Jeremia 46 - Acoli Baibul

Man lok pa Rwot ma okemo Ejipt

¹ Rwot oloko ki lanebi Jeremia lok ma okemo lurok.

² Man aye lok ma en owaco ma okemo Ejipt, Rwot oloko i kom mony pa Parao Neko, kabaka me Ejipt, ma yam Nebukadnejar kabaka me Babilon oloyo i lweny i Karkemic ma cok ki kulu Euprate i mwaka me aŋwen me loc pa Yekoyakim wod pa Yocia kabaka me Juda, kun wacci,

³ “Ludito me Ejipt gidaŋŋe ni, ‘Wuruk nyonyo me geŋo korwu dok wuyubbe ki kwotwu bene, ci wucit i lweny!

⁴ Wutwe kom me bedo i ne aguragura; wubed i wigi, wun wegi aguragura! Wucuŋ i tyeŋ ci wuruk otan nyonyo! Wupak Leb toŋwu obed mabit! Wuruk koti nyonyowu i komwu!’ ”

⁵ Rwot openyo ni, “Aneno gin aŋo? Gitye ka lokke gidok woko cen ki lworo madwoŋ, kun cwinygi oballe woko. Twoni lwenygi ducu giketo ret i komgi, ci guriŋo woko oyotoyot; ma pe guneno ŋegi, pien lworo onoŋo oketo komgi woko!” Man Rwot ma owaco.

⁶ Jo ma gidwir i ŋwec pe gitwero bwot; ki lulweny matego bene pe gitwero bwot. Yo tuŋ acam i ŋet kulu Euprate giyokke atata ci gipoto woko.

⁷ “Man aŋa ma tye ka tiŋŋe malo calo pii me kulu Nail-li, macalo pii ma opoŋ woko libyeny wa i dog geŋ ma mol amola?

⁸ Ejipt aye tye ka tiŋŋe macalo pii me kulu Nail, calo kulu ma piine opoŋ woko libyeny wa i dog gen, Ejipt wacci, Abitiŋŋe aumo lobo woko, abijwero gaŋi kun aneko jo ducu ma bedo iye woko.’

⁹ Cok aguragura gucak wot, ki gadigadi bene gucak lorre! Cwallulweny gucit gukat anyim: jo Etiopia ki Put ma gumako kwot, wegi atum ma ludiro i mako atum ma gua ki i Lud.

¹⁰ “Man aye nino pa Rwot Lubaŋa me mony; tin doŋ en biculo kwor, tin doŋ en biketo can i kom lukworre. Binekogi woko ki pala lucwan nio waŋ ma otyekogi woko liweŋ, ma noŋo leb palane doŋ opune woko ki remo keken; tin en aye Rwot Lubaŋa me mony tyero lukworre macalo gitum i lobo ma tye yo tuŋ acam, i ŋet kulu Euprate.

¹¹ Wun jo Ejipt, wucit i Gilead, ci wuyeny yat me caŋo two! Yatwu-gu ducu nen gin ma konnye pe; gin mo ma caŋowu pe.

¹² Lurok doŋ guwinyo pi kit lewic ma wutye kwede; jo ducu doŋ guwinyo kokowu oromo i lobo woko; pien lalweny acel acel doŋ tye ka yokke ki lawote, ci gin ducu gipoto woko i ŋom.”

Bino pa Nebukadnejar

¹³ Rwot oloko ki lanebi Jeremia i kare ma Nebukadnejar kabaka me Babilon obino ka lweny i kom Ejipt, kun wuwacci,

¹⁴ “Tuc lok man i gaŋi me Ejipt, kun itito i Migdol, Mempic, ki Tapanec ni, ‘Wucuŋ matek, doŋ wuyubbe me lweny; gin ducu ma wutye kwede gibibalo woko i lweny!’

¹⁵ Piŋo Apic doŋ owekowu woko? Cal twon ma wutiyo-ni kono pe ocuŋ piŋo? Pien Rwot ojwere woko lirwat piny.

¹⁶ Lwakwu guyokke ci gupoto, kun dano acel acel waco bot lawote ni, ‘Wot oyotoyot! Wek wadok cen bot lutuwa, wek wabwot woko ki i lak pala pa lukworwa!’

¹⁷ “Lwon Parao, kabaka me Ejipt, ki nyiŋ manyen ni, ‘Ŋat ma wo twatwal omiyo karene okato.’

¹⁸ An a Rwot me mony, an aye kabaka. An Lubaŋa makwo, Calo got Tabor ma wiye bor kato wi godi ducu, ki got Karmel ma ocuŋ mabor dognam, tek pa ŋat ma bino ka lweny komwu tye kit meno.

¹⁹ Wuyubbe kun wutweyo yecwu woko me cito i opii, wun jo Ejipt. Pien Mempic doŋ bidoŋ noŋo, bidoŋ wi obur, ma dano mo pe bedo iye.

²⁰ Ejipt nen calo laroya dyaŋ maber mucwe, ento lwaŋo ma gikayo dyaŋi ma gua yo tuŋ acam gitye ka lweny i kome.

²¹ Kadi askarine-gu ma gipaŋogi apaŋa ki lim calo roya mucwe kun gimoo adada gudoko goro ma tekogipe. Gin gulokke guriŋo woko kacel, pe gucuŋ, pien nino me keto can i komgi onoŋo doŋ oromo,’ en bene aye nino me togi,

²² Ejipt tye ka riŋo woko kun kok calo twol, pien lukworre gitye ka bino ki tek, ma gibino ka lweny i kome ki latoŋgu calo jo ma tye ka toŋo yadi.

²³ Gibitoŋo yadi me buŋane-gu woko, kadi bed onoŋo buŋane pe giromo kato ki iye, pien jone gidwoŋ mada ma pe gitwero kwano welgi, askarigi pol ma welgi kato wel bonyo woko.

²⁴ Wun jo Ejipt, lewic bimakowu, gibimiyowu woko i ciŋ jo ma gua ki i lobo ma tye yo tuŋ acam.” Man Rwot ma owaco.

²⁵ Rwot me mony, Lubaŋa pa Icrael, owacci, “Abeketo can i kom Amon, ma en lubaŋa me Tebec, kacel ki Ejipt ki lwak lubaŋane ki lukerre ducu. Abeketo can i kom Parao kacel ki jo ducu ma gigeno eno.

²⁶ Abimiyogi i cin jo ma mito nekogi, abimiyogi i ciŋ Nebukadnejar kabaka me Babilon ki luditone, Ento lacen dano dok gibibedo i Ejipt aye, kit macalo yam gubedo i kare ma okato con. An a Rwot me mony doŋ aloko.”

Rwot bilaro jone

²⁷ “Pe wulwor, wun likwayo pa laticca Yackobo; wun jo Icrael, cwinywu pe myero oballe woko. Abilarowu ki i lobo ca ma tye ka mabor-ri, abilaro likwayowu bene ki i lobo ma yam giterogi iye i opii. Likwayo pa Yakobo gibidwogo cen ci gibedo mot ki kuc; ŋat mo pe bimiyo gibedo ki lworo.

²⁸ Pe wulwor, wun likwayo pa laticca Yakobo, man Rwot ma owaco, pien atye kwedwu. Abijwero jo me rok ducu atyekogi woko, ki ka ma yam aryemowu wuket iye, ento wun pe abityekowu woko liweŋ, Pe abiwekowu ma pe aketo can i komwu; abipwodowu maberber pe ki kiniga twatwal. Man Rwot ma owaco.”