Jeremia 20 - Acoli Baibul

Lok ma giceno ki Packur pi tweyo Jeremia I ‘mabuc

¹ I kare meno ajwaka Packur wod pa Imer, ma onoŋo en aye ladit ma loyo ot pa Rwot, owinyo ka Jeremia tito lok magi.

² Cutcut Packur otugi go yo lanebi Jeremia woko, ‘ci otweye ki okol ma tye i dogcel ma malo pa Benjamin me ot pa Rwot.

³ Orwone Packur ogonyo Jeremia ki i okol, ci Jeremia owacce ni, “Rwot pe lwoŋo nyiŋi ni Packur, ento lwoŋi ni Lworo tye i kabedo ducu.

⁴ Pien Rwot owaco kuman ni, Nerr, abimiyo ibedo gin ma kelo lworo i komi kekeni ki i kom luremi ducu. Lukworgi gibinekogi woko ki pala lucwan ka ma in bene inenogi, Abimiyo jo Juda woko ducu i cin kabaka me Babilon; en biterogi woko i opii i Babilon, ci en binekogi woko ki pala lucwan.

⁵ Dok bene abimiyo lonyo ducu me gaŋ man kacel ki magobane, ki jami ducu ma pigi tego botgi ducu, ki kit lonyo mapatpat pa kabaka me Juda i cin lukworgi, ma biyako jamigi, kun gimakogi, ci giterogi woko i Babilon.

⁶ Doŋ in Packur, kacel ki jo ma gibedo i odi, gibiterowu woko i opii i Babilon; ci doŋ wubito kunnu, gibiyikowu bene kunnu, in kacel ki luremi ma yam ibedo ka tito lok gobagoba botgi-ni.”

Jeremia okok bot Rwot

⁷ Ai Rwot, in doŋ ibwola, oweko bene gibwola. In i tek ikata woko, doŋ ityeko loya woko. Doŋ adoko ginanyera pa dano dyeceŋ jwi; dano ducu giŋala aŋala.

⁸ Ka atye ka loko lok mo ci aloko ki dwan maloŋo kun adaŋŋe matek ni, “Tim bwami ki balle me lobe!” Gicaya dok ginywara kare ducu pien ni atito lok pa Rwot.

⁹ Ka ce awacci, “Pe doŋ abilwoŋo nyiŋ Rwot, nyo ni pe doŋ abiloko lok mo ki nyiŋe matwal,” ci i cwinya kuca noŋo tye iye gin mo ma waŋ calo mac, ma tye okanne woko i cogona, doŋ aol woko ki juko doga wek pe aloki, pe doŋ atwero.

¹⁰ Awinyo lwak tye ka lok lawewe. Gilwoŋa doŋ ni, “Gin ma kela lworo i kabedo ducu.” Giwacci, “Dote woko! Wek wadote woko!” Man lurema ma aŋiyo kwedgi aye giwaco; gitye ka neno kit macalo abipoto kwede i can. Dok giwacci, “Gwok nyo gibibwole abwola, ci wabimake woko, waculo waŋ kworwa i kome.”

¹¹ Ento in, Rwot, it ye kweda, in oteka lweny ma gilworo, pi meno jo ma giketo ayelayela i koma gibiyokke atata; pe gibiloya kadi matidi mo. Lewic bimakogi matek mada, pien pe doŋ gitwero loyo. Lewic ma bimakogi-ni bedo matwal, wi dano pe biromo wil i kome wacel.

¹² Ai Rwot me mony, in itemo dano me neno ka kitgi tye atir, iŋeyo gin ma tye i cwinygi ki gin ma gitamo. Pi meno wek anen ka iculo kwor i kom lukworra, pien an doŋ anyuto lokka woko ducu boti.

¹³ Wuwer wer bot Rwot! Wupak Rwot! Pien otyeko laro kwo pa jo ma piny obwoyogi ki i ciŋ lutim maraco.

¹⁴ Gicen nino ma cen ginywala iye-ni! En nino ma yam maa onywala iye, wek gum obed pe i kom nino meno!

¹⁵ Gicen dano ma okelo lok maber bot wora ni, “Inywalo latin laco,” omiyo obedo ki yomcwiny madwoŋ.

¹⁶ Wek dano-nu obed calo gaŋi ma Rwot ojwero woko laboŋo kica; wek owiny koko i odiko ki oduru ma gigoyo i cwiny dyeceŋ,

¹⁷ pien pe oneka ki i i maa; kono ot nyodo pa maa doŋ olokke odoko macalo lyella, kono ot nyodo pa maa obedo pek matwal.

¹⁸ Piŋo akatti kono ki i ic ka noŋo tic matek ki cwercwiny, dok ka tyeko ninona ducu ki lewic keken?