Jepania 2 - Acoli Baibul

Ŋolo kop ki can i kom rok ducu murumo Icrael

¹ Wubin, wucokke kacel, wun rok ma lewic pe makowu,

² ma pud peya giryemowu woko macalo cuŋ kail ma yamo tiŋo, ma peya kiniga mager pa Rwot obino i komwu, ma peya nino me akemo pa Rwot obino i komwu.

³ Wuyeny Rwot, wun jo ducu mamwol me lobo man, ma wucobo cikke; wulub kit ma atir wubed ki mwolo; gwok nyo gibibwotowu i nino me akemo pa Rwot.

⁴ Pien Gaja bidoŋ nono, Acikelon bidoko obur, jo Acidod gibiryemogi woko dyeceŋ, Ekron gibiputo woko.

⁵ Wubineno can wun jo ma wubedo i dog nam, wun rok me Keret! Lok pa Rwot otikowu, in Kanaan, lobo pa jo Piliciti; abityek i woko nio waŋ ma ŋat mo pe bidoŋ bot i.

⁶ In dog nam, ibidoko olet, bar pa lukwat ki dwol romi.

⁷ Lobo dog nam bidoko pa jo Juda ma gudoŋ, gibikwayo romigi iye; gibibuto piny otyeno i odi me Acikelon. Pien Rwot Lubaŋagi biparo pigi, bidwoko gum botgi.

⁸ “Doŋ awinyo lok aŋec pa jo Moab ki yet pa jo Ammon, kit ma giŋeco ki jona, kun ginyuto wakke i kom lobogi,

⁹ Pi meno, macalo atye makwo-ni, “Rwot me mony ma owaco, Lubaŋa pa Icrael, “Moab bidoko calo Codom, jo Ammon bidoko calo Gomorra, lobo ma opoŋ ki ayila ki bur kado, ma oballe doŋ matwal. Jona ma gudoŋ biyakogi, jona ma gubwot ki i kin rokka bileyo lobogi.”

¹⁰ Man bitimme i komgi macalo adwoggi me wakkegi, pien guŋalo jo pa Rwot me mony dok bene guwakke i komgi.

¹¹ Rwot bikelo lworo madwoŋ i komgi bineko lwak lubaŋa me wi lobo ducu ki kec, lobo pa lurok ducu gibiryebbe piny i nyime, rok acel acel i kabedone.

¹² Wun jo Etiopia bene, gibinekowu ki pala lucwanna.

¹³ En biryeyo ciŋe tuŋ acam, ajwagine gicido gin maleŋ woko, bityeko Aciria woko; en bi loko Nineve doko obur kun otwo calo tim aroo.

¹⁴ Lim makwo bibuto i dyere ki lee tim ducu; acut ki coo gibibedo i wir odine; tula bikok ki i waŋ dirica agak bikok i larii doggola; pien tic bao cedar doŋ bigik woko.

¹⁵ Man aye gaŋ ma yam nyatte-ni, ma obedo ki kuc, ma oloko kekene ni, “An atye, dok pe tye ŋat mo mukene.” Kit ma en odoko kwede obur, ki boro pa lee tim! Ŋat acel acel ma kato ki i ŋete jwiye kun yeŋo ciŋe ma oŋino-ni.