Jeremia 25 - Acoli Baibul

Lukwor ma gibia ki i lobo ma tye yotuŋ acam

¹ I mwaka me aŋwen me loc pa Yekoyakim wod pa Yocia kabaka me Juda, lok pa Rwot obino bot Jeremia ma okemo jo Juda ducu. (Man aye obedo mwaka mukwoŋo me loc pa Nebukadnejar kabaka me Babilon.)

² Lanebi Jeremia owaco bot jo Juda ducu ki bot jo ducu ma bedo i Jerucalem ni,

³ “Kombeddi doŋ odoko mwaka pyeraryo wiye adek kulu, cakke i mwaka me apar wiye adek me loc pa Yocia wod pa Amon kabaka me Juda nio kwede wa onyoo, Rwot oloko kweda dok an bene abedo ka tittiwu lokke teretere ma pe aliŋ; ento wun pe wuketo cwinywu ka winyo lokke.

⁴ Wun pe wuwinyo dok pe wuciko itwu ka winyo lokke, kadi bed Rwot obedo ka cwalo luticce lunebi teretere botwu.

⁵ Gin gutito botwu ni myero wulokke wuwek kitwu me timo gin marac, man bimiyo wubedo i lobo ma yam Rwot omiyo Wa con botwu ki bot kwarowu me’ bedo mewu matwal.

⁶ Gin bene gutito botwu ni pe wuwor lubaŋa mukene dok pe wuti botgi bene, dok bene pe myero wuŋet cwiny Rwot wek kiniga omake ki cal lubaŋa ma wutiyo ki ciŋwu. Ka onoŋo nene wulubo gin ma Rwot oloko, kono nene en pe oketo can i komwu.

⁷ Ento Rwot kikome owacci wun wukwero winyo lokke, Ma ka meno, wuŋeto cwinye wumiyo kiniga omake ki cal lubaŋa ma wutiyo atiya ki cinwu-ni, mumiyo wun aye ma wukelo can ma onoŋo en mito ketone i komwu, wukelo giwu i komwu kenwu.

⁸ “Pi meno, kit macalo wukwero winyo lokke-ni, omiyo Rwot me mony owaco kuman ni,

⁹ ‘Abecwalo rok ducu ma gibedo i lobo ma tye yo tuŋ acam ki laticca Nebukadnejar kabaka me Babilon i komwu. Abekelo lwak me rok ducu me lweny i kom rok man ki jone ducu, ki i kom rok ducu murumogi dyere. Abinekogi atyekogi woko liweŋ; abimiyo lworo mako dano kun gijwat pi gaŋi ma odoŋ obur, man bibedo macalo cac matwal.

¹⁰ Dok bene abijuko dwan me woo me yomcwiny madwoŋ woko ki botgi, dwan nyako ger ki dwan lanyom, ki mor pa kidi rego, kun aneko mac taragi woko bene.

¹¹ Lobo man ducu bidoko obur ma iye odon noŋo, doŋ rok magi gibibedo i te loc pa Nebukadnejar kabaka me Babilon pi mwaka pyerabiro kulu.

¹² Lacen ka mwaka pyerabiro doŋ otum, abiketo can i kom kabaka me Babilon, ki i kom lobone lobo pa jo Kaldaya, pi balgi. Abibalo lobogi woko abiweko doŋ obur mwatwal. Man Rwot ma owaco.

¹³ Abiketo can i kom rok meno ki gin ducu ma doŋ atyeko wacone, ki gin ducu ma gicoyo i buk man, ki gin ducu ma Jeremia oloko mukemo rok magi ducu.

¹⁴ Rok mapol ki luker mapol gibiloko wa jo Kaldaya gidoko opii, ci abiculogi kun lubo gin ma gutimo.’ ”

Ŋolo kop pa Lubaŋa i kom rok ducu

¹⁵ Rwot Lubaŋa pa Icrael owacca ni, “Ene, gam kikopo kono yino ma opoŋ ki akemona. Gam ci imi jo me rok ducu ka ma abicwali iye gumati.

¹⁶ Ka doŋ gumato, ci gibicato ki wot dok bene gibibedo mamiŋ i tamgi pi lweny ma abicwalo i komgi-ni.’

¹⁷ Kit meno agamo kikopo ki i ciŋ Rwot, ci amiyo jo me rok ducu ka ma Rwot ocwala iye gumato.

