Jeremia 30 - Acoli Baibul

Rwot ocikke me dwoko jo ma yam giterogi i opii cen i Jerucalem

¹ Man lok ma Rwot oloko ki Jeremia.

² Rwot ma en Lubaŋa pa Icrael owaco ni, “Co lok ducu ma abedo ka loko boti-ni i buk,

³ pien kare tye ka bino ma abidwoko iye gum bot jona jo Icrael ki jo Juda. Abikwanyogi adwokogi cen i lobo ma yam amiyo bot kwarogi, gibileyo doŋ bedo megi. Man Rwot ma owaco.”

⁴ Magi gin aye lok ma Rwot oloko ma okemo Icrael ki Juda:

⁵ Rwot owaco kuman ni, “Wawinyo koko ma baŋo dano, koko ma kelo lworo, ento pe ma kelo kuc.

⁶ Koŋ ipennye kekeni ci dok itam ni, laco mono twero nywalo latin? Piŋo kono aneno laco acel acel mako pyere ki ciŋe calo dako ma tye ka rem ki nywal? Piŋo waŋ dano olwal woko?

⁷ Maa do! Nino marac tye ka bino, pe tye nino mo ma rom kwede; en aye nino me can bot likwayo pa Yakobo; kadi bed kumeno gibilarogi ki i can meno.”

⁸ Rwot me mony owaco ni, “Ka nino meno oromo abituro rii bao woko ki i ŋutgi dok bene abicodo nyor ma gitweyogi kwede woko; cakke i kare meno pe doŋ gibibedo opii pa lurok matwal.

⁹ Bnto gin gibitiyo bot Rwot Lubaŋagi, ki bot Daudi kabakagi, ma an aye abimiyo botgi me bedo kabakagi.

¹⁰ “Pe wulwor, wun likwayo pa laticca Yakobo; wun jo Icrael, cwinywu pe myero oballe woko, Abilarowu ki i lobo ca ma tye ka mabor-ri, abilaro likwayowu bene ki i lobo ma yam giterogi iye i opii. Likwayo pa Yakobo gibidwogo cen ci gibibedo mot ki kuc; ŋat mo pe ma bimiyo gibedo ki lworo. Man Rwot ma owaco.

¹¹ Abibedo kwedwu pi larowu. Abijwero jo me rok ducu atyekogi woko, i kin jo ma yam akeyogi iye; ento wun pe abityekowu woko liweŋ. Abipwodowu maberber pe ki kiniga twatwal, ento pe abiwekowu ma pe aketo can i komwu. Man Rwot ma owaco.”

¹² Rwot owaco bot jone ni, “Waŋ retwu pe doŋ caŋ, waŋ burre odet marac.

¹³ Ŋat mo pe ma twero cuŋ piwu, yat bene pe me aketa i waŋ burwu, waŋ burwu pe doŋ can.

¹⁴ Jo ma gimarowu-ni ducu wigi doŋ owil woko i komwu; gin pe doŋ giparo piwu wacel. Pien alwenyo i komwu macalo lukworra; dok bene aketo can magwa i komwu laboŋo kica, pien balwu dwoŋ, ki gin marac ma wutimo bene pol.

¹⁵ Piŋo pud wukok pi ret ma wulimo? Aremwu pe doŋ caŋ. Aketo can i komwu kit man, pren balwu dwoŋ, ki gin marac ma wutimo bene pol mada.

¹⁶ Pi meno jo ducu ma tyekowu, gin bene gibitye kogi woko, lukworwu ducu bene gibimakogi giterogi woko i opii. Jo ducu ma unowu gin bene gibiunogi, ki jo ducu ma yako jamiwu gin bene gibiyako jamigi woko.

¹⁷ Pien abimiyo wubedo doki ma komwu yot, abicano waŋ burwu woko bene, kadi bed lukworwu giwacci, ‘Cion doŋ odoko gin ma gibolo woko; ŋat mo doŋ pe ma paro pire.’ Man Rwot ma owaco.”

¹⁸ Rwot owacci, “Nen, abidwoko likwayopa Yakobo cen i lobogi dok kica bimaka i kom jo me doggola acel acel; gibigero gaŋ acel acel odoco i kabedone macon, ki ot acel acel bene gibigero kakare.

¹⁹ Jo ma kunnu doŋ gibiwero wer me pwoc; gibibedo ka daŋŋe bene pi yomcwiny. Abimiyo ginya gidoko pol ma pe welgi jwik, ci abikelo deyo botgi.

²⁰ Litinogi bibedo pol kit macalo yam gubedo kwede i kare macon, ki lwakgi bene bicuŋ i nyima matek likiŋ; abiketo can i kom jo ducu ma unogi.

²¹ Ŋat ma bibedo laker ma loyogi bene bia ki i kingi, ŋat ma bibedo laloc gi bibedo dano me rokgi kikome. Ka alwoŋe, ci en binyiko cok bota; pien ŋat mo pe twero ette me bino cok bota ka pe alwone,

²² Wun wubibedo jona, ki an abibedo Lubaŋawu.”

²³ Koŋ inen yamo kot pa Rwot! Akemone bedo calo yamo lapiru mager, ma bimwoc woko lituc i wi jo maraco.

²⁴ Akemone pe bigik nio waŋ ma en ocobo tiyo gin ma onoŋo doŋ otamo me timone. I kare ma lacen, i nino ma pud tye anyim, jone gibiniaŋ maber makato.