Jeremia 27 - Acoli Baibul

Jeremia otweyo okol i ŋute

¹ Cutcut i ŋe kare ma Jedekia wod pa Yocia doŋ odoko kabaka me Juda, en aye lok pa Rwot obino kwede bot Jeremia.

² Rwot owaco bot Jeremia kuman ni myero en oyub del olir woko me tol kacel ki yat rii kweri dyaŋ ci oketgi otwegi i ŋute.

³ Ka Rwot dok otitte me cwalo lok bot luker me Edom, Moab, Ammon, Turo ki Cidon, kun wok ki bot lukwenagi ma gubino i Jerucalem ka limo Jedekia kabaka me Juda.

⁴ Rwot me mony, ma en Lubaŋa pa Icrael, otito bot Jeremia me ciko lukwena magi me waco bot lukergi ni Rwot doŋ otyeko waco kuman ni,

⁵ “An aye ma acweyo lobo ki twerona dok ki tekona, wa dano ki lee ducu ma gitye i wi lobo; doŋ atwero miyogi bot ŋat mo keken ma ayero.

⁶ Kombeddi doŋ atyeko miyo lobo magi woko ducu i ciŋ laticca Nebukadnejar, kabaka me Babilon, dok bene amiye wa lee tim ni guti bote.

⁷ Rok ducu bitiyo bote, gibitiyo bot wode ki bot lakware, nio ka kare biromo ma labone doŋ gibiloyo woko. Lacen doŋ rokke bibedo opii, gibitiyo bot rok matego mapol ki luker madito.

⁸ “Ka ce inen rok mo nyo ker mo pe bitic bot Nebukadnejar kabaka me Babilon, ma gibimine i te loc pa kabaka me Babilon macalo dyaŋ, abiketo can i kom rok meno kun aneko jone woko ki pala lucwan i lweny, amiyo kec nekogi, ki two gemo bene poto i komgi, nio waŋ ma amiyo gutum woko i te twero pa Nebukadnejar. Man Rwot ma owaco.

⁹ Pi meno pe myero wuwiny lok pa lunebi, lutyet, lulek lek, lutyet ki ajaa ki lutal-gu, ma gibedo ka waco botwu ni, ‘Pe wubidoko opii pa kabaka me Babilon.’

¹⁰ Gitye ka bwolowu abwola, ma adwoggine en aye ni abimiyo gikwanyowu woko ki i lobowu giterowu woko ka mabor. Abiryemowu woko, ci wubito wutum woko ducu.

¹¹ Ento ka ce rok mo omine kene i te loc pa kabaka me Babilon kun tiyo bote, abiweko en doŋ bedo i lbone, kun puro iye, dok bedo kunnu bene, man Rwot ma owaco.”

¹² Jeremia owaco lakit lok acel-lu bot Jedekia kabaka me Juda ni, “Wumine kenwu i te loc pa kabaka me Babilon. Wuti bote kacel ki bot lwakke ci wubibedo kwo.

¹³ Piŋo imito ni in kacel ki lutuwu ginekwu woko i lweny, nyo kec onekwu woko, ki two gemo bene opot i komwu? Man aye gin ma Rwot doŋ otyeko wacone ma bitimme i kom rok ma pe bimine kene i te loc pa kabaka me Babilon.

¹⁴ Pe myero iwiny lok pa lunebi ma giwaco botwu ni pe wubitiyo bot kabaka me Babilonni. Gin gitye ka bwolowu abwola.

¹⁵ Rwot kikome owacci en gire pe eorogi, gin gitye ka loko lok goba botwu ki nyiŋe, Doŋ adwoggine en aye ni en biryemowu woko ci wubito wutum woko, wun kacel ki lunebi ma giloko lok goba magi botwu-ni.”

¹⁶ Ci Jeremia owaco bot ajwagi kacel ki lwak ni, “Rwot owaco kuman ni, Pe myero wuwiny lok pa lunebi ma gitito botwu ni jami ma gitiyo kwedgi i ot pa Rwot doŋ cok gibidwokogi cen ki i Babilon. Lok meno ma gitye ka titone botwu-ni lok goba.

¹⁷ Pe wuwiny lokgi; wuti mewu tic bot kabaka me Babilon wek wubed kwo. Piŋo gaŋ man gibal woko odok wi obur?

¹⁸ Ka ce inen ni gin lunebi adada, dok ka lok ma gitito-ni obedo lokka, wek guleg Rwot me mony, ni wek pe oye gikwany jami ma gitiyo kwedgi i ot pa Rwot ma gudoŋ i Jerucalem ki i ot pa kabaka me Juda, pe gitergi woko i Babilon.”

¹⁹ Rwot me mony owaco lok kuman mukemo wir-gu, nam, okar mac, ki mukemo jami mukene ma yam gitiyo kwedgi i ot pa Lubaŋa ma gudoŋ i Jerucalem,

²⁰ ma yam Nebukadnejar pe okwanyogi oterogi woko, i kare ma en omako Yekonia wod pa Yekoyakim kabaka me Juda kacel ki ludito ducu me awora me Juda ki Jerucalem oterogi woko i opii i Babilon, owacci,

²¹ “Wuwiny gin ma an Rwot me mony, Lubaŋa pa Icrael, atye ka wacone mukemo jami ma gitiyo kwedgi i ot pa Rwot ma giwekogi i ot pa Rwot ki i ot pa kabaka me Juda ki i Jerucalem ni,

²² Gibikwanyogi giterogi woko i Babilon nio waŋ ma an dok atamo pigi. Ci abicokogi adwokogi cen aketogi kakargi i kabedo man. Man Rwot ma owaco.”