Jeremia 31 - Acoli Baibul

Dwogo pa jo Icrael paco

¹ Rwot owacci, “Kare tye ka bino ma abibedo Lubaŋa pa jo me doggola ducu pa jo Icrael, ki gin bene gibibedo jona,

² Ceŋ anyuto kicana bot jo ma gubwot ki i lak to i dye tim. I kare ma jo Icrael giyenyo yweyo,

³ an anyutte botgi ki ka mabor. Wun jo Icrael kare ducu abedo ka marowu, kit meno pud amedde ki nyuto botwu mar mera ma pe lokke.

⁴ Abigerowu woko odoco wun jo Icrael, ci wubicuŋ. Doki wubikwanyo ajaa agoya-gu ci wubimyelo myel ki yomcwiny madwoŋ.

⁵ Doki bene pud wubipito olok i wi cere me Camaria, doŋ jo ma pito olok meno, gibicamo mucekke.

⁶ Ada, kare tye ka bino ma lukur-piny gibidanne gilwoŋo lwoŋo ki i wi cere me lobo Epraim ni, ‘Wubin kany! Wacitu malo i Cion, bot Rwot Lubaŋawa.’ ”

⁷ Rwot owacci, “Wuwer wer ki dwan maloŋo ki yomcwiny pi jo pa Yakobo, wudaŋŋe matek pien gin rok madit i kin rok ducu. Wuwer wer me pak kun wuwaco ni, ‘Rwot doŋ olaro jone, olaro jo Icrael ducu ma yam gudoŋ.’

⁸ Nen, abikelogi woko ki i lobo ma tye yo tuŋ acam, abicokogi bene ki ka mabor ki i agikki piny, Lutowaŋ ki luŋolo gibibino kacel kwedgi, mon ma guyac kacel ki mon ma doŋ gicok nywal; gibidwogo cen gibedo rok matek.

⁹ Gibibino ki koko, gibibedo ka lega kun noŋo atelogi kwede me dok cen; abimiyo giwoto ki i ŋet laora kulu ma pii opoŋ iye, gibilubo yo atir ma pe gibiyoko tyengi wacel; pien atye macalo wego bot jo Icrael, Epraim aye obedo latin ma akwoŋo nywalone.

¹⁰ “Wuwiny lokka, wun rok ducu, an Rwot, ci wutit lokka ka maboco i lobo ma tye i dog nam-gu, An ma akeyo jo Icrael woko-ni aye dok abicokogi adwokogi cen, abigwokogi woko maber kit macalo lakwat gwoko kwede romine.

¹¹ Doŋ atyeko koko jo pa Yakobo woko ki i opii, alarogi bene ki i ciŋ rok matek makatogi.

¹² Gibibino giwero wer matek pi yomcwiny i wi got Cion, mot ma an Rwot amiyogi-ni biyomo cwinygi mada, kal, koŋo vino, ki moo, romi ki dyani-gu. Gibibedo calo poto ma gionyo iye pii muromo kare ducu, pe gibiŋeyo cwercwiny doŋ matwal.

¹³ Anyira bimyelo myel ci cwinygi bedo yom, awobe ki jo muteggi ducu gibibedo ki yomcwiny madwoŋ. Abikweyo cwinygi ci aloko kumogi doko yomcwiny, cwercwiny ma git ye kwede bene bilokke doko yomcwiny.

¹⁴ Abimiyo ajwagi gicamo cam mabeco mabup giyeŋ adada, aoŋ motta bityeko miti pa jona woko liweŋ, man Rwot ma owaco.” Kica omako Rwot i kom jo Icrael

¹⁵ Rwot owacci, “Koko tye ka winnye i Rama, koko ki kumo madwoŋ. Lakeri tye ka kok pi litinone; en okwero woko ni pe doŋ gikwe cwinye, pien litinone doŋ gipe.

¹⁶ Wek koko obedi, duny pig waŋi bene woko. Ticci ducu ma itiyo bot litinoni gibimiyi bakacic pire; gibidwogo cen ki i lobo pa lukworwu. Man Rwot ma owaco.

¹⁷ Gen tye pi karewu me anyim; litinowu gibia gidwogo cen lobogi kikome. Man Rwot ma owaco.

¹⁸ Awinyo ka jo Epraim tye ka koko ki cwercwiny kun giwacci, ‘Rwot, waŋ wabedo calo dyaŋ mudin ma pe winyo lok, ento doŋ ipwodowa adada, ci ipwonyowa me lubo gin ma imito. Kwanywa idwokwa cen, ci waŋ bene wabidok; pien in i Rwot Lubaŋawa.

¹⁹ Onoŋo walokke wabwoti woko, ento i ŋeye cutcut waŋut wabedo ki cwiny me dwogo cen. I kare ma doŋ ityeko keto can i komwa, wakulo wiwa woko ki cwercwiny me can. Lewic omakowa mada dok alee otwodowa woko, pien watimo bal i kare ma onoŋo pud watino.’

