Jeremia 52 - Acoli Baibul

Lok pa Jeremia ogik kany. Kare me Joe pa Jedekia

¹ Jedekia ocamo ker ma mwaka me ditte pyeraryo wiye acel, ci obedo ka loc i Jerucalem pi mwaka apar wiye acel. Nyiŋ minne Kamutal, nya pa Jeremia me Libna.

² En obedo ka tiyo gin ma nen marac i waŋ Rwot, kun lubo gin ducu ma yam Yekoyakim otiyo.

³ Pi kiniga ma omako Rwot, ka kare oromo, omiyo Rwot obayo Jerucalem ki Juda woko ki i nyime. Jedekia ocako jemo woko i kom kabaka me Babilon.

Jerucalem opoto i ciŋ jo Babilon

⁴ I mwaka me aboŋwen me locce, i dwe me apar, i nino dwe apar, en aye Nebukadnejar kabaka me Babilon obino kwede ki monnye ducu i kom Jerucalem, ci orumo gaŋ woko, ka dok gutoro cel lobo orumo woko dyere.

⁵ Gaŋ girumo kit meno nio wa i mwaka me apar wiye acel me loc pa kabaka Jedekia.

⁶ I kom nino dwe aboŋwen me dwe me aŋwen onoŋo kec odoko marac i Jerucalem, ma omiyo cam pe dok nen pi lwak.

⁷ Ka gumuko cel me gaŋ woko, ci lwak lulweny ducu gumol guriŋo ki i dyewor, kun giwok ki i dog gaŋ ma i kin cel cel aryo me Jerucalem, ma i ŋet poto pa kabaka, kadi onoŋo jo Kaldaya gurumo gaŋ woko. Gucito gulubo yo ma dok tuŋ Araba.

⁸ Ento mony pa jo Kaldaya guryemo kor kabaka, ci gumake woko i bar me Jeriko; ci monnye guket woko ducu ki i kome.

⁹ Ka gumako kabaka, ci gukelo en bot kabaka me Babilon i Ribla, ka ma oŋolle iye kop.

¹⁰ Kabaka me Babilon ocako neko awobe pa Jedekia woko ki i nyime ma waŋe neno, dok bene oneko rwodi me Juda woko ducu ki i Ribla.

¹¹ En okolo waŋ Jedekia oloyo woko ka omiyo gitweye ki nyor, gitere kwede wa i Babilon, ci gikete i mabuc nio wa i nino me tone.

Giwago ot pa Lubaŋa woko

¹² I dwe me abic, i kom nino dwe apar, ma en aye mwaka me apar wiye aboŋwenne me loc pa kabaka Nebukadnejar, ma kabaka me Babilon, en aye Nebujaradan ma ladit pa lugwok kabaka, ma latic pa kabaka me Babilon, obino i Jerucalem.

¹³ Ocako waŋo ot pa Rwot woko ki ot pa kabaka, ki odi ducu ma tye i Jerucalem; owaŋo odi madito woko ducu ki mac.

¹⁴ Ki mony pa jo Kaldaya ducu, ma yam gitye kacel ki ladit pa lugwok kabaka, gumuko kicika cel murumo Jerucalem woko,

¹⁵ Ki lwak ma yam gudoŋ i gaŋ, ki jo ma yam gukobo gigi “kengi bot kabaka me Babilon, kacel ki lwak ma gudoŋŋe ducu, Nebujaradan ma, ladit pa lugwok kabaka oterogi woko I opu,

¹⁶ Ento oweko jo mogo ma gin lucan adada gudoŋ i lobo wek gubed lugwok poto olok ki lupur ki kweri dyaŋ,

¹⁷ Ki wir mola ma yam gitye i ot pa Rwot ki litino gadigadi, ki nam me mola ‘ma yam gitye i ot pa Rwot, jo Kaldaya guturo gunido woko, ka gutero mola mere wa i Babilon.

