Jeremia 51 - Acoli Baibul

Kop ma Rwot oŋolo i kom Babilon

¹ Rwot owaco kuman ni, “Abekelo gin ma neko piny i kom Babilon ki i kom jo Kaldaya.

² Abicwalo lurok ka pyeto Babilon calo cuŋ kai ma gipyeto ma yamo kolo tero woko. Ka nino me can man obino ci gilwenyo i kom dano i kabedo ducu, gibiweko lobo doŋ noŋo.

³ Pe wumi kare ki jo Babilon me celo aterogi nyo me ruko koti nyonyogi me lweny. Pe wubwot awobegi gubed makwo. Wutyek dul monygi woko licwic.

⁴ Gibiketo ret i komgi ci gito woko i lobo pa jo Kaldaya ki i dye yo me gaŋigi,

⁵ An Rwot Lubaŋa me mony, pe abwoto jo Icrael ki jo Juda, kadi bed onoŋo gutimo bal i koma, an ŋat Maleŋ me Icrael.

⁶ Wuriŋ woko ki i Babilon! Wuriŋ wular kwowu! Pe myero ginekwu woko pi bal me Babilon. Pien man en aye kare me culo kworra ki me keto can i kom Babilon ma oporo gin ma en otimo.

⁷ Babilon onoŋo obedo macalo kikopo jabu i ciŋa, ma omiyo lobo ducu omer. Rok ducu gumato koŋo vinone, ci gudoko lupoya woko.

⁸ Babilon doŋ opoto woko oyotoyot, kun gijwero woko licwic. Wukok pire! Wukel yat wuket i waŋ rette, gwok nyo bimiyo can.

⁹ Lurok ma onoŋo gibedo kunnu guwacci, ‘Watemo konyo Babilon ki yat wek ocan, ento onoŋo doŋ pe twero larre. Wubwote, wek wacitu wadoku cen paco, Lubaŋa doŋ otyeko keto can i kom Babilon ki tekke ducu, ci ojwero obalo woko adada.’’’

¹⁰ Rwot owacci, “Jona gidaŋŋe ni, ‘Rwot doŋ onyuto ni lokwa tye atir. Wubin wacitu watitu bot jo ma bedo i Cion gin ma Rwot Lubaŋawa doŋ otyeko timone-ni.’ ”

¹¹ Rwot doŋ otugo cwiny luker pa jo Medi woko, pien doŋ oyubbe me tyeko Babilon woko. Man aye kit macalo en biculo kwede kwor pi ot mere ma gimuko gireto woko piny-nyi. Ludito wi mony doŋ giwaco bot askari ni, “Wupak leb aterowu! Wumak kwotwu i ciŋwu!

¹² Wutwe bendera ocuŋ ma nyuto lweny i kom cel me Babilon. Wucuk cwiny lukur-piny pe gubed lwor! Wupok lukur-piny woko i kabedo mapatpat. Wumi jo mukanne woko guki piny!” Rwot doŋ otyeko timo gin ma yam en oyubbe ni ebitimo, gin ma yam en oloko ni ebitimo i kom jo ma gibedo i Babilon.

¹³ Babilon tye ki kulu madwoŋ ki lonyo mabup, ento karene doŋ otum, ki tol uci me kwone doŋ giŋolo woko.

¹⁴ Rwot me mony doŋ okwoŋne ki nyiŋe kekene ni ebikelo lwak dano mapol calo bonyo ka lweny i kom Babilon, ka doŋ gibidaŋŋe ki dwan me woo me loyo lweny.

Wer me pako Lubaŋa

¹⁵ Rwot oketolobo ki twerone; dok ocibo lobo ocuŋ matek pi ryekone, ki pi niaa matut ma en tye kwede omiyo oyaro polo woko.

¹⁶ I kare ma dwane mor, ci pii twagge matek ki i polo, dok miyo lupu duny kun a ki agikki lobo. En miyo lutkot wil ka kot cwer, dok miyo yamo kodo kun a ki i ot kano jamine.

