Jekaria 9 - Acoli Baibul

Ŋolo kop i kom rok ma ka get Jerucalem

¹ Lok ma pire tek Lok pa Rwot opoto i lobo Kadrak, ci bipye i kom Damaciko, Pien gaŋi ma i Aram gitye i ciŋ Rwot, kacel ki kaka me Icrael ducu mere;

² Kamat bene ma tye i waŋ apokki lobone, Turo ki Cidon bene, kadi bed giryek mada.

³ Turo ogero celle pire kene gire, oguro ryal oyido malo calo kweyo, ki jabu bene macalo daba ma i gudo.

⁴ Ento, nen ba, Rwot biyako jamine woko, bicoro lonyo mere ducu i nam, en Turo kikome gibiwaŋo ki mac.

⁵ Acikelon bineno, dok lworo bimake; Gaja bene bineno, ci biminne i arem; Ekron bene kit meno, pien lewic bi make i genne. Kabaka birwenyo woko ki i Gaja; Acikelon bidoŋ noŋo laboŋo dano mo.

⁶ Likwayo pa lurok ata gibibedo i Acidod; abigiko wakke pa lobo Piliciti.

⁷ Abikwanyo remo mere woko ki i doge, cam me gipyeda ma en camo abikwanyo woko ki i kin lake; gibidoko jo ma gudoŋ pi Lubaŋawa; gibidoko macalo kaka ma tye i Juda, Ekron bidoko calo jo Jebuc.

⁸ Abiguro kemana i ŋet oda macalo lakur-piny, wek ŋat mo pe obed ka kato ki i ŋete; ŋat mo ma burogi pe dok bidonyo i kingi, pien kombeddi an kikoma aye aneno ki waŋa.

Kabaka ma biloyo Cion

⁹ Wubed ki yomcwiny madwoŋ, wun jo Cion! wugo kijira, wun jo Jerucalem! Wunen ka kabakawu bino botwu; ki waya me loyo lweny, kun obedo wi kana ki mwolo, i wi latin kana,

¹⁰ Abijwero gadigadi lweny woko ki i Epraim, ki aguragura lweny ki i Jerucalem, atum me lweny ducu gibiturogi woko. En aye bitito lok me kuc bot rok ducu; kerre biloyo piny nia i nam tuŋcel nio i nam mukene, kun a ki i kulu Euprate o wa i agikki lobo.

Roco Cion odoco

¹¹ Ki tuŋ boti bene, an aketo remo me gicikke wan kwedi, abiwoto joni ma giterogi i opii ki i bur ma pii pe iye.

¹² Wudok cen wa i cel gogowu, wun lumabuc ma tye ki gen, tin atuco atir ni abiculo waŋe kiryo.

¹³ Pien doŋ atyeko gomo Juda macalo atum; aketo Epraim odoko aterone. Abitugo kin awobewu wun jo Cion, i kom awobewu, wun jo Grik, abitinowu macalo oteka lweny ma mako pala lucwan.

¹⁴ I kare meno Rwot binen lamalo kawigi, aterone biwil macalo lutkot, ci Rwot Lubaŋa bikuto tum matek, biwot ki yamo lapiru ma tuŋ acuc.

¹⁵ Rwot me monyaye bigwokogi, gibiteŋo lataŋdiyo ma gicelo woko, gibinyono lacelone woko piny; gibimato remogi macalo koŋo vino, ci gibiyeŋ macalo becen mupoŋ, calo remo ma gicoro i gul keno tyer,

¹⁶ I nino meno Rwot Lubaŋa bilarogi macalo romine, pien gin jone; macalo litino kidi me wel ma ryeny i kom lalukana gibibedo ka ryeny i lobone kit meno.

¹⁷ Berre ki mwonyane dit ma rom mene! Kom awobe bibedo bulubulu pi kal agwe, ki kom anyira bibedo bulub