.”

¹¹ Wurune, wubin oyot, wun rok ducu ma orumo kany-nyi; wucit, wugurre kunnu. Rwot, doŋ ikel cogi coni!

¹² Wek rok ducu doŋ gumukke, gubin, gubin kany wa i nota pa Yekocapat; an abibedo piny kunnu ka ŋolo kop ki rok ducu ma orumo kany.

¹³ Wumak pala kac, pien kal doŋ ocek. Wuwot ka nyono olok, pien bur doŋ opoŋ woko. Bur koŋo vino ducu opoŋ woko libyeny, pien balgi doŋ dwoŋ twatwal.

¹⁴ Lwak madwoŋ, lwak madwoŋ gucokke, i nota me moko tam. Pien nino pa Rwot doŋ tye cok, i nota me moko tam.

¹⁵ Cen ki dwe bicido woko licuc, lakalatwe bene pe gibiryeny.

¹⁶ Rwot mor ki i Cion, dwane winnye ki i Jerucalem, polo ki lobo giyeŋŋe. Ento Rwot aye ka-larre pa jone, en ka ma jo Icrael gibwot iye,

¹⁷ “Kit meno wubiŋeyo ni an a Rwot Lubaŋawu, ma abedo i Cion ma got mera maleŋ, Jerucalem bene bibedo maleŋ, ci lurok doŋ pe gibibaro dyere matwal.

¹⁸ “I nino meno koŋo vino maliŋo bicwer ki i godi, cak bimol ki i wi cere ducu, pii bipoŋ, mol ki i kulu ma i Juda ducu; wan it bigunnye ki i ot pa Rwot, ci bibido nota me Citim.

¹⁹ “Ejipt bidoŋ obur, Edom bi doko tim ata, pi timgi me gero i kom jo Juda, pien guonyo remo pa jo ma pe ki bal i lobogi.

²⁰ Ento dano doŋ bibedo i Juda matwal, ki i Jerucalem pi kare ducu,

²¹ Abiculo kwor me remogi pe abikwanyo kop woko ki i kom lutiŋ alii, pien Rwot bedo i Cion.”