²⁰ “Epraim, in latinna ma amaro adada, latin ma amaro makato ducu. Pien kare ducu ka alwoŋo nyiŋi, atamo piri ki mar madit. Cwinya kutte akuta i komi; abibedo ki kica i komi bene. Man Rwot ma owaco.

²¹ Wuket lanyut ma nyuto botwu waŋa yo; wugur yat mogo i ŋet yo ma binyutowu yo; wutam pi yo gudo ma en yo ma wulubo i kare ma wubino-ni, Wudwog cen, wun jo Icrael, wudwog cen i gaŋ ma nene wuweko-ni.

²² Wubibedo ka kalakala pi kare ma rom mene, wun jo ma pe genne? Pien Rwot doŋ oketo jami manyen i lobo: dako aye ma gwoko laco.”

Lonyo ma lwak pa Lubaŋa bilimo i kare ma tye anyim

²³ Rwot me mony, Lubaŋa pa Icrael, owaco kuman ni, “Ka doŋ adwoko lwak man i lobogi, gin doki gibiwaco ki i lobo Juda ki i gaŋine ducu ni, ‘Rwot myero omi gum i kom got maleŋ me Jerucalem, kabedo maleŋ ka ma en bedo iye.’

²⁴ Dano gibibedo i Juda ki i gaŋine ducu, lupur ki lukwat ki romigi bene gibibedo kunnu.

²⁵ Abimiyo jo ma guol gilimo tek, dok abimiyo jo ducu ma kec doŋ onyono komgi woko giyeŋ ki cam.

²⁶ Man bimiyo dano giwacci, ‘Anino woko ci odiko aco anoŋo atye maber ma koma yot.’

²⁷ “An Rwot, doŋ awaco ni, Kare tye ka bino ma abipoŋo lobo Icrael ki Juda woko ki dano kacel ki lee.

²⁸ Kare bibino kit macalo agwokogi i kare me putogi, i kare me mukogi, i kare me turogi, i kare me tyekogi, ki i kare me keto can i komgi, kit meno bene abigwokogi ka pitogi ki ka gerogi wek gudoŋ malo. Man Rwot ma owaco.

²⁹ Ka kare meno oromo, dano pe dok gibimedde ka waco ni, ‘Kwarowa gucamo nyig olok mawac, man odiŋo lak lidiŋ woko.’

³⁰ Ento dano acel acel bito pi balle en kikome; kit meno dano acel acel ma bicamo nyig olok mawac lake bidin woko.”

Gicikke manyen

³¹ Rwot owaco ni, “Nen, kare tye ka bino ma abiketo iye gicikke manyen ki jo Icrael ki jo Juda bene.

³² Gicikke man pe bibedo calo gicikke ma yam aketo ki kwarogi i kare ma onoŋo akwanyogi woko ki i Ejipt akelogi woko ca. Gin guturo gicikke ma aketo kwedgi, kadi bed onoŋo an abedo cwargi. Man Rwot ma owaco.

³³ Ka kare meno oromo, man aye gicikke ma abiketo ki jo Icrael: Abimiyo gibedo ki cikka i tamgi, abicoyo bene bedo i cwinygi, An abibedo Lubaŋagi, ki gin gibibedo jona. Man Rwot ma owaco.

³⁴ Ŋat mo pe doŋ bipwonyo lawote, ŋat mo bene pe biwaco bot ominne nyo lutugi ni, ‘Ŋe Rwot,’ Gin ducu gibineya, cakke i kom jo matino o kwede wa i kom jo madito ma i kingi. Abiweko balgi, pe dok abibedo ka po i kom gin marac ma gubedo ka timone. Man Rwot ma owaco.”

³⁵ Rwot miyo ceŋ ryeny i dyeceŋ, dwe ki lakalatwe en miyo giryeny dyewor, En rubo pii me nam, ci miyo mor; nyiŋe gilwoŋo ni Rwot me mony.

³⁶ Rwot ocikke ni Icrael kare ducu bibedo rok, bibedo pi kare malac kun lubo kit ma cik ma eketo i lobo-ni biri kwede.

³⁷ Rwot owacci, “Ka ce onoŋo gitwero pimo pol, nyo ka gitwero roto te guti me lobo ki piny, meno keken aye bimiyo akwero jo Icrael pi gin ducu ma doŋ gutyeko timo. Man Rwot ma owaco.”

³⁸ “Nen, kare tye ka bino, man Rwot ma owaco, ma gaŋ man gibigero odoco pi Rwot cakke ki i kom lubele ma gilwoŋo Kananel o kwede wa i dogcel ma i twok gaŋ.

³⁹ Doŋ tol me pimone gibimiyo cito wa ka mabor atir o kwede wa i got Gareb, ka bigono piny o kwede i Goa.

⁴⁰ Nota ka ma gicoro iye kom jo muto ki bu rin ki tim ducu ma i ŋet laora kulu me Kidron nio kwede wa i dogcel me Aguragura dok kwede tuŋ wokceŋ, bibedo gin maleŋ bot Rwot. Pe dok gibiputo nyo gituro woko matwal.”