Joel 1 - Acoli Baibul

Kit ma bonyo gubalo kwede lobo

¹ Man lok pa Rwot ma yam obino bot Joel wod pa Petuel.

² Wuwiny lok man, wun ludoŋo muteggi, wuter itwu, wun jo ducu ma wubedo i lobo man, Gin macalo man yam otimme i karewu, nyo i kare pa kwarowu?

³ Wutit pire bot litinowu, wek litinowu gutit bot litinogi, ki likwayogi bene guwac bot yalwak ma bilubogi.

⁴ Gin ma bonyo adwek ocamo odon, bonyo abum ocamo woko, Gin ma abum ocamo odoŋ, bonyo lagara ocamo woko, gin ma lagara ocamo odon, labar ocamo otyeko woko liweŋ,

⁵ Wuco woko, wun jo ma lumero, wukoki; wukok matek, wun jo ducu ma mato koŋo vino, pi koŋo vino malino-ni, pien doŋ gityeko jukone woko ki i dogwu.

⁶ Pien rok mo doŋ obino ka lweny i kom lobona, mony matek ma pe kwanne, Lakgi calo lak labwor, lakgi boco calo lagili lak min labwor.

⁷ Gubalo olokka ducu, odurona bene gunido woko; gupaco poke, gubolo piny, jaŋgi okwor matar.

⁸ Wukok, macalo nyako ma oruko boŋo cola, ma kumo pi cware ma pud onyome anyoma.

⁹ Gityer me moko kwon ki gityer amata gigiko kelogi woko i ot pa Rwot. Ajwagi ma lutic pa Rwot, gitye ka kumo,

¹⁰ Potti oballe, piny oto woko do, pien kal doŋ oballe, koŋo vino doŋ pe, moo doŋ pe nen.

¹¹ Lewic omakwu, wun lupur, wukok matek, wun lupur olok pi naŋo ki cayiri; pien cam me poto doŋ olal woko.

¹² Olok oner, oduro bene oballe woko; Okwer pomegranat, ki otit ki acuga, yadi ducu ma i poto guner woko; yomcwiny doŋ pe bot litino pa dano.

¹³ Wuruk boŋo cola, wun ajwagi, wukok can, wukok matek, wun lutic i keno tyer. Wudony i ot, wubut i boŋo cola, wun lutic pa Lubaŋana. Pien gityer me moko kwon ki gityer amata doŋ gijuko kelogi woko i ot pa Lubaŋawu.

¹⁴ Wukwer kare me ri kec, wulwoŋ cokke madit me woro Lubaŋa, Wucok ludoŋo ki jo ducu ma gibedo i lobo man, gubin i ot pa Rwot Lubaŋawu, gukok bot Rwot.

¹⁵ Oyi, nino-ni do! Pien nino pa Rwot doŋ cok, bino macalo to-piny ma Won Twer Ducu ocwalo.

¹⁶ Cam doŋ gibalo ki i nyimwa ma wan waneno. Yomcwiny ki um dok tye i ot pa Lubaŋawa?

¹⁷ Kodi otuŋ i ŋom ka ma gicoyogi iye, dula odoŋ noŋo; dero ducu oballe woko, pien kal pe ocek.

¹⁸ Kit ma lee cur kwede! Piny oloyo dyaŋi woko, pien kakwayogi doŋ pe; wa romi bene gujony woko,

¹⁹ Akok boti, ai Rwot, pien mac doŋ owano olet ma i tim, leb mac doŋ owaŋo yadi ducu ma i poto.

²⁰ Wa lee me tim ducu gikok boti, pien pii ma i nota doŋ otwo woko, mac doŋ owaŋo olet ma i tim.