¹⁸ Jerucalem ki gaŋi ducu me Juda, kacel ki lukergi ki rwodigi ducu gumato; pi meno lobogi doŋ bidoko tim aroo ma iye odoŋ noŋo, bimiyo dano gijwat kun giuru, miyo dano gibitic ki nyiŋgi macalo lok lacen dano kit macalo tye kwede wa onyoo-ni.

¹⁹ Jo mukene bene ma gibimato akemo pa Rwot gin ene: Parao kabaka me Ejipt, luticce, rwodine, lwakke ducu;

²⁰ ki jo me rok mukene ducu ma gibibedo i kingi; luker ducu me lobo Uj ki luker ducu me lobo Piliciti (Acikelon ki Gaja, Ekron, ki jo Acidod ducu ma gudoŋŋe);

²¹ ki jo ducu me Edom, Moab, ki jo Ammon;

²² luker ducu me Turo, luker ducu me Cidon, ki luker me lobo ma tye i dog nam;

²³ jo ducu me gaŋi me Dedan, Tema, ki Buj; jo ducu ma ginyaro yer wigi doŋ macego;

²⁴ luker me Arabia ducu ki luker me kaka mapatpat ma gurubbe aruba ma gibedo i tim aroo;

²⁵ luker ducu me Jimri, Elam, ki Media;

²⁶ luker ducu me lobo ma tye yo tuŋ acam, jo ma bedo ka mabor ki jo ma bedo ka macok, kun gin ducu gilubbe aluba kikore. Rok ducu ma tye i wi lobo bene myero gumati. Ka me agikkine doŋ kabaka me Babilon bimato.’

²⁷ Lacen Rwot owaco bota ni, “Tit bot lwak ni an Rwot me mony, Lubaŋa pa Icrael, acikogi me mato akemona nio waŋ ma gumer dok gunok, nio ka gupoto piny ma pe doŋ gitwero a malo pi lweny ma abecwalo i komgi-ni,

²⁸ “Ka ce gukwero gamo kikopo ki i ciŋi wek pe gimat akemona, tit botgi ni Rwot me mony owacci, Myero wumati.

²⁹ Pien nen, doŋ abecako timo gin marac i kom gaŋ ma gilwoŋo ki nyina-ni. Wun wutamo wubibwot ma pe aketo can i komwu? Pe kumeno, ento abiketo can i komgi, pien abecwalo lweny i kom jo ducu ma gibedo i wi lobo. Man an Rwot me mony kikoma aye ma awaco.

³⁰ “In Jeremia, myero itit lok magi ducu ma an awacci-ni, Myero itit bot jo magi ni, ‘Rwot bimoro dwane ki i polo, en bilok bene ki i kabedone maleŋ. En bimoro dwane matek adada i kom jone; bidaŋŋe calo dano ma tye ka nyono olok, pi meno jo ducu ma gibedo i wi lobo gibiwinyo lokke.

³¹ Mor dwane biwinnye wa i agikki piny, pien Rwot tye ki pido i kom rok ducu. En biŋolo kop i kom jo ducu, ci bimiyo gineko jo maraco woko ki pala lucwan. Man Rwot ma owaco.’ ”

³² Rwot me mony owaco ni can tye ka bino i kom rok ducu ki acel acel kun lubogi kikore kikore, ki yamo lapiru mager tye ka kodo kun a ki i agikki piny.

³³ I nino meno kom jo ma ginekogi gibikeyo woko ata i but lobo ducu. Pe gibikumo pigi, pe gibicokogi, pe bene gibiyikogi. Komgi biradde i ŋom lirwat macalo cet dyaŋ muket ata.

³⁴ “Wukoki, kun wudaŋŋe, wun lukwat, wuŋenne i buru wun lukwat romi, pien kare doŋ oromo me nekowu en, kare me ketowu ata, Gibiŋolo ŋutwu calo giŋolo nut nyogi romi mucwe.

³⁵ Kabedo mo ma lukwat giriŋo gilaro iye pe bidoŋ, kadi ki kabwot mo ma lutel pa romi gibibwot kwede pe bidoŋ,

³⁶ Winy koko pa lukwat, winy bene ka lutel pa romi gikok! Pien Rwot tye ka balo kakwat woko ki kiniga,

³⁷ oweko dwol romine ma onoŋo tye ki kuc-ci odon obur.

³⁸ Rwot doŋ otenyo jone woko calo labwor ma oweko borone, pien lobogi doŋ iye odoŋ nono pi pala lucwan pa joma giuno dano, ki pi kiniga mager pa Rwot.”