Jeremia 36 - Acoli Baibul

Baruk okwano buk adola i ot pa Lubaŋa

¹ I mwaka me aŋwen me loc pa Yekoyakim wod pa Yocia kabaka me Juda, Rwot owaco bot Jeremia ni,

² “Kwany buk adola ci ico iye lok ducu ma atito boti mukemo Icrael ki Juda, kacel ki rok ducu. Co gin ducu ma atito boti tyen mukwoŋo, i kare ma onoŋo Yocia aye kabaka o kwede wa onyoo.

³ Gwok nyo ka jo Juda guwinyo pi can ma onoŋo ayubbe me kelo i komgi, miyo gin ducu gibilokke giweko yogi marac-ci. Ci abiweko balgi ki gin maraco ducu ma yam gutimo.”

⁴ Kumeno Jeremia olwoŋo Baruk wod pa Neria, ci okwano bot Baruk gin ducu ma onoŋo Rwot owaco bote, kun Baruk obedo ka coyo woko liweŋ i buk adola.

⁵ Ka doŋ Jeremia ociko Baruk kun wacce ni, “An doŋ gigeŋa woko ni pe adony i ot pa Rwot.

⁶ Ento amito in icit kunnu i kare mo ma noŋo dano tye ka ri kec, ci ikwan lok ma i buk adola-ni woko matek ki dwan maloŋo, wek jo ducu ma gitye i ot pa Rwot guwiny lok ma Rwot onoŋo owaco bota, en lok ma an akwanogi boti icoyo i buk adola-ni, Myero ikwan lok magi bot jo Juda ducu ma gua ki i gaŋigi wek guwiny.

⁷ Gwok nyo gibilego lega me bako doggi bot Rwot, ci gilokke giweko timo gin marac, pi lok ma Rwot doŋ oloko i kom lwak man ki kiniga kacel ki akemo mager.”

⁸ Kit meno Baruk okwano lok pa Rwot i ot pa Rwot kit macalo lanebi Jeremia ocike kwede ni myero en oti.

⁹ I dwe me aboŋwen i mwaka me abicce me loc pa Yekoyakim kabaka me Juda, dano gubedo ka ri kec wek Rwot okonygi, Jo ma gubedo ka ri kec onoŋo obedo jo ma gubedo i Jerucalem kacel ki jo ma gua ki i gaŋi ducu me Juda ci gubino kunnu.

¹⁰ I kare ma dano guciko itgi ka winyo lok, ci Baruk okwano lok ducu ma Jeremia owacce ma en ocoyo i buk adola. Baruk otiyo man i ot pa Rwot i kicika pa Gemaria wod pa Capan ma karan. Kicikane onoŋo tye cok ki dyekal mamalo, i kabedo ma gidonyo kwede i dog gaŋ Manyen me ot pa Rwot.

Gikwano buk adola bot ludito

¹¹ Mikaya wod pa Gemaria, wod pa Capan, owinyo ka Baruk kwano lok ma Rwot owaco ki i buk adola.

¹² Cutcut en oa ocito i gaŋ kal, ci odonyo i kicika pa karan pa kabaka, Onoŋo rwodi ducu gucokke kunnu: Elicama karan, Delaya wod pa Cemaya, Elnatan wod pa Akbor, Gemaria wod pa Capan, Jedekia wod pa Anania ki rwodi ducu.

¹³ Ci Mikaya owaco botgi lok ducu ma en owinyo i kare ma Baruk okwano lok ki i buk adola i nyim lwak-ki,

¹⁴ Ci rwodi guoro Jekudi wod pa Netania, wod pa Celemia, wod pa Kuci, me waco bot Baruk ni, “Kwany buk adola ma ikwano bot lwak-ki imak i ciŋi ci ibin.” Kit meno Baruk wod pa Neria okwanyo buk adola omako i ciŋe ci obino kwede botgi.

¹⁵ Ci guwaco bote ni, “Bed piny ikwan buk meno.” Kit meno Baruk okwano botgi lok meno.

¹⁶ I kare ma doŋ guwinyo lok magi woko ducu, ŋat acel acel olokke bot lawote ki lworo madwoŋ, ci guwaco bot Baruk ni, “Myero wuwac lok man woko bot kabaka.”

¹⁷ Ka gupenyo Baruk ni, “Tittiwa, lok magi ducu icoyogi niŋniŋ i Jeremia aye ma obedo ka wacone boti ka in icoyo?”

¹⁸ Baruk odok iye ni, “Jeremia obedo ka waco lok magi ducu bota ki acel acel, ka acoyogi i buk adola ki kalam vino.”

¹⁹ Ci rwodi guwaco bot Baruk ni, “In kacel ki Jeremia myero wucit wukanne woko, pe wuwek ŋat mo oŋe ka ma wutye iye.”

Kabaka owaŋo buk adola woko

²⁰ Lacen rwodi gucito guketo buk adola i kicika pa Elicama, ma karan, ka doŋ gucito i gaŋ pa kabaka, ci gutito lok woko ducu bot kabaka ki kunnu.

²¹ Cutcut kabaka ooro Jekudi me cito ka gamo buk adola. Jekudi ocito okwanyo ki i kicika pa Elicama ka okwano bot kabaka kacel ki rwodi ducu ma onoŋo gucuŋ ka ŋete.

²² I dwe me aboŋwen onoŋo kare me cwir, kabaka bene onoŋo tye i gaŋ kalle ma en bedo iye i cwir, ci onoŋo obedo ka oyo mac.

²³ I kare ma Jekudi kwano buk adola, ka okwano oo i dul coc me adek nyo me aŋwen, ci kabaka ŋolo woko cutcut ki pala matidi ci bolo woko i mac. Obedo ka timo man nio ka buk adola owan otum woko ducu.

²⁴ Ento ŋat mo kadi kabaka nyo luticce ma guwinyo lok magi ducu pe gubedo ki lworo, dok bene pe guyeco boŋŋigi,

²⁵ Kadi bed Elnatan, Delaya, kacel ki Gemaria gulego kabaka ni pe owaŋ buk adola-ni woko, kabaka pe oketo cwinye me winyo lokgi wacel.

²⁶ Lacen kabaka ociko wode Jeramel, kacel ki Ceraya wod pa Ajriel, ki Celemia wod pa Abdcel ni gumak Baruk karan kacel ki lanebi Jeremia, ento Rwot okanogi woko. Jeremia dok ocoyo buk adola mukene’

²⁷ Lacen ma doŋ kabaka otyeko waŋo buk adola ma Jeremia aye owaco lokke bot Baruk ka Baruk ocoyo-ni, Rwot ociko Jeremia

²⁸ ni okwany buk adola mukene ka oco iye lok ducu ma onoŋo tye i buk adola mukwoŋo ca ma kabaka Yekoyakim doŋ otyeko wano woko-ni.

²⁹ Rwot otitte me waco bot kaba ka Yekoyakim ni; “Doŋ ityeko wano buk adola ca woko, dok bene ipenyo Jeremia ni piŋo en ocoyo ni kabaka me Babilon bibino ada ci tyeko lobo man woko kun neko jo ducu kacel ki lee ma tye iye,

³⁰ Pi meno an Rwot, awaco bot in Yekoyakim ka baka me Juda ni, pe tye dano mo ki i kom Likwayu ma bibedo kabaka. Ka ito komi gibibolo woko ka ma Lyeto ceŋ biwaŋo ki dyeceŋ ki nico me pee dyewor.

³¹ Abiketo can i komi kacel ki likwayu, ki luticci, pi balwu ducu ma wutye ka timone. Dok in, kadi ki jo Jerucalem nyo jo Juda, pe wubedo ka keto cwinywu me winyo lok ma abedo ka waco botwu teretere, pi meno abekelo can ma onoŋo yam doŋ aciko pire ni aketo i komwu-ni.”

³² Ci Jeremia dok okwanyo buk adola mukene ci omiyo bot Baruk karan, ci Baruk ocoyo lok woko ducu ki acel acel kit macalo Jeremia obedo ka wacce kwede. Baruk ocoyo lok ducu ma onoŋo tye i buk adola mukwoŋo ma kabaka Yekoyakim owaŋo woko ki mac-ci. Jeremia dok omedo iye lok mapol maromrom ki lok me wiati ca.