Jeremia 14 - Acoli Baibul

Pii otwo woko ki i lobo

¹ Rwot owaco bot Jeremia pi two pii ma okemo Juda woko ni,

² “Juda tye ka kumo gaŋine bene tye ka to woko. Jo Juda ducu gibuto piny ki twon cwercwiny mo ma pe wacce; ma noŋo jo Jerucalem gitye ka kok matek adada pi kony.

³ Luditogi me awora gicwalo luticgi ka twomo pii; gicito i waŋ taŋi me pii, emo pe ginoŋo, gidwogo ki gin latwom piigi ma noŋo iye noŋo. Lewic makogi dok bene alee twodogi woko ci giumo wigi woko.

⁴ Pien lobo doŋ oballe woko, kit macalo kot doŋ pe obedo ka cwer i lobo-ni, lewic omako lupur mada ma noŋo cwinygi cwer ma giumo wigi auma.

⁵ Kadi bed wa megi til ma tye i tim bene no no gubwoto litinogi ma gunywalo woko pien lum mo ma myero gucam pe.

⁶ Kana me tim-gu gicuŋ i wi cere matar atara ligwek, ginamo doggi malac me yweyo calo too; waŋgi olwal woko pien onoŋo pe tye lum mo ma myero gucam.

⁷ “Kadi bed ka ce balwa dotowa, ai Rwot konywa kit macalo yam iciko. Wabedo ka lokke wabwoti woko tyen mapol; watyeko bene timo bal-gu i komi.

⁸ In “keken aye ŋat ma jo Icrael gigeno, in aye ma ilarowa i kare ma noŋo watye i can. Piŋo ibedo macalo larok i lobowa, dok macalo lawot ma yenyo kabuto?

⁹ Piŋo ibedo macalo dano ma wiye onyobbe woko ma pe ŋeyo gin ma myero etim, calo ŋat mo ma en oteka ma pe twero laro dano ki i mony? Ento adada in Rwot it ye kwedwa, dok waŋ bene gilwonowa ki nyiŋi; pi meno pe ibwotwa woko.”

¹⁰ Rwot owaco kuman i komjone ni, “Yam gumaro wot atata kit meno, pe gujuko tyengi ka wot; pi meno omiyo Rwot pe gamogi. Kombeddi doŋ en bipo i kom bal megi ci biketo can i komgi pi balgi.”

¹¹ Rwot owaco bota ni, “Pe myero ilega ni an akony lwak man.

¹² Kadi bed giri kec, pe abiwinyo koko ma gikok kwede bota pi kony, dok kadi bed gutyer gitum awaŋa ki gityer me moko kwoŋ, pe abigamogi; ento abinekogi atyekogi woko liweŋ ki pala lucwan, ki kec malit mupoto i lobo, wa ki two gemo-gu.”

¹³ Dok awacci, “Ai Rwot Lubaŋa, nen lunebi onoŋo doŋ gutyeko tito bot lwak man woko ni, ‘Pe gibinekowu ki pala lucwan, dok bene kec mo pe bipoto i lobowu, ento Rwot bimiyo botwu kuc me ada ma bedo nakanaka i kabedo man.’’’

¹⁴ Ento Rwot odokka iye owacca ni, “Lunebi gitye ka tito lok goba keken ki nyiŋa; an pe acwalogi, pe acikogi, dok bene pe bene pe aloko kwedgi. Gitye ka tito botwu ginanyuta me goba ki tyeto tyet ma konnye pe, kun gibwolo dano abwola ki tam ma gutamo pigi kengi,

¹⁵ Pi meno an Rwot awaco kuman lok i kom lunebi ma gitito lok i nyina kadi bed an aye pe acwalogi, ma giwacci, ‘Pala lucwan ki kec madit pe bibino i kom lobo man wacel,’ awaco ni, Lunebi magi gibine-kogi ki pala lucwan kacel ki kec.

¹⁶ Jo ma gin gubedo ka tito lok botgi bene gibibologi woko i dye yo me Jerucalem, ma noŋo ginekogi ki pala lucwan kacel ki kec; ŋat mo pe ma biyikogi. Man bitimme i komgi ducu, i kom mongi, litino awobegi, ki anyiragi bene, pien abimiyo gineno can pi tim maracogi.

¹⁷ “In ibiwaco botgi lok man ni, ‘Wek pig’ waŋa omol ocit piny I kora lipyaa dyeceŋ ki dyewor benebene; wek pig waŋa pe ojwik woko, pien jona gityeko goyogi woko ki twon bur madit adada, ma giketo ret woko i komgi marac atika.

¹⁸ Ka ce acito woko i tim, nen, anoŋo jo ma ginekogi ki pala lucwan dwoŋ ata! Dok ka ce adonyo i gaŋ, aneno lwak dano mapatpat gitye ka two ki two me kec! Pien lunebi kacel ki ajwagi giwoto kun gitiyo ticgi i lobo, kun pe gitye ki ŋec mo.’ ”

Lwak gubako doggi bot Rwot

¹⁹ In doŋ mono ikwero Juda woko matwal, Rwot? Cwinyi bene doŋ ocido woko i kom Cion bo? Piŋo doŋ ipwodowa kuman ma pe doŋ waromo can? Wabedo ka yenyo kuc, ento gin mo maber ma wanoŋo pe; i kare ma myero wacan iye wanoŋo gin ma kelo lworo keken.

²⁰ Ai Rwot, waŋ doŋ waneyo gin maraco ma wabedo ka timone, kadi wa bal pa kwarowa ducu waneyo, pien ada, waŋ wabalo i komi.

²¹ Pe cwinyi ocid woko i komwa, pi dit me nyiŋi; dok bene pe ibal woro me komkerri ma nen me deyo-ni woko. Po piwa, pe itur gicikkeni woko kwedwa.

²² Tika tye kit lubaŋa mo i kin lubaŋa me gobagoba me rok ducu ma twero miyo kot cwer? Nyo polo kono twero miyo kot mo ŋido i lobo? Pe in aye ma itiyo magi ducu, ai Rwot Lubaŋawa? Wan ducu wageno in, pien in aye ma itiyo jami magi ducu.