Jeremia 12 - Acoli Baibul

Jeremia okok bot Rwot ci Rwot ogamo doge

¹ Ai Rwot, ka apido lokka kwedi, anoŋo ni in giri lokki tye atir. Ento myero pud dok apenyi lok ma mako ŋolo kop. Piŋo jo maraco gibedo maber dok gilony? Piŋo lutim aranyi kono gicobo tiyo gin ma cwinygi mito?

² In aye ma yam ipitogi, mumiyo giroyo lwitgi donyo i ŋom gidoŋo ci ginyak bene. Kare ducu gin giloko lok maber i komi, ento ki i cwinygi noŋo gitye ka mabor, pe giparo piri.

³ Ento in Rwot, iŋeya, ineno gin ma atiyo, dok itemo tamma pi neno kit macalo amari kwede. Makgi ikelgi woko ki tek calo romi me aneka, kogi woko iketgi pat nio ka nino me nekogi oromo.

⁴ Lobowa mono bibedo mutwo pi kare ma rom mene, dok lum ducu ma i tim bitwo woko nio wa awene? Lee ki winyo gitye ka to pi tim maraco pa jo ma gibedo i lobo man, ma giwaco ni i, “In pe ineno kit ma gitye ka bedo kwede.”

⁵ Rwot owacci, “Jeremia, ka ce iol woko i ŋwec ma kun ipyemki dano, ci ibiŋweco ipyem ki aguragura niŋniŋ? Ka ce ipoto piny i lobo ma kuc tye iye, ci doŋ ibikwo niŋniŋ ka ibedo i kin yadi mukadde ma tye i ŋet Jordan?

⁶ Kadi ki omegini, ma gin jo me ot pa woru kikome, gin bene gutimo tim aranyi i komi, gin guribbe ka lweny i komi bene. Pe igengi, kadi bed giloko lok maber me larem boti.”

⁷ Lubaŋa owacci, “An doŋ aweko jona woko, doŋ akwero rok ma yam ayerogi-ni woko; doŋ atyeko miyo jona ma amaro-ni woko i ciŋ lukworgi.

⁸ Jona ma ayerogi-ni doŋ gulokke woko i koma calo labwor ma tye i buŋa; gumor ki koko matek i koma pi meno omiyo adaggi.

⁹ Jona ma ayerogi-ni gubedo calo tula, ma winyo wadigi lwenyo i kome i kabedo ducu. Wubin, wun lee tim; wubin wuribbe ka cam kacel.

¹⁰ Lukwat mapol doŋ gutyeko balo poto olokka woko, gunyono dul lobo ma gipokka woko piny ki tyengi, guloko dul lobona ma yomo cwinyani odoko tim ma iye odoŋ noŋo.

¹¹ Gumiyo doŋ odoko tim ma konnye pe; odoko tim ma iye odoŋ noŋo i nyima. Lobone ducu doŋ gibalo woko odoŋ noŋo, ento ŋat mo ma paro pire pe.

¹² I wi cere ducu ma tye i tim aroo, jo ma lutyek piny doŋ gubino ka yako Doŋ an Rwot atyeko cwalo lweny me tyeko lo bo woko ducu; ŋat mo pe ma bitwero bedo ki kuc.

¹³ Jona yam gucoyo bel ento gukayo okuto, gubedo ka tiyo tic matek guolo komgi woko, ento pe gulimo iye gin mo. Lewic bimakogi pien gin ma gucoyo ducu pe ocek pi kiniga mager pa Rwot.”

Cikke pa Rwot pi jo ma bedo ka get jo Icrael

¹⁴ Rwot owaco kuman ni, “At ye ki lok mo ma myero awac bot jo ma gibedo ka ŋet jo Icrael ma doŋ gubalo lobo ma amiyo bot jona jo Icrael-li woko. Nen, abikwanyo rok man woko ki i lobogi, dok bene abilaro jo Juda akwanyogi ki i kingi.

¹⁵ I kare ma doŋ akwanyogi woko, ci kica bimaka i komgi, Abikelo rok acel acel adwoko cen i lobone dok i kabedone kikome.

¹⁶ Dok ka kare biromo, ka ce gipwonyo kit pa jona ki cwinygi ducu, ma kun gikwoŋo ki nyiŋa ni, ‘Macalo Rwot tye makwo-ni,’ macalo yam gupwonyo jona me kwoŋo ki nyiŋ jok Baal, ci miyo gin ducu doŋ gibirubbe woko ki jona ci gibibedo maber.

¹⁷ Ento ka ce tye rok mo ma pe biwinyo lokka, ci abiputo woko ki lwite ducu ci abalo woko licwic, man Rwot ma owaco.”