¹⁸ Gutero lwak agulu ducu ki akwaya; latokke-gu ki magac-gu, ki becen, ki atabo me odok eceta, ki jami me mola ducu ma yam gitiyo kwedgi i ot pa Rwot

¹⁹ ki atabo matino ki weer me waŋo mac bene, ki atabo, me liyo gityer amata. Gin ma yam otiyo ki jabu ladit pa lugwok kabaka otero macalo jabu, gin ma yam otiyo ki ryal, otero macalo ryal.

²⁰ Lok ma dok i kom wir aryo-ni, ki nam acel, ki litino gadigadi ducu ma yam Solomon otiyo pi ot pa Rwot, pek me mola ma oa ki i kom jami magi ducu dwoŋ, pe pimme,

²¹ Bor pa wir acel acel romo futi pyeraryo wiye abiro, gipimo kor wir ki tol ci ditte oromo futi apar wiye aboro. Iye onoŋo twolo, kome ducu kinoŋ ma romo nyig ciŋ aŋwen,

²² I wiye yam giketo iye lalukana me mola, kun lalukana borre romo futi abiro ki nucu. I kom lalukana onoŋo giketo iye obwo ki cal nyig okwer pomegranat, ma gin ducu gitiyogi ki mola ma girumo lalu: kana dyere. Wir me aryo bene rom ki lawote, kun tye ki cal nyig pomegranat.

²³ Cal pomegranat onoŋo romo pyeraboŋwen wiye abicel ki yo tun ŋeye ducu ki woko; cal pomegranat ducu doŋ romo miya acel ma orumo obwo ma gitiyo orumo woko ducu-ni,

Gitero Lujudaya i Babilon

²⁴ Ladit pa Lugwok kabaka, otero Ceraya bene ma ajwaka madit, ki Jepania ajwaka me aryone, ki lukur doggola me ot pa Rwot gin adek.

²⁵ Ka dok okwanyo ladit ma loyo lumony ki i dye gaŋ, ki lumemba abic me lukiko pa kabaka ma onoŋogi i dye gaŋ; ki karan pa ladit me mony, ma yam coko jo me lobo pi lweny; ki jo pyerabicel i kin wegi lobo ma ginonogi i dye gaŋ.

²⁶ Nebujaradan, ladit pa lugwok kabaka omakogi, oterogi wa i Ribla bot kabaka me Babilon.

²⁷ Kabaka me Babilon onekogi woko ducu ki i Ribla ma i lobo Kamat. Jo Juda ma gikwanyogi woko ki i lobogi giterogi woko i opii kit meno.

²⁸ Man aye wel dano ma yam Nebukadnejar omako otero woko i opii: i mwaka me abiro otero Lujudaya ma romo alip adek ki pyeraryo wiye adek.

²⁹ I mwaka me apar wiye aboro me locce en okwanyo dano ma romo miya aboro ki pyeradek wiye aryo ki i Jerucalem oterogi woko i opii.

³⁰ I mwaka me pyeraryo wiye adek me loc pa Nebukadnejar, Nebujaradan ladit pa lugwok kabaka otero Lujudaya ma romo dano miya abiro ki pyeraŋwen wiye abic i opii. Wel dano ducu ma giterogi i opii doŋ oribbe alip aŋwen ki miya abicel’

Giketo deyo bot Yekoyakin ki i Babilon

³¹ I kare me mwaka pyeradek wive abirone nia ma gitero kwede Yekoyakin kabaka me Juda i opii, i dwe me apar wiye aryo, i kom nino dwe pyeraryo wiye abic, en aye Evil-merodak, kabaka me Babilon, otimo kica ki Yekoyakin kabaka me Juda, ogonye woko ki i mabuc i mwaka ma en ocamo iye ker.

³² Obedo ka lok kwede mot maber, oketo en obedo i kom madit makato ducu ki i kin kom pa luker ma yam gibedo kwede i Babilon.

³³ Kit meno Yekoyakin olunyo boŋo mabuc mere woko, obedo ka cam i wi meja pa kabaka jwijwi, pi kare me kwone ducu.

³⁴ Pi miye gin me konnye kwede, kabaka dok obedo ka miye lim me tic kwede jwijwi, nino ducu me kwone.