¹⁷ Dano ducu bedo lumiŋ dok bene ma wigi odiŋ; lewic mako latet jabu pi cal jokke ma en otiyo, pien cal jogine-gu ducu pe lubaŋa me ada, dok bene pe gitye ki kit kwo mo i igi.

¹⁸ Konygi pe, gitiyogi mere me acaya keken; i kare ma Rwot bibino ka keto can i komgi gibito gitum woko.

¹⁹ Lubaŋa pa Yakobo pe obedo calo cal jogi magi; pien en aye ŋat ma oketo jami ducu, dok bene en oyero jo Icrael wek gubed jone kikome. Nyine Rwot me mony.

Nyoŋo pa Rwot

²⁰ Rwot owacci, “Babilon, in ibedo nyonona, ki jami lwennya. Atiyo kwedi me ŋinyo rok ducu woko atiyo kwedi me tyero ker woko ducu,

²¹ atiyo kwedi nie neko aguragura ki jo ma riŋo kwede kun anyotogi woko, atiyo kwedi me turo gadigadi lweny kacel ki jo ma ŋweco kwedgi atyeko woko,

²² atiyo kwedi me neko co wa ki mon, atiyo kwedi me neko co muti wa ki awobe-gu,’ atiyo kwedi me ooko awobe wa ki anyia,

²³ atiyo kwedi me nyoto lukwat ki romigi woko ninyininyi, atiyo kwedi me neko lupur wa ki twoni ma gipuro kwede, atiyo kwedi me neko luloc wa ki ludito wi mony-gu ducu.

Can ma gibiketo i kom Babilon

²⁴ “Wubineno gin me culo kwor ma abitimo i kom Babilon ki i kom jo aldaya ducu pi gin marac ma gutimo i kom Cion.

²⁵ In Babilon, ibedo calo got ma otyeko lobo woko, ento an Rwot aye lakworri. Abimaki woko licwic, ci arudi woko i ŋom, ci abiweki idoŋ buru calo got ma owaŋ.

²⁶ Pe gibikwanyo gweŋ mo ki i komi wacel ma gibitic kwede pi gedo doki,’ me twok ot kadi ki me te guti me ot. Ibidoko doŋ macalo tim aroo matwal, Man Rwot ma owaco.

²⁷ “Wugur bendera ocuŋ i ŋom pi lweny! Wukut tum wek rok ducu guwiny! Doŋ wulwoŋ rok woko ducu pi lweny i kom Babilon! Wuwac ki ker magi, Ararat, Mini, ki Acikenaj, gubin gulweny i kome. Wuket ladit ma loyo wi mony ducu me lweny i kome. Wukel aguragura-gu mapol calo lwak bonyo ma corre,

²⁸ Wuyub rok ducu, luker pa jo Medi, luloc me lobo ki ludito ma konyogi, ki lobo ducu ma tye i te locgi me lweny i kom Babilon.

²⁹ Lobo tye ka yeŋŋe dok jo ma iye tye ka kayo lakgi ki arem madwoŋ, pien Rwot doŋ tye ka cobo gin ma en oyubo, En biloko Babilon doko tim aroo, ka ma dano mo pe bedo iye.

³⁰ Lulweny me Babilon doŋ gugiko lweny woko, ci gubedo woko i cel gogogi. Tekcwinygi doŋ otum woko, doŋ gudoko calo mon. Dog gaŋ ducu doŋ gituro woko; dok odi-gu ducu doŋ gicwinyo woko ki mac tye ka waŋ.

³¹ Luor giriŋo teretere me rwatte ki luwotgi, kun gicito ka tito bot kabaka me Babilon ni gaŋ doŋ gituro woko ki i kabedo ducu.

