Jeremia 10 - Acoli Baibul

Lubaŋa ma pe me ada ki Lubaŋa me ada

¹ Wun jo Icrael wuwiny lok ma Lubaŋa tye ka lokone botwu.

² Rwot owaco kuman ni, “Pe wupwony kit pa lurok, dok cwinywu bene pe myero oballe ka wuneno lanyut mo tye i polo, kadi bed rok mukene-gu cwinygi oballe woko pire.

³ Pien kit pa lurok obedo gin me bwolo, pe ada. Gitoŋo yat gireto woko piny i buŋa, ci lapac payo woko maber ki koyone nyo ki jami mukene me pac.

⁴ Dano gidero kome woko ki ryal nyojabu; gikwanyo nyono giguro ki cumari iye wek ocun matek likiŋ pe opot woko piny,

⁵ Cal lubaŋagi-nu obedo calo wir yat ma gicibo ocun i poto okwer pi ryemo winyo, pe bene gitwero lok; gitiŋogi mege atiŋa, pien pe giwoto. Pe ilworgi, pe gitwero timo gin mo marac i komi, dok bene pe gitye ki twero mo me timo gin mo maber.”

⁶ Pe tye lubaŋa mo macalo in, ai Rwot; in idit, dok nyiŋi bene dit ki tek.

⁷ Aŋa mono ma pe mvero olwori, in kabaka ma loyo rok ducu? Man aye kiti, myero dano gulwori. Pe tye ŋat mo macalo in i kin luryeko ducu me rok mapatpat, kadi ki i te kergi ducu.

⁸ Danogi ducu ma luryeko gubedo jo ma lumiŋ dok wigi bene odin. En bao ma giyubo ni cal lubaŋa-ni tika pwonyogi ki gin mo?

⁹ Cal lubaŋagi gidero kome woko ki ryal ma gidino woko ma gikelo ki i Tarcic, ki jabu ma gikelo ki i Upaj, Gin ducu gubedo tic pa lupac ki dok bene tic ma latet jabu otiyo ki ciŋe: ginarukagi obedo makwar ki dok lamar lamar; gin ducu gubedo tic ma jo ma kwiri aye gutiyo.

¹⁰ Ento Rwot aye Lubaŋa me ada, en Lubaŋa makwo, dok bene en Kabaka ma bedo nakanaka. Ka inen, ce akemo omake ci lobo yeŋŋe, rok ducu pe twero ciro kinigane.

¹¹ Ibiwaco botgi kit man ni, “Lubaŋa mogo-gu ma pe guketo polo ki lobo-ni gibijwerogi ‘woko. Pe doŋ gibibedo tye i kabedo mo i wi lobo ki i te polo.”

Wer me pako Lubaŋa

¹² Rwot oketo lobo ki twerone, dok ocibo lobo ocuŋ matek pi ryekone, ki pi niaŋ matut ma en tye kwede omiyo oyaro polo woko.

¹³ I kare ma dwane mor, ci pii twagge matek ki i polo, dok miyo lupu duny kun a ki i agikki lobo. En miyo lutkot wil ka kot cwer, dok bene miyo yamo kodo kun a ki i ot kano jamine.

¹⁴ Dano ducu bedo lumiŋ dok bene ma wigi odiŋ; lewic mako latet jabu pi cal jokke ma en otiyo; pien cal jogine-gu ducu pe lubaŋa me ada, dok bene pe gitye ki kit kwo mo i igi.

¹⁵ Konygi pe, gitiyogi mere me acaya keken; i kare ma Rwot bibino ka keto can i komgi gibito gitum woko.

¹⁶ Lubaŋa pa Yakobo pe obedo calo cal jogi magi; pien en aye ŋat ma oketo jami ducu, dok bene en oyero jo Icrael wek gubed jone kikome, Nyiŋe gilwoŋo ni Rwot me mony. Gibitero dano i opii

¹⁷ Wun jo Jerucalem ma mony doŋ orumowu woko-ni, wutin yecwu woko ki i ŋom,

¹⁸ pien kombeddi doŋ Rwot biryemowu woko ki i lobo-ni; en biŋinyowu waŋ ma wuwinyo litte.

Man Rwot ma owaco.

¹⁹ Jo Jerucalem gikok ni, “Giketo ret woko i komwa marac kuman! Waŋ burwa tye marac mada ma pe bicaŋ, Yam watamo ni man en aye gin ma watwero ciro, kara pe!

²⁰ Kemawa doŋ gibalo woko, ki tol ducu ma onoŋo gitweyogi kwede gicodo woko; litinowa doŋ guwekowa, gin ducu doŋ gipe. Ŋat mo pe ma odoŋ ma myero ogur kemawa odoco kakare; pe tye ŋat mo ma myero otwe boŋo kicika megi malo.”

²¹ Jeremia ogamo ni, “Lutel doŋ gudoko lumiŋ; pe gipenyo Rwot wek otelgi. Meno aye gin mumiyo yam pe gubedo maber; lwakgi ducu doŋ guket woko ata.

²² “Winy lok! Nen tye ka bino! Twon gin ma mor tye ka katti bino ki i lobo ma yo tuŋ acam, dul monnye bino me jwero gaŋi me Juda woko wek odoŋ obur, odok kabedo ka ma too bedo iye.”

²³ Ai Rwot, aŋeyo ni dano pe loyo kwone kene nio i agikkine; pe tye ŋat mo ma tye ki twero me loyo kwoŋe.

²⁴ Ai Rwot, pwony lwakwa; ento pe itimwa marac aye. Pe ipwonywa i kare ma noŋo kiniga omaki; miyo wabito woko ducu.

²⁵ Kiniga myero omaki i kom rok ma pe giŋeyi, ki i kom lurok ma pe gilwoŋo nyiŋi-ni, Doŋ gityeko likwayo pa Yakobo woko; ci gubalo lobowa woko odoŋ obur.