Jepania 1 - Acoli Baibul

Nino me akemo pa Rwot

¹ Man lok pa Rwot ma yam obino bot Jepania wod pa Kuci, wod pa Gedalia, wod pa Amaria, wod pa Kejekia i kare pa kabaka Yocia me Juda, wod pa Amon.

² “Abijwero jami ducu ki i wi lobo,” Rwot ma owaco.

³ “Abijwero dano wa ki lee; abijwero winyo me polo ki rec me namo Abireto jo maraco; dok abityeko dano woko ki i wi lobo,” Rwot ma owaco.

⁴ “Abiryeyo bada i kom Juda, ki i kom jo ducu ma gibedo i Jerucalem; abijwero jo pa Baal ma gudoŋ woko ki i kabedo man, ki nyiŋ ajwagi me cal jogi bene abiŋolo woko.

⁵ Dok abityeko jo ma ryebbe piny i wi ot ka woro mony me polo; ki jo ma giryebbe piny ka kwoŋo kwoŋ oot Rwot ma kun kono gikwoŋo ki nyiŋ Milkom;

⁶ jo ma gudok cen, ma pe gilubo Rwot, ma pe gicito bot Rwot kadi wa penyo doge.”

⁷ Wuliŋ mot i nyim Rwot Lubaŋa! Pien nino pa Rwot doŋ tye cok; Rwot doŋ otyeko yubo gitum, dok olonyo welene.

⁸ I nino ma Rwot bitumo iye gitumme, “Abiketo can i kom luloc ki litino pa kabaka ki i kom jo ducu ma giruko ruk pa rok mukene.

⁹ I nino meno abiketo can i kom jo ducu ma gikalo larii doggola, jo ma gumiyo bwami ki goba opoŋ i ot pa laditgi.”

¹⁰ “I nino meno,” man lok pa Rwot, “koko biwinnye ki i Dogcel me Rec, koko me can biwinnye ki i dul gaŋ me Aryo, mor piny madwoŋ biwinnye ki i wi cere.

¹¹ Wukok can, wun jo ma wubedo i Pany! Pien lucat-wil doŋ gipe, jo ma pimo lyal doŋ gityekogi woko.

¹² I kare meno abiŋiyo Jerucalem ki mac tara, abiketo can i kom jo ma gibedo abeda macalo koŋo yino ma ori, ma atinyane opoto woko, jo ma giwaco ki i cwinygi ni, ‘Rwot pe bitiyo gin maber, dok pe bitimo gin marac.’

¹³ Jamigi gibiyako woko, odigi bene gibiketogi woko. Kadi bed guger odi, pe gibibedo i igi; kadi bed gupit olok, pe gibimato kono vinone.”

¹⁴ Nino madit pa Rwot tye cok, tye cok dok tye ka bino oyotoyot; dwan me nino pa Rwot, dwan magwar, dano matek kok iye ki dwan maloŋo.

¹⁵ Nino meno aye nino me akemo, nino me can ki me remcwiny madwoŋ, nino me ninyo ki me balo piny, nino me colpiny ki mutu, nino me pol ki colpiny mapek,

¹⁶ nino me koko gwara ki woo me lweny i kom gaŋi ma gicelo matek ki i kom cel ma gigero maboco.

¹⁷ Abikelo can i kom dano, ma bimiyo giwoto calo lutowaŋ, pien gubalo i nyim Rwot; gibionyo remogi woko macalo apwa, ki riŋo komgi gibibolo calo cet.

¹⁸ Kadi ryalgi nyo jabugi pe bilarogi i nino me akemo pa Rwot. Mac me akemo me nyekone bi waŋo lobo ducu; en bityeko dano ducu ma gibedo i lobo magicel dok oyotoyot.