Jeremia 5 - Acoli Baibul

Bal pa jo Jerucalem ki jo Juda

¹ Wurir; kun wugwennye agwenya i dye yo me Jerucalem, wunen ci myero wuniaŋ iye maber! Wuyeny piny i dyekalle ducu wek wunen ka wutwero noŋo dano mo iye ma ŋolo kop kakare, ma yenyo ada bene; ka wek atim kica ki Jerucalem.

² Kadi bed gikwoŋo kwoŋ kun giwacci, “Kit macalo Rwot tye makwo-ni” ento noŋo gikwoŋo kwoŋ me goba goba.

³ Ai Rwot, in mono pe iyenyo ni inen ada ki waŋi? Ipwodogi matek, ento pe guwinyo kit arem mo madwoŋ wacel; ityekogi woko bene, ento gin gukwero winyo pwonnyi. Gujiŋo cwinygi odoko matek makato got; gukwero nut woko.

⁴ Dok awacci, “Magi lucan keken, pe gitye ki kit ŋec mo; pien pe giŋeyo yo pa Rwot, ma en aye cik pa Lubaŋagi.

⁵ Abicito bot jo madito ma gin wegi twero, ci abiloko kwedgi; pien giŋeyo yo pa Rwot, ma en aye cik pa Lubaŋagi.” Ento gin bene onoŋo guturo okol woko, dok bene onoŋo gucodo ogwil woko.

⁶ Pi meno, labwor mo bia ki i buŋa ci nekogi woko, orudi ma bedo i tim aroo bibino tyekogi woko, Kwac aye ma doŋ tye ka kuro gaŋigi, ŋat mo ki i kingi ka oa okato woko ci gibiŋido woko matitino; pien balgi doŋ odoko dwoŋ, tim me kwele bene doŋ omedde wo ko i kingi adada.

⁷ “Atwero timowu kica niŋniŋ? Litinowu doŋ gubwota woko, kun gubedo ka kwoŋo kwoŋ ki nyiŋ lubaŋa mogo ma pe Lubaŋa kikome. I kare ma amiyo gucamo cam guyeŋ adada, gutimo abor, dok guwoto kacel gucito i odi pa malaya.

⁸ Gipitogi guyeŋ maber macalo twon aguragura ma mito tigo, kun ŋat acel acel kok pi dako pa lawote.

⁹ Pe abiketo can i komgi pi lok magi? man Rwot ma openyo; dok bene pe abiculo kwor i kom rok macalo man?

¹⁰ “Kat icit i potone ki i kin olok ci ilwer, ento pe ityekgi woko liweŋ; Lwer jaŋe woko, pien gin pe gubedo pa Rwot,

¹¹ Pien jo me ot pa Icrael ki jo me ot pa Juda pe gubedo ki gen mo wacel i koma, man Rwot ma owaco.

¹² Gubedo ka loko lok goba goba i kom Rwot, kun giwacci, ‘En pe bitimo gin mo; gin marac benepe bipoto i komwa; pe gibilweny i komwa ki pala lucwan, kadi ki kec bene pe bipoto i lobowa.

¹³ Lunebi gibilokke gidoko yamo; ma lok pa Lubaŋa pe i igi. Meno gin ma bitimme i komgi!’ ”

¹⁴ Pi meno Rwot Lubaŋa me mony owaco kuman ni, “Pien doŋ guloko lok man, nen, atye ka loko lokka ma tye i dogi-ni wek odok mac, ki lwak man aloko gidoko yen, ci mac biwaŋogi woko.

¹⁵ Nen, abikelo rok mo ma a ki ka mabor i komwu, wun jo me ot pa Icrael, man Rwot ma owaco. Rokke rok matek, dok rokke rok macon, rok ma wun pe wuŋeyo loko lebgi, dok bene pe wuromo niaŋ gin ma giwaco.

¹⁶ Aterogi ducu neko dano woko, Gin ducu gicogi oteka keken,

¹⁷ Gibicamo kal ma wukayo ki camwu mukene woko liweŋ; gibicamo awobewu ki anyirawu woko; gibicamo dyegiwu ki romiwu kadi wa dyaŋiwu woko; gibicamo olokwu ki odurowu. Gaŋiwu ducu ma girumogi ki cel gogo ma wugeno-ni gibijwero wo ko ki pala licwan.”

¹⁸ Rwot owacci “Ento kadi wa I kare meno pe abityekowu woko liweŋ.

¹⁹ Ka ce lutuwu gibiwacci, ‘Piŋo Rwot Lubaŋawa otimo gin magi i komwa?’ in ibiwaco botgi ni, ‘Kit macalo wubwota woko kun wubedo ka tiyo bot lubaŋa pa lurok i lobowu, kit meno wubitiyo bene bot lurok i lobo ma pe mewu.’ ”

²⁰ Tuc lok man i ot pa Yakobo, tit pire i lobo Juda ni,

²¹ “Wuwiny lok man, wun lumiŋ ki jo ma wiwu odiŋ, ma wanwu tye, ento pe wuneno, ma itwu tye, ento pe wuwinyo.

²² Pe wulwora? Man Rwot ma owaco. Komwu bene pe myel i nyi ma? Aketo kweyo obedo waŋ apokki pi nam, apokki ma ri nakanaka ma en pe twero kato ki iye; kadi bed biamwonyi me nam twagge, pe bibalo woko, kadi piine mor, pe biromo kato ki i wiye.

²³ Ento lwak man gin jo ma ŋutgi tek dok lujemo ki i cwinygi; ci gulokke guŋak, gucito gigi, guweka woko,

²⁴ Pe giwaco ki i cwinygi ni, ‘Myero walworu Rwot Lubaŋawa, ma miyo kot i karene, kot me oro ki kot me poto kot, dok ma gwoko piwa lwak kare ma giciko me kac.’

²⁵ Balwu ma wutimo doŋ oryemo jami magi woko, balwu ogenowu noŋo jami magi mabeco.

²⁶ Pien jo maraco gitye i kin jona; gibedo ka kiyo piny calo ludwar winyo. Giciko owicgi; ci gimako dano,

²⁷ Odigi opoŋ ki lok roro, calo aduku ma opoŋ ki winyo; pi meno doŋ gudoko jo madito dok bene gulony,

²⁸ gucwe dok komgi nen liyu mada, Gitimo ballataya ma ka gikke pe; pe giŋolo kop atir, pe gikonyo litino kic wek gubed maber, dok bene pe gipido lok pa jo ma piny obwoyogi kakare,

²⁹ Rwot owacci, “Pe abiketo can i komgi pi lok magi? Dok bene pe abiculo kwor i kom rok macalo man?”

³⁰ Man ginaura mada ma miyo lworo ma doŋ otimme i lobo:

³¹ lunebi gitito lok goba goba, ki ajwagi bene gitye ka tiyo gin maigi mito; jona gimaro kit tim macalo meno, Ento gibitimme niŋniŋ ka agikkine doŋ oo?