³² Lukwor gumako mel ki yeya me ŋolo kulu woko dok gucwinyo lum-gu ki mac. Askari me Babilon ducu doŋ gubaŋŋe woko,

³³ Lukworgi cok jwerogi woko piny ci ginyonogi woko ki tyengi calo bel ma tye i laro moyo.” Man Rwot me mony, Lubaŋa pa Icrael, aye ma owaco.

³⁴ Nebukadnejar kabaka me Babilon ocama otyeka woko; oŋinya woko kicikici. Oweko gaŋ odoŋ ma iye noŋo calo i agulu; ci omwonya woko calo min kulu, Okwanyo gin ma iye mito, ci obolo gin mukene mudoŋŋe-gu woko.

³⁵ Wek jo Cion guwacci, “Alii myero obed i wi Babilon gire, pi tim bwami ma gitimo i komwa!” Wek jo Jerucalem guwacci, “Aliimyero obedi wi jo Kaldaya gire pi danowa ma ginekogi!”

Rwot bikonyo jo Icrael

³⁶ Pi meno Rwot owaco bot jo Jerucalem kuman ni, “Abipido lokwu, dok abiculo kwor piwu bene. Abimiyo pii me nam me Babilon two woko, ki waŋ itte-gu ducu amiyo two woko.

³⁷ Babilon doŋ bidoko odur ma obakke lipim i wi obur ka ma too me tim gibedo iye. Bibedo kabedo marac ma miyo lworo, ŋat mo pe ma bibedo kunnu wacel, doŋ jo ducu ma gibinene gibijwat mada i kom kabedo man ma odoŋ nono laboŋo ŋat mo ma bedo iye-ni.

³⁸ Jo Babilon ducu gibikok calo labwor, dok gibiŋur calo litino labwor.

³⁹ Ka gin jo ma luworo, ci abitedo karama pigi, Abimiyo gimato mat gimer woko ci cwinygi bedo mayom. Gibinino woko, ento pe doŋ gibico wacel.

⁴⁰ Abiterogi woko macalo litino romi, macalo nyogi dyegi nyo nyogi romi. Man Rwot ma owaco.

Can ma bipoto i kom Babilon

⁴¹ “Babilon ma en aye gaŋ ma wi lobo kulu pako-ni, doŋ gimako woko! Babilon doŋ odoko gin ma kelo lworo marac bot rok ducu!

⁴² Nam doŋ ocorre woko limuk i kom Babilon, ci biamwonyine ma mor oume woko lipuk.

⁴³ Gaŋine ducu doŋ odoko gin ma giuro ma kelo lworo marac, dok tye macalo tim aroo ma pii pe iye, ka ma dano mo pe bedo iye dok pe giwoto iye.

⁴⁴ Abiketo can i kom Bel, ma en lubaŋa me Babilon, dok abikwanyo jami ma yam en omwonyo-gu woko ducu ki i doge. Rok ducu pe gibicito ka wore kit ma yam con. “Cel me Babilon doŋ opoto woko. Wun jo Icrael wurin woko ki kunnu!

⁴⁵ Dano acel acel tye ka riŋo woko laro kwone ki i kom kiniga mager pa Rwot.

⁴⁶ Pe myero cwinywu oballe woko, dok pe wubed ki lworo pi lok magi ma wuwinyo-ni. Mwaka ki mwaka lok mapat winnye ket i kabedo ducu, lok me tim bwami i lobo, ki dok lok i kom kabaka mo ma tye ka lweny ki kabaka lawote mukene.

⁴⁷ Pi meno, kare tye ka bino, en kare ma abitic kwede i kom cal jogi me Babilon. Lobo Babilon kulu bipoŋ ki lewic madwoŋ, ki jone ducu gibinekogi woko.

⁴⁸ Gin ducu ma tye i wi lobo ki i polo gibibedo ki yomcwiny kun giwero wer, ka ce Babilon opoto i ciŋ jo ma gubino ki i lobo ma tye yo tuŋ acam ka tyekone woko. Man Rwot ma owaco.

⁴⁹ Babilon aye ma okelo to i kom dano ducu ma bedo i wi lobo; kombeddi doŋ Babilon bipoto, pien omiyo jo Icrael mapol ata guto.

Lok pa Lubaŋa bot jo Icrael ma gitye i Babilon

⁵⁰ “Wun jona ma wutye i Babilon doŋ wubwot ki i lak to! Kombeddi doŋ wuciti, pe dok wukur gin mo! Kadi bed wutye ka mabor ki paco myero wutam pira, an a Rwotwu, wiwu bene myero opo pi Jerucalem.

⁵¹ Wuwacci, ‘Lewic omakowa pien wawinyo lok me cac ma gicayowa kwede; wadoko doŋ jo ma goro atika, pien lurok doŋ gubino i kabedo maleŋ ma i ot pa Rwot.’

⁵² Pi meno awacci, kare tye ka bino, en kare ma abitic kwede i kom jogi me Babilon, jo ma giketo ret i komgi gibibedo ka ŋur i kabedo mapol i lobone ducu.

⁵³ Kadi bed Babilon it malo wa i pol, kadi bed oger gaŋ me cel gogone kunnu, pud abicwalo dano aye me cito ka tyeke woko. An Rwot doŋ aloko. Can ma pud tye ka medde i kom Babilon

⁵⁴ “Wuwiny dwan me koko ma tye i Babilon, wuwiny ka dano gidaŋŋe pi can ma doŋ opoto i lobo pa jo Kaldaya.

⁵⁵ Doŋ abejwero Babilon woko, amiyo tekke bene tum ci liŋ mot. Mony tye ka rune bino oyotoyot calo pii biamwonyi ma mor, gibino ka lweny i kome ki woo matek.

⁵⁶ Doŋ gubino woko ka keto can i kom Babilon, gimako lulwennye woko, ki atumgi bene gituro giŋido woko matitino. An Rwot Lubaŋa ma aketo can i kom dano pi bal, abiculo kwor aketo can i kom Babilon pi bal ma jone gutimo.

⁵⁷ Abimiyo rwodine gimer woko, jo maryek, luloc me lobo, ki ludito wi mony ducu, ki lulweny. Gibinino woko, ginino ento pe dok gibico wacel. An Kabaka doŋ aloko, an Rwot me mony.

⁵⁸ Cel me Babilon malac-ci gibimuko gireto woko i nom, ki dog gaŋŋe mamalo-gu gibiwaŋo woko ki mac. Tic ma lurok gutiyo-gu ducu obedo me noŋo; gin ma rok ducu guyelle iye ka tiyo ticce matek doŋ mac owaŋo woko.” Man lok pa Rwot me mony kikome. Gicwalo lok pa Jeremia i Babilon

⁵⁹ Ceraya wod pa Neria ma wod pa Maceya, yam obedo ŋat ma gwoko kabaka Jedekia. I mwaka me aŋwen me loc pa Jedekia kabaka me Juda, Ceraya onoŋo cito i Babilon, ci Jeremia otitte kit lok mogo ma myero en owot kwede.

⁶⁰ Jeremia ocoyo i buk lok kom can ma bipoto i kom Babilon, ki lok mukene-gu ducu ma gicoyo ma okemo Babilon.

⁶¹ Owaco bot Ceraya ni, “Ka io i Babilon nen ni ikwano lok magi ducu kit macalo gicoyo-ni bot lwak.

⁶² Ci myero ileg ni, ‘Ai Rwot, yam onoŋo iwaco ni ibijwero kabedo man woko, wek pe gin makwo obed iye, dano nyo kadi lee, ci koŋ bibedo macalo tim aroo matwal.’

⁶³ Ka doŋ ityeko kwano buk man bot lwak, ci itwe gweŋ i kome, ka doŋ ibol kwede woko i dye kulu Euprate,

⁶⁴ kun iwacci, ‘Man aye kit macalo Babilon bimwony kwede woko, ma pe doŋ bikatti woko matwal, pi can ma abekelo ma abiketo i kome.’ ”