Jeremia 37 - Acoli Baibul

Gitweyo Jeremia woko i mabuc

¹ Nebukadnejar kabaka me Babilon yam oketo Jedekia wod pa Yocia me bedo kabaka me Juda ma ka Yekonia wod pa Yekoyakim.

² Ento Jedekia ki luticce, ka wa lwak bene pe guwinyo lok pa Rwot ma Rwot omiyo bot lanebi Jeremia ni otit botgi-ni.

³ Kabaka Jedekia ocwalo Yekukal wod pa Celemia, ki ajwaka Jepania wod pa Maceya bot Jeremia, kun giwacce ni, “Myero ileg Rwot Lubaŋawa-ni piwa.”

⁴ I kare meno onoŋo Jeremia pud tye ka wirre ata i kin dano, donyo i ot ci kato woko gire kit ma cwinye mito, pien onoŋo pud peya gitweye i mabuc.

⁵ I kare meno bene mony pa Parao oa ki i Ejipt obino; i kare ma jo Kaldaya ma onoŋo gitye ka rumo Jerucalem guwinyo lok man, ci gucako dye woko ki i Jerucalem gudok woko cen ki ŋegi.

⁶ Ka doŋ Rwot, Lubaŋa pa Icrael, owaco bot lanebi Jeremia ni,

⁷ “Wac bot kabaka me Juda ma ocwali me lok kweda ni, ‘Dul mony pa Parao ma onoŋo bino ka konyi-ni doŋ bidok woko i lobo Ejipt.

⁸ Ci jo Kaldaya bidwogo cen. Gibibino gilwenyo i kom gaŋ man, gimayo woko ka doŋ giwaŋo woko ki mac.

⁹ An Rwot acikowu matek ni pe myero wubed ka bwolle kekenwu kun wutamo ni jo Kaldaya pe bidwogo cen, myero wuniaŋ ni gibidwogo.

¹⁰ Kadi bed wuloyo dul mony pa jo Kaldaya ma gibino ka lweny i komwu-ni, ma noŋo doŋ jo mudoŋŋe keken, en aye jo ma noŋo giketo ret i komgi ma gibuto i kemagi, jo-nu bene pud gibiromo a malo ci giwaŋo gaŋ-ŋi woko ki mac.’ ”

Gimako Jeremia gitweyo woko i mabuc

¹¹ Dul mony pa jo Kaldaya gudok woko cen ki i Jerucalem ki ŋegi pien onoŋo mony pa Parao doŋ onyiko cok mada.

¹² Ci Jeremia oa ki i Jerucalem ocito i lobo pa Benjamin ka gamo dul lobo ma gipoko bote ki i kin lutugi.

¹³ Ento i kare ma Jeremia oo i dog gaŋ pa Benjamin, onoŋo ladit ma loyo askari tye ka tic kunnu, nyiŋe gilwoŋo Irija wod pa Celemia ma wod pa Anania; cutcut omako Jeremia woko kun wacce ni, “In it ye ka lwi woko icito bot jo Kaldaya.”

¹⁴ Jeremia odok iye ni, “Meno lok goba, an pe atye ka lwi woko acito bot jo Kaldaya.” Ento Irija onoŋo pe twero winyo lok pa Jeremia mumiyo omake otere bot rwodi.

¹⁵ Ci kiniga omako rwodi matek i kom Jeremia, gugoye ka gutweye kwede woko i mabuc i ot pa Yonacan ma karan, pien onoŋo doŋ giloko odoko ot mabuc.

¹⁶ Gitweyo Jeremia i ot ma obedo bur ma tye i te ŋom, ci giweko ori kunnu pi kare malac.

¹⁷ Ci kabaka Jedekia ocwalo dano ka kelo Jeremia bote, ci gikelo, en ojolo Jeremia maber. Kabaka ocako penye ki i ot i muŋ kun penye ni, “Tye lok ma Rwot otitti?” Jeremia ogamo ni, “Lok tye.’, Dok omedo lok kun wacce ni, “Gibimiyi woko i ciŋ kabaka me Babilon.”

¹⁸ Jeremia owaco bene ki kabaka Jedekia ni, “Gin marac aŋo ma an atimo boti nyo bot luticci kadi ki bot lwak man, mumiyo itweya woko i mabuc-ci?

¹⁹ Gin aŋo mutimme i kom lunebini ma yam gutyeto lok boti ni kabaka me Babilon pe bibino ka lweny i komi kadi ki i kom lobo man?

²⁰ Kombeddi doŋ, ai laditta, alegi iwiny kokona pe dok idwoka cen i ot pa Yonacan karan, weko abito woko ki kunnu.”

²¹ Pi meno Jedekia omiyo cik, ci gukelo Jeremia guketo me bedo i dyekal pa lukur-piny, kun oye gibedo ka miye mugati nino ki nino, mugati ma gigamo ki i yo pa luted mugati, nio waŋ ma mugati doŋ otum woko liweŋ ki i gaŋ, Kit meno Jeremia obedo kunnu i dyekal pa lukur-piny,