Jeremia 33 - Acoli Baibul

Cikke mukene pi gin maber ma bitimme i anyim

¹ Lok pa Rwot doki obino bot Jeremia tyen me aryone ma onoŋo en pud gitweye woko i mabuc i dyekal pa lukur-piny.

² Rwot ma oketo lobo, ma ocweyo omiyo ocun i kabedone, oloko ki Jeremia. En ma nyiŋe gilwoŋo ni Rwot-ti owaco kuman ni,

³ “Lwona, ci abigamo dogi; abititti pi gin madito dok ma giuro ma pud peya iŋeyo gin mo i komgi liweŋ,

⁴ An Rwot Lubaŋa pa Icrael, awaco ni odi ma i Jerucalem ki gaŋ kal pa luker me Juda gibimukogi giretogi woko piny. Konnye pe me cito ka lweny i kom cel lobo ma jo Kaldaya gutoro-ni,

⁵ Jo Kaldaya gitye ka bino ka lweny ki ka poŋo gaŋ man woko ki kom jo ma guto, ma an kikoma aye abinekogi ki kinigana kacel ki akemona, An doŋ aloko neya woko i kom gaŋ man pi tim ducu maraco ma jo ma bedo iye gutimo.

⁶ “Abicaŋo gaŋ man dok abimiyo gibedo ma komgi yot. Abicaŋo jo ma gibedo iye ci anyuto botgi kuc madit ma bimiyo gibedo laboŋo lworo.

⁷ Abidwoko gum pa jo Juda botgi ki pa jo Icrael, abigerogi odoco kit macalo yam gubedo con.

⁸ Abilonyogi woko maleŋ ki i kom bal aliigi ki bal ma yam gutimo i koma, abiweko bal aliigi ki lok me jemo ma yam gujemo kwede i koma.

⁹ Pi meno gaŋ me Jerucalem bibedo gaŋ me yomcwiny, gaŋ me pak ki me deyo bota; dok rok ducu ma i wi lobo bilworo, dok komgi bene bimyel, ka onoŋo guwinyo pi gin maber ma atye ka tiyone pi jo Jerucalem, ki pi berbedo ma atye ka kelone i gaŋ man.”

¹⁰ Rwot owaco kuman ni, “Dano giwacci kabedo man obedo calo tim aroo; dano kadi ki lee ma bedo iye pe. Obedo lok ada ni gaŋi me Juda ki yo me Jerucalem gitye noŋo; dano nyo lee mo pe ma bedo kunnu. Ento i kabedo magi doki wubiwinyo aye

¹¹ dwan me yomcwiny ki yomcwiny madwoŋ, dwan anyira ger ki dwan lunyom. Wubiwinyo dano giwero wer ka gikelo gityer me pwoc i oda; gibiwacci, ‘Wumi pwoc bot Rwot me mony, pien Rwot ber, mar mere ma pe lokke bedo nakanaka.’ Abimiyo lobo man bedo lobo mulony kit macalo yam onoŋo tye kwede wa con, man Rwot ma owaco.”

¹² Rwot me mony owaco kuman ni, “I lobo man ka ma obedo calo tim aroo, dok ka ma kadi dano nyo Lee pe bedo iye, i kare me anyim lum dok bibedo tye iye ka ma lukwat gitero romigi iye ka cam.

¹³ I gaŋi me lobo godigodi, i gaŋi me Cepela, ki i gaŋi me Negeb, i lobo pa Benjamin, i kabedo ducu ma orumo Jerucalem, ki i gaŋi me Juda, lukwat dok gibikwano romigi. Man Rwot ma owaco.

¹⁴ “Nen, kare tye ka bino, en aye kare ma abicobo iye cikke ma yam aketa ki jo Icrael ki jo Juda.

¹⁵ I nino meno ki i kare meno abiketo iye lakwaro Daudi kikome me bedo kabaka. En bibedo jaŋ yat ma bilot ki kit ma atir, ma biloyo loc ki ryeko, dok bitiyo gin ma tye atir dok kakare i lobo man.

¹⁶ I kare ma noŋo en tye kabaka, jo Juda gibibedo mot laboŋo lworo mo, ki jo Icrael bene doŋ gibibedo ki kuc. Gibilwoŋo kabaka meno ki nyiŋ ni, ‘Rwot aye ma miyowa kit ma atir.’

¹⁷ “An Rwot, doŋ atyeko cikke ni kare ducu dano mo bibedo tye ma en Lakwar Daudi ma myero obed kabaka me Icrael,

¹⁸ dok bene kare ducu ajwagi bibedo tye ma gia ki i kaka pa Levi ma gin aye gibicuŋ i nyima nakanaka ka tyero gitum awaŋa, gityer me moko kwoŋ, ki gitum mukene-gu ducu.”

¹⁹ Rwot owaco ki Jeremia ni,

²⁰ “Bedo tek me turo gicikkena ki ceŋ ki dyewor, wek pe omi ceŋ ki dyewor gubin i karegi ma mitte kikome.

²¹ Kit meno bene bedo tek me turo gicikkena ki laticca Daudi, wek pe en obed ki lakware mo ma myero obed kabaka, ki dok bene me turo gicikkena ki ajwagi ma gua ki i kaka pa Levi ma gin aye gitye ka tic bota.

²² Abimedo wei likwayo pa laticca Daudi ki wel ajwagi bene ma gua ki i kaka pa Levi ma gitiyo bota, wek bene kwanogi obed tek kit macalo kwano lakalatwe ma i polo nyo nyig kweyo me dog nam tek kwede.”

²³ Rwot owaco bot Jeremia ni,

²⁴ “Tika iŋeyo kit ma dano gilok kwede ni an doŋ atyeko kwero Icrael ki Juda woko, gin kaka aryo ma onoŋo ceŋ ayerogi-ni? En meno gin mumi yo gineno jona ki waŋ me cac dok bene pe gitamo pigi ni gin rok,

²⁵ Ento an Rwot, aketo gicikkena ki ceŋ ki dwe, dok bene aketo cik ma tye ka loyo polo ki lobo.

²⁶ Doŋ kit macalo ada atyeko timo man, kit meno bene abigwoko gicikkena ki likwayo pa Yakobo ka dok ki laticca Daudi. Kare ki kare abiyero dano ki i kom likwayo pa Daudi me loyo likwayo pa Abraim, Icaka ki Yakobo. Abidwoko gumgi kakare botgi, dok kica bibedo ka maka i